Երևանում անցկացվում է «Արևելյան գործընկերություն. զարգացումների ներքաղաքական և եվրոպական համատեքստը» խորհրդաժողովը, որը կազմակերպվել է Հայաստանում Եվրամիության առաքելության աջակցությամբ: Խորհրդաժողովին մասնակցում են Վրաստանի, Չեխիայի, Թուրքիայի, եվրոպական և միջազգային կազմակերպությունների ներկայացուցիչները:

ՀՀ ԱԳ նախարար Էդվարդ Նալբանդյանը խորհրդաժողովում ելույթ ունենալիս նշել է, որ եվրոպական եվրոպական ուղղությունը եղել է Հայաստանի արտաքին քաղաքական առաջնայնություններից մեկը: Նա հիշեցրել է նախագահի խոսքերն այն մասին, որ թեև Հայաստանի արտաքին քաղաքական օրակարգում չկա Եվրամիությանը լիարժեքորեն անդամակցելու հարց, բայց խաղի եվրոպական կանոնները, եվրոպական չափանիշները պետք է առավելագույնս տեղայնացվեն ու ներդրվեն մեր երկրում:

Ընդհանուր առմամբ խորհրդաժողովում խոսվել է այն մասին, որ Եվրոպան այսուհետ էլ կաջակցի Հայաստանում բարեփոխումներին: Ընդ որում, Հայաստանում ԵՄ դեսպան Ռաուլ դե Լուցենբերգերն ընդգծել է երկրում դրական տեղաշարժերը:

«Հայաստանը առաջիկայում հնարավորություն կունենա առանձնանալ երկրի խորհրդարանական և նախագահական ընտրական գործընթացներում: Դրանք լավ ցուցանիշ կդառնան Հայաստանում առաջընթացը երևան հանելու հարցում»,- նշել է ԵՄ դեսպանը: Նա միևնույն ժամանակ ընդգծել է Հայաստանին ԵՄ ոչ այնքան տնտեսական, որքան քաղաքական աջակցության կարևորությունը:

ԱԳ նախարար Նալբանդյանը նշել է, որ Արևելյան գործընկերության շրջանակներում եվրոպական կառույցները Հայաստանի բարեփոխումներին տեխնիկական և ֆինանսական օգնություն են ցուցաբերում: Նա ողջունել է Եվրոպայի առաջ քաշած «ավելի շատ աջակցություն` ավելի շատ բարեփոխումների դիմաց» սկզբունքը:

Նալբանդյանն ընդգծել է, որ մշակվում է Հայաստան-Եվրամիություն ասոցացման համաձայնագրի տեքստը, որի կարևոր մաս են կազմելու խոր և համապարփակ ազատ առևտրի գոտի ստեղծելու վերաբերյալ դրույթները:

Այս կապակցությամբ Գերմանիայի դեսպան Հանս Յոհան-Շմիդտն ընդգծել է հայ-թուրքական սահմանի բացման կարևորությունը` որպես ազատ առևտրի համատեքստում առևտրի զարգացման խթան: Նա ասել է, որ տնտեսական ինտեգրումը նոր զարգացումներ կբերի, որոնցից չպետք է վախենալ:

Նշենք, որ հոկտեմբերին Հայաստանը համաձայնագիր է ստորագրել ԱՊՀ ազատ առևտրի գոտի մտնելու մասին: Հայաստանի եվրոպացի գործընկերները չեն փորձել վիճարկել այդ իրավունքը` միայն նշելով, որ դա չի խանգարի Հայաստանին ԵՄ-ի հետ ազատ առևտրի գոտի մտնելուն, քանի որ առևտուրն իրականացվելու է Առևտրի համաշխարհային կազմակերպության (ԱՀԿ) կանոններով:

Մինչ այդ, հայտնի է դարձել, որ Եվրամիությունը Արևելյան գործընկերության երկրներին, այդ թվում նաև` Հայաստանին 2012-2013 թվականների համար տարածաշրջանային զարգացման պիլոտային ծրագրով 70 մլն եվրո է հատկացրել (շուրջ 95,3 մլն դոլար): Շուտով կմեկնարկի նաև Գյուղատնտեսական և գյուղական վայրերի զարգացման եվրոպական հարևանության ծրագիրը: ԵՄ ընդլայնման հարցով հանձնակատար Ստեֆան Ֆյուլն ասել է, որ այս ոլորտում 2007-2013 թթ. ֆինանսավորման ծրագիրը կազմում է 400 մլն եվրո (շուրջ 545 մլն դոլար):

Իսկ Եվրոպայում իրավիճակը կրիտիկականին մոտ է: Հրաժարական են ներկայացրել Հունաստանի և Իտալիայի վարչապետները: Իսկ Ֆրանսիան և Գերմանիան խորհրդակցություններ են սկսել եվրագոտու վերակազմավորման հարցով: Արտարժույթի դաշինքից կարող է դուրս գալ ոչ միայն Հունաստանը, այլև կոշտ բյուջետային կարգապահության չափանիշներին չհամապատասխանող բոլոր երկրները: Եվրոյի փլուզումը սպառնում է ոչ միայն եվրոպական երկրներին, այլև Արևելյան գործընկերության ծրագրի շահառուներին: Սակայն Եվրոպան, չնայած դժվարություններին, չի հրաժարվում աջակցել Հարևանության քաղաքականությանը: