Վրացական եկեղեցական վերնախավն ու Վրաստանի հուշարձանների պահպանության ոլորտի պատասխանատու պետական մարմինները նպատակ ունեն քանդելու Ախալցխայի Երևման Սբ Խաչ եկեղեցին (7-րդ), որը գտնվում է քաղաքի Ռաբաթ թաղամասում, և տեղում կառուցել վրաց կաթոլիկ եկեղեցի:

Այդ նպատակով Ախալցխա են ժամանել մի շարք մասնագետներ և բանվորներ: Տեղի հոգևոր հովիվ Տեր Մանուկ քահանա Զեյնալյանը նշում է, որ իրենք տեղի բնակչության ներկայացուցիչների հետ բանվորներին փորձում են բացատրել, որ դա հայկական եկեղեցի է, որ նրանք իրավունք չունեն այն վերափոխելու: Բանվորները պատասխանել են, թե` մենք այդ ամենը չգիտենք, մեզ հրահանգել են այն, ինչ հիմա մենք անում ենք:

Տեր Մանուկ քահանա Զեյնալյանի վկայությամբ` «քանդելու նպատակով փորել են եկեղեցու մեկ խորանը, որտեղից դուրս են եկել հայատառ արձանագրություններով չորս քարեր, որոնցից մեկն արդեն անհետացել է: Ներկա պահին քանդված է նաև մի կամար: Ախալցխահայության պահանջն է, որ անմիջապես դադարեցվի հայ կաթողիկե այս եկեղեցու քանդումն ու վրացականացումը: Այն հայկական է և պատկանում է հայությանը»:

Խնդիրը քննելու նպատակով Ախալցխա է ժամանելու Վիրահայ թեմի առաջնորդ Վազգեն եպիսկոպոս Միրզախանյանը:

Ի գիտություն. Այս նյութը, ինչպես նաև այս խորագրի ներքո ներկայացվող «ԱրմենիաՆաուի» մյուս նյութերը հրապարակվում են անփոփոխ: «ԱրմենիաՆաուն» պատասխանատվություն չի կրում բովանդակության և թարգմանության համար: