Select edition
English
Հայերեն
Որոնել
Նպատակային կատարում. Ղարաբաղի կամերային նվագախումբը հաստատում է պետականությունը երաժշտությամբՄինչև 2004 թվականը Ղարաբաղը սեփական կամերային նվագախումբ չէր ունեցել: Սակայն երկու տարի առաջ Հայկական բարեգործական ընդհանուր միությունը (ՀԲԸՄ) նախաձեռնեց կամերային նվագախմբի ստեղծումը` գեղարվեստական ղեկավար և գլխավոր դիրիժոր նշանակելով Գևորգ Մուրադյանին: «Դեռ 90-ականներին երազում էի կամերային նվագախումբ ստեղծել Արցախում,- ասում է 36 տարվա աշխատանքային փորձ ունեցող Մուրադյանը,- բայց պատերազմի տարիներ էին ու, ինչպես ռուսն է ասում` «նե դո էտովո բիլո»: Բայց արի ու տես, որ անգամ 15 տարի անց երազանքս իրականացավ ՀԲԸՄ շնորհիվ»: «Շատերն ասում էին` Մուրադյան ջան, ո՞ւր ես գնում, այնտեղ ունկնդիր չկա: Ոչ մեկի ասածին ուշադրություն չդարձրի, հավատում էի մեր սկսած գործին»,- նշում է Մուրադյանը: Մուրադյանը եղել է Երևանի սիմֆոնիկ նվագախմբի դիրիժոր, հետո` ֆիլհարմոնիկ երգչախմբի ղեկավար և դիրիժոր: Նվագախմբի 23 երաժիշտներից 12-ը Հայաստանից են, 11-ը` Արցախից: Հայաստանցի երաժիշտներն ապրում են Ստեփանակերտում` վարձակալած բնակարաններում, որոնց համար վճարում է ՀԲԸՄ-ը, որից երաժիշտները նաև ամսական աշխատավարձ են ստանում: «Այս կամերային նվագախմբում աշխատելն ինձ համար ոչ միայն մասնագիտական առավելություն է ենթադրում, այլև ինչ-որ իմաստով առաքելության կատարում,- ասում է Հայաստանից եկած թավջութակահար Հարություն Գևորգյանը: - Աշխարհում ազգերին ճանաչում են նրանց մշակույթով: Մեր գործով փորձում ենք ճանաչել տալ այս երկիրը: Ու, վստահաբար, ստացվում է»: Նվագախմբի առաջին համերգը տեղի ունեցավ 2004 թ. հոկտեմբերի 8-ին` ՀԲԸՄ 83-րդ համագումարի առթիվ: «Երբ առաջին անգամ բեմ դուրս եկա, հպարտությունս հասել էր իր բարձրակետին: Ու նաև շատ հուզված էի այդ զգացումից: Ես ղեկավարել եմ շատ նվագախմբեր տարբեր եվրոպական երկրներում, բայց միանշանակ պիտի ասեմ, որ Արցախում ավելի մեծ պատասխանատվությամբ եմ բեմ դուրս գալիս»,- ասում է Մուրադյանը, ում ադրբեջանական թերթերը համերգներից հետո անվանեցին «անջատողական և դիրիժոր-նվաճող»: Դիրիժորը շեշտում է, որ իր արմատները Արևմտյան Հայաստանից են` թուրքի յաթաղան տեսած ընտանիքից, սակայն նա իր կռիվն այսօր տանում է ոչ թե զենքով, այլ երաժշտությամբ: Նվագախումբը ամիսը մեկ անգամ մեկ ու կես ժամանոց համերգ է տալիս Ստեփանակերտում: Ելույթներ է ունեցել նաև Շուշիում, Մարտակերտում, Քաշաթաղում: Նախատեսվում են համերգներ Հադրութում ու Մարտունիում: Մինչև այսօր Արցախում տվել է 28 համերգ` կատարելով հայ և օտարերկրյա կոմպոզիտորների ստեղծագործություններ: «Արցախի հանդիսատեսը շատ խստապահանջ է ու գնահատող: Նրան չես կարող խաբել կամ անորակ երաժշտություն հրամցնել: Դա նշանակում է, որ մեր գործը շատ ավելի է լրջանում ու պարտավորեցնող դառնում»,- ասում է նվագախմբի տնօրեն ու դաշնակահար արցախցի Սիմոն Սարգսյանը, ով հիշում է, թե սկզբում որքան դժվար էր աշխատանքը հունի մեջ գցել: «Ժամանակի ընթացքում զարգացում ապրեց ոչ միայն նվագախումբը, այլև համերգների մատուցման ձևը: Սկզբում անգամ ազդագրերը ձեռագիր էինք կազմում, բուկլետներ չկային: Իսկ հիմա աշխատում ենք նույնիսկ գեղեցիկ, ժամանակակից դիզայնի վրա»,- ասում է Սարգսյանը: 300 դրամ արժողությամբ տոմսերը գրեթե միշտ սպառվում են, և 500 տեղանոց դահլիճը որպես կանոն լեփ-լեցուն է լինում: Նվագախմբի գործունեության շնորհիվ Ստեփանակերտի երաժշտական քոլեջին կից վերջերս ստեղծվեց լարային ամբիոն: «Արցախցի ծնողները շատ ոգևորված են, որ իրենց երեխաները հնարավորություն ունեն զբաղվելու երաժշտությամբ, հատկապես` լարային գործիքներով: Իսկ դա մեզ հույս է ներշնչում, որ կկարողանանք դաստիարակել մի սերունդ, որը մեր գործի շարունակողը կդառնա, և Արցախը կունենա սեփական երաժիշտներից ձևավորված նվագախումբ»,- ասում է Մուրադյանը:
Other Articles in Մշակույթ
|
 |
ՎԵՐԵՎ | Կատեգորիաներ | Resources | About | Site map | ԱրմենիաՆաուի Հաշիվ |
|---|---|---|---|---|
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.