Երևանում սեպտեմբերի 14-ից մեկնարկել է «Ռեանիմանիա» անիմացիոն ֆիլմերի միջազգային փառատոնը, որին ներկայացված են 320 անիմացիոն ֆիլմեր` 40 երկրներից:

«Կյանքը պատկեր է, կենդանացրե´ք այն» կարգախոսով փառատոնը, որը նպատակ ունի աջակցելու Հայաստանում անիմացիոն ֆիլմերի արտադրության զարգացմանը, անցկացվում է արդեն երրորդ անգամ և կտևի մինչև սեպտեմբերի 19-ը:

Չորեքշաբթի տեղի ունեցավ փառատոնի բացումը, իսկ հինգշաբթի մեկնարկեց «Հայկական ներկապակ» ծրագիրը` նվիրված հայ անիմատորներ Աբրահամ Սահակյանի հիշատակին և Նաիրա Մուրադյանի 50-ամյակին: Հինգշաբթի երեկոյան «Հայկական ներկապնակի» շրջանակներում «Նարեկացի» արվեստի միությունում ցուցադրվեց Սահակյանի վերջին` «Արա Գեղեցիկ և Շամիրամ» կարճամետրաժ մուլտֆիլմը:

Փառատոնի ծրագրերի ղեկավար Րաֆֆի Մովսիսյանը հինգշաբթի լրագրողների հետ հանդիպմանն ասաց, որ հայկական ծրագիրը բավականին հագեցած է:

«Դրանք հիմնականում արտամրցութային ծրագրեր են, քանի որ Հայաստանում անիմացիան այնքան էլ զարգացած չէ, որ ունենանք մրցութային հագեցած ծրագիր: Ցավով պետք է նշեմ, որ մրցութային բավական քիչ ֆիլմեր կան»,- ասաց Մովսիսյանը:

Իսկ ավելի ստույգ` փառատոնի մրցութային ծրագրին մասնակցում են ընդամենը երեք կարճամետրաժ հայկական անիմացիաներ, որոնցից մեկը, Մովսիսյանի հավաստմամբ, ստեղծվել է ոչ պետական հատկացումներով, հենց հեղինակի ուժերով է կյանքի կոչվել:

Արեգ Մկրտչյանի, Հրո Լազարյանի, Աշոտ Հարությունյանի «Բայ-բայ» յոթ րոպեանոց անիմացիան «Ռոբբի» անունով լապտերիկի մասին է, որը զերծ է մնացել ուրբանիզացման ճանկերից, սակայն զոհ է դառնում անսիրտ մարդկանց ավերիչ ու կործանիչ գործունեությանը: Երևանի ներկայիս կառուցապատումը հաշվի առնելով` անիմացիան շատ հեշտ է կապել հայաստանյան իրականության հետ, սակայն այն նաև մի փոքր հիշեցնում է ամերիկյան «Ուոլլ-Ի» անիմացիոն ֆիլմը:

Մյուս երկու ֆիլմերը` Նաիրա Մուրադյանի «Մի անգամ մի օրը» և Նարեկ Սաֆարյանի «Երևակայության ճանապարհորդությունը», համապատասխանաբար 12 րոպեանոց և 53 վայրկյանանոց անիմացիաներ են:
Փառատոնի շրջանակներում վարպետության դասեր կանցկացվեն երիտասարդ անիմատորների համար: Կա նաև մանկական ծրագիր:

Կինոթատրոններում տոմսերի արժեքը կտատանվի 500-1000 դրամի (մոտ 1,3-2,6 դոլար) սահմաններում: Կլինեն նաև բացօթյա ցուցադրություններ:

Փառատոնի հիմնադիր Վրեժ Քասունին նշում է, որ չնայած փառատոնի հաջողությանը` «Ռեանիմանիան» ֆինանսավորման լուրջ խնդիր ունի։

«Բոլորը ողջունում են մեզ, ասում են` շատ մեծ գործ եք անում, դրա համար զարմանում ենք, թե մեր բիզնեսմեններն ինչի՞ն են սպասում: Ասեմ մի բան, որ երևի արդեն պետք է բարձրաձայն խոսվի: Շատերը մեզ ասում են` եթե վարչապետը մեզ զանգի, գումար կտանք։ Ու դա մեզ ահագին նեղացնում է, որովհետև սա քաղաքական գործունեություն չէ, սա մշակութային և բիզնես գործունեություն է։ Մեզ կապում են քաղաքական գործիչների հետ, ու դա մեզ զարմացնում է»,- ասում է Քասունին: