Ծիրանը բարձր գնի պատճառով վայելել բոլորին չի հաջողվում, բայց ֆիլմասեր հասարակությունը դրա տեղը լրացնում է` այցելելով «Ոսկե ծիրան» կինոփառատոն, որը 2004 թ.-ից ամեն տարի անցկացվում է Երևանում:
Արդեն երեք օր է, ինչ Երևանը վերածվել է իսկական կինոքաղաքի: Հայաստանի մայրաքաղաքի կինոթատրոններում և այլ դահլիճներում կիրակի մեկնարկած կինոփառատոնի շրջանակներում կցուցադրվեն 120 միջազգային ու հայկական ֆիլմեր: Միջոցառումը կավարտվի հուլիսի 18-ին:
Ճանաչված կինոռեժիսորները «Առնո Բաբաջանյան» համերգասրահում վարպետության դասեր են անցկացնում, իսկ Շառլ Ազնավուրի հրապարակում` հենց «Մոսկվա» կինոթատրոնի առաջ, ելույթ են ունենում ջազ երաժիշտներ: «Ոսկե ծիրանի» շրջանակներում ֆիլմերը ցուցադրվում են «Մոսկվա» և «Նաիրի» կինոթատրոններում, Տիկնիկային թատրոնում, «Նարեկացի» արվեստի միությունում և Հայաստանի ազգային պատկերասրահում:
Երեկոն ավարտվում է գիշերային ցուցադրություններով Սիրահարների այգում և The Club կոչվող հայտնի ժամանցային վայրում:
«Մեզ համար շատ կարևոր է աշխարհը մոտեցնել Հայաստանին և Հայաստանը աշխարհին, որն իրականություն է դառնում հենց այս փառատոնի ընթացքում»,- ասում է փառատոնի գլխավոր հովանավոր, Հայաստանի առաջատար բջջային օպերատոր «ՎիվաՍել-ՄՏՍ» ընկերության տնօրեն Ռալֆ Յիրիկյանը, որն այս տարի ստացավ 19-րդ դարի հայ ճանաչված բարեգործի անունը կրող` «Մանթաշյան ասպետ» պլատինե մեդալ:
«Մանթաշյան ասպետ» արծաթե մեդալ հանձնվեց «Մոսկվա» կինոթատրոնի տնօրենին, «Նուշիկյան ասոցիացիայի» նախագահին, «Դոլմամա» ռեստորանի տնօրենին: Մշակույթի նախարարության մեդալով պարգևատրվեցին նաև այլ աջակիցներ:
Փառատոնի անցած օրերին նաև հայազգի մեծանուն կինոռեժիսոր Սերգեյ Փարաջանովի թալեր մրցանակ հանձնվեց հետմահու Անրի Վերնոյին, որն ընդունեց նրա որդին` Պատրիկ Մալաքյանը: Պարգևատրվեց նաև հռչակավոր իտալացի դերասանուհի Կլաուդիա Կարդինալեն, որը փառատոնի պատվավոր հյուրն էր: Նա ստացավ նաև մշակույթի նախարարության և Երևանի քաղաքապետարանի մեդալ: Քաղաքապետարանի մեդալ շնորհվեց նաև ֆրանսիահայ պրոդյուսեր Ալեն Թերզյանին, որի ֆիլմով նախորդ տարի բացվել էր «Ոսկե ծիրան» կինոփառատոնը:
Այս տարի էլ, ինչպես նախորդ տարի, մասնակցում են ազգությամբ թուրք ռեժիսորներ: Նրանցից մեկը Ֆաթիհ Աքին է, որը ծնվել է Գերմանիայում: Չնայած երիտասարդ տարիքին`37-ամյա ռեժիսորն ավելի քան տասնյակ ֆիլմերի հեղինակ է: Կինոռեժիսորն ասում է, որ Հայաստանի և Թուրքիայի միջև հակասությունները վախի արդյունք են:
«Հարցը ոչ թե ցեղասպանությունն ընդունել-չընդունելու մեջ է, այլ նրա, որ Թուրքիայում մարդիկ չունեն այս կամ այն տեղեկությունը ստանալու ու քննադատելու իրավունք»,- «ԱրմենիաՆաուին» անկեղծացավ ռեժիսորը:
Նա ապագայում պատրաստվում է ֆիլմ նկարահանել բռնցքամարտի մասին, որում ցույց կտա, թե ինչպես են հայ և թուրք մարզիկները խաղում միմյանց հետ, ինչպիսի թշնամանքով են այդ խաղը քննարկում ինտերնետում, և իրականում ինչ բարեկամական հարաբերություններ են ստեղծվում մրցակիցների միջև:
«Ոսկե ծիրանը» հնարավորություն է ստեղծում ֆիլմեր ներկայացնել ոչ միայն տեղացի հայերին, այլև առաջին հերթին սփյուռքահայերին, որոնց համար շատ կարևոր է իրենց ֆիլմը ցուցադրել հայրենիքում: Նրանցից մեկը Կոմս Շահբազյանն է, որը 2004 թ. «Ոսկե ծիրանին» մասնակցելով` գտավ իր ապագա կնոջը, որի հետ էլ նկարահանեց «Այստեղ` ներքևում» ֆիլմը, որն այս տարի ներկայացրել է երևանյան փառատոնին:
Ֆիլմը Երևանի կենտրոնի այն բնակիչների մասին է, որոնց վտարում են իրենց հին տներից, որպեսզի տեղում էլիտար շենքեր կառուցեն:
«Մենք մեկ տարի նկարել ենք այդ ֆիլմն ու մեկ տարի հավասարապես ապրել այդ մարդկանց հետ: Այդ ժամանակ կինս սպասում էր մեր դստերը»,- «ԱրմենիաՆաուին» պատմում է Շահբազյանը:
Փառատոնին մասնակցում է նաև մեկ այլ երիտասարդ ռեժիսոր` վենեսուելացի Հայկ Ղազարյանը` իր «Վենեսիա» ֆիլմով, որը նրա առաջին աշխատանքն է: Ֆիլմը Երկրորդ համաշխարհային պատերազմի տարիների սիրո պատմություն է, որը, ռեժիսորի կարծիքով` կհետաքրքրի բոլորին:
Կինոփառատոնի շրջանակներում ֆիլմերի ցուցադրումներն ու մյուս միջոցառումները կշարունակվեն մինչև առաջիկա կիրակի:
English
Հայերեն
ՎԵՐԵՎ 
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.