Ֆոտոլուր
Սուրբ Խաչի պատարագին մասնակցելու հարցը Հայաստանում դեռևս թեժ քննարկումների առարկա է:
Թուրքական լրատվամիջոցների համաձայն` սեպտեմբերի 19-ին Վանի Աղթամար կղզու (Թուրքիա, Արևմտյան Հայաստան) Սուրբ Խաչ եկեղեցու պատարագին կմասնակցի մոտ 6000 հայ, սակայն այս թիվը կարելի է չափազանցված համարել, քանի որ Հայաստանի տուրիստական գործակալությունների տվյալներով` Աղթամար գնացող հայերի թիվը չի գերազանցի մի քանի հարյուրը:
10-րդ դարում կառուցված հայկական Սուրբ Խաչ եկեղեցին 2007-ին վերակառուցվել է Թուրքիայի իշխանությունների կողմից որպես թանգարան, իսկ 2010 թ. գարնանը Թուրքիայի կառավարությունը հայերին արտոնել է տարին մեկ անգամ պատարագ մատուցել եկեղեցում:
Հայաստանում Աղթամար գնալ-չգնալու հարցը թեժ քննարկումների առարկա է: Արդեն հայտնի է, որ Մայր Աթոռ Սուրբ Էջմիածինը հրաժարվել է պատարագին մասնակցելուց, քանի որ Թուրքիայի իշխանությունները, չնայած նախօրոք արված հայտարարություններին, եկեղեցու գմբեթին խաչ չեն տեղադրելու:
Աղթամար չգնալու կողմնակիցները նշում են, որ սա Թուրքիայի կողմից իրականացվող հերթական շոուն է, որի նպատակը հանդուրժողականության և մարդու իրավունքներին վերաբերող հարցերում միջազգային հանրության առաջ Թուրքիայի վարկանիշը բարձրացնելն է:
Արևմտյան Հայաստան տուրիստական ուղևորություններ կազմակերպող մի քանի տուրիստական գործակալություններ կան: Դրանցից մեկի` «Նարեկավանք» տուրիստական գործակալության տնօրեն Աշոտ Սողոմոնյանն «ԱրմենիաՆաուին» տեղեկացրեց, որ պատարագին մասնակցելու համար գործակալություն մոտ 200 հոգի է դիմել, սակայն դեռ չեն որոշել` ուղևորություն կազմակերպե՞լ, թե՞ ոչ:
«Մեր որոշումը կախված է մեր պետության որոշումից. եթե պետությունն ասի` թող գնան, մենք կկազմակերպենք այդ ուղևորությունը, եթե ոչ` չենք կազմակերպի, քանի որ մենք էլ պետության մի մասնիկն ենք»,- ասում է Սողոմոնյանը` ավելացնելով, որ բացասական արձագանքներից հետո դեռ չգիտի, թե քանիսը կուզեն Աղթամար գնալ:
«Իմեգա թուր էնդ թրեվլ» գործակալության տնօրեն Կարեն Անտաշյանն էլ ասաց, որ իրենք 5-օրյա ուղևորություն են կազմակերպում պատարագին մասնակցել ցանկացող մոտ 10 հոգանոց խմբի համար, որն արժի 450 դոլար:
Պատարագին կմասնակցեն նաև տասը հայ լրագրողներ, որոնք Թուրքիա կմեկնեն «Հրանտ Դինք» հիմնադրամի կողմից ֆինանսավորվող «Հայ-թուրքական լրագրողական փոխանակման» ծրագրի շրջանակներում:
English
Հայերեն
ՎԵՐԵՎ 
Readers' comments
Read commented Article
Post a comment
Read all 2 comments
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.