Հայաստանի տնտեսության 2010 թ. զարգացման կառավարության ծրագրին ընդդիմության ու իշխանության տված գնահատականները տրամագծորեն տարբերվում են` հուսադրող լավատեսականից մինչև արմատական հոռետեսական:

Հունվարի 27-ին «Հայացք» ակումբում ՀՀ ֆինանսների փոխնախարար Վարդան Արամյանը, ԱԺ ֆինանսավարկային և բյուջետային մշտական հանձնաժողովի նախագահ Գագիկ Մինասյանն ու հանձնաժողովի անդամ, ընդդիմադիր Արա Նռանյանը, ամփոփելով 2009-ի տնտեսական արդյունքները, 2010-ի համար տարբեր կանխատեսումներ արեցին:

Վարդան Արամյանը, օրինակ` հայտարարեց, որ 2010-ի բյուջեով նախատեսված 1,2 տոկոս տնտեսական աճն իրականում ավելի բարձր կլինի:

«1,2 տնտեսական աճ սահմանելով` մենք իրականում պահպանողական քաղաքականություն ենք վարում, քանի որ շարունակվող հակաճգնաժամային քաղաքականությանը հետևելով` մենք ավելի լավ ցուցանիշներ ենք ակնկալում»,- նշեց ֆինանսների փոխնախարարը:

Անցյալ տարին տնտեսական առումով ծանր գնահատելով` Գագիկ Մինասյանը նշեց, որ կառավարությունը հաջողությամբ իրականացրեց հակաճգնաժամային ծրագիրը` սոցիալական ծախսերը չկրճատելով ու տնտեսությունը դիվերսիֆիկացնելու փորձերով:

«Մեր տնտեսության խոցելիության պատճառ հանդիսացող ցածր դիվերսիֆիկացվածությունը կառավարությունը փորձեց վերացնել` շարունակելով պայքարը ստվերի դեմ, ներդրումներ նախապատրաստելով ադամանդագործության ոլորտում: Իհարկե, ներդրումներ եղան նաև դիվերսիֆիկացման ցածր մակարդակի մեղավոր երկու ոլորտներում` շինարարություն ու հանքարդյունաբերություն, քանի որ այստեղ ներդրումները մուլտիպլիկացիոն էֆեկտ են ունենում»,- նշեց Մինասյանը:

2009-ին Հայաստանի տնտեսությունը 14,4 տոկոս տնտեսական անկում էր արձանագրել 2008-ի համեմատ, այդ թվում` շինարարությունը` 37,4 տոկոս, արդյունաբերությունը` 7,8 տոկոս:

Կառավարության` տնտեսության դիվերսիֆիկացմանն ուղղված 2010-ի ծրագրերից մեկը, ըստ Վարդան Արամյանի, ռուսական 100 մլն դոլար վարկի զգալի մասը ադամանդագործության ոլորտում ներդնելն է:

Արա Նռանյանը, սակայն, այս և մյուս քայլերը բավարար չի համարում.

«Ներկայումս տնտեսության դիվերսիֆիկացման համար կառուցվածքային որակական փոփոխություններ չեն արվում: Արդյունքում 2010-ի վերջին մենք տնտեսությունում ունենալու ենք նույն պատկերը, ինչ ունեինք վերջին տարիներին ու այս տարի, ինչպես օրինակ` ներմուծում-արտահանում հարաբերությունում, տեղական արտադրողին աջակցելու գործում: Կառավարությունը ձեռք բերած վարկերով ոչ մի նոր, այսպես կոչված` հակաճգնաժամային ծրագիր չի իրականացնում, այլ շարունակում է մինչև ճգնաժամն ունեցած ծրագրերը»,- նշեց Նռանյանը: