Մեծ ժողովրդականություն վայելող հումորային «Կարգին հաղորդումը» արդեն մի քանի շաբաթ` չի հեռարձակվում` հեռուստադիտողների մոտ ենթադրությունների տեղիք տալով, որ հաղորդման բովանդակությունը չի համապատասխանում Հեռուստատեսության և ռադիոյի ազգային հանձնաժողովի չափորոշիչներին:

ՀՌԱՀ չափորոշիչների համաձայն`հեռուստաընկերությունները չպետք է հեռարձակեն հաղորդումներ, որոնք բացասական ազդեցություն են թողնում անչափահասների առողջության, մտավոր և ֆիզիկական զարգացման ու կրթության վրա: (Հաղորդումները մոնիթորինգի են ենթարկվելու, որպեսզի չպարունակեն թմրամիջոցներ և ալկոհոլ օգտագործելու կադրեր, հոգևոր և մշակութային արժեքները նսեմացնող նյութեր, ազգի երախտավորների նսեմացում և վարկաբեկում, ծնողների և դաստիարակների հեղինակազրկում, հանցագործների հերոսացում և ռոմանտիզացիա, գռեհկաբանություն և հայհոյախոսություն և այլն:)

Այս բոլոր արգելված չափորոշիչներն առկա են նախկինում հեռարձակվող «Կարգին հաղորդման» մեջ, որոնք մի քանի րոպեանոց զվարճալի դրվագների տեսքով պարբերաբար հայտնվում էին հեռուստաէկրանին: ( www.kargin.am )

Սակայն ըստ հաղորդման դերասաններ Մկոյի և Հայկոյի` հաղորդման հեռարձակման դադարեցումը կապ չունի գրաքննության հետ:

«Կարգին հաղորդումն» հետագայում անպայման շարունակվելու է,- «ԱրմենիաՆաուին» ասաց Մկրտիչ Արզումանյանը (Մկոն): - Իսկ այժմ աշխատանքները դադարեցրել ենք, քանի որ ունենք նոր սերիալի նախագիծ, որը ստեղծելու համար մեզ անհրաժեշտ է մեկ ամիս»:

Ըստ դերասանի` սա լինելու է «սիտկոմ» ոճի սերիալ (կոնկրետ իրադարձությունների հիման վրա հումորային հեռուստասերիալի ժանր), որում մեծ թվով դերասաններ են ներգրավված լինելու: