Երևանի «Զվարթնոց» օդանավակայանի հարակից տարածքում կսկսի գործել ազատ տնտեսական գոտի, որը, ինչպես ակնկալվում է, կխթանի տեղական գյուղմթերքների արտադրությունը և դրական ազդեցություն կունենա օդանավակայանի հարակից տարածքի տնտեսական կյանքի վրա:

«Զվարթնոց» օդանավակայանի հարակից տարածքում գործունեություն ծավալող ընկերությունները կազատվեն շահութահարկից, մաքսային տուրքերից, ավելացված արժեքի հարկից ու միայն եկամտահարկ կվճարեն:

Ինչպես տեղեկացրեց ՀՀ էկոնոմիկայի նախարարության արդյունաբերության վարչության պետ Հայկ Միրզոյանը, Հայաստան հրավիրված հոլանդացի փորձագետի օգնությամբ արդեն մշակվել է ազատ տնտեսական գոտու լոգիստիկ կենտրոնի բիզնես մոդելը: Ներկայումս աշխատանքներ են կատարվում ազատ տնտեսական գոտիների մասին օրենքի մշակման ուղղությամբ:

Ազատ տնտեսական գոտու ստեղծման հայեցակարգը ՀՀ կառավարությունն ընդունել է դեռ 2008 թ. նոյեմբերին: Փաստաթուղթը մշակվել էր` հիմք ընդունելով ՀՀ կառավարության ծրագրով ամրագրված` երկրի պարենային անվտանգության ապահովման և գյուղական աղքատության կրճատման տեսանկյունից գյուղատնտեսության առանցքային դերը: Հայեցակարգի համաձայն` գյուղատնտեսության զարգացումը պետք է ընթանա գյուղատնտեսության արդյունաբերականացման և արտադրություն-վերամշակում-շուկա շղթայի լիարժեք գործարկմամբ, որը հնարավորություն կտա ավելացնելու գյուղացիական տնտեսությունների եկամուտները:

Ըստ Միրզոյանի` մինչև այժմ բավական աշխատանքներ են իրականացվել, և ծրագրի գործարկման արդյունքում գյուղմթերքների արտահանման ծավալները, համաձայն իրենց կանխատեսումների` կաճեն տարեկան 20 տոկոսով: (2009-ին Հայաստանից արտահանվել է 19 մլն դոլարի գյուղմթերք):

«Մենք ունենք բավական որակյալ գյուղարտադրանք, սակայն ունենք նաև արտահանման մեծ խնդիրներ, ինչպես նաև գյուղացիական տնտեսություններում ենթակառուցվածքների պակաս»,- նշեց Միրզոյանը:

Ծրագրով նախատեսվում է հանրապետության գյուղական շրջաններում ստեղծել մթերքի հավաքման պիլոտային կետեր, որպեսզի գյուղացիները կարողանան արագ պահեստավորել իրենց արտադրանքը, ապա վաճառել արտահանողներին: Օդանավակայանի տարածքում կլինեն պահեստավորման ու փաթեթավորման կետեր, որտեղից էլ գյուղմթերքը օդանավերով կարտահանվի դրսի շուկաներ: Միրզոյանը տեղեկացրեց, որ արդեն ստեղծվել են գյուղմթերքների հավաքման երեք կետեր: Նա նաև նշեց, որ արդեն բավական մեծ թվով ընկերություններ, նույնիսկ ոչ տեղական, ցանկանում են ազատ տնտեսական գոտում արտահանում իրականացնել:

«Գյուղացին ինքն է որոշում` ում վաճառել իր արտադրանքը: Բոլորն էլ կարող են գյուղացուց գնել արտադրանքը և արտահանել: Դա չի նշանակում, որ մեր գյուղմթերքն արտահանվելու է միայն օդանավով: Ունենք նաև այլ ուղիներ»,- ասաց Միրզոյանը` վստահեցնելով, որ մրցակցություն կլինի, և ազատ տնտեսական գոտում գյուղմթերքների արտահանումը չի մոնոպոլացվի:

Կենտրոնական բանկի նախկին նախագահ, տնտեսագետ Բագրատ Ասատրյանն «ԱրմենիաՆաուին» ասաց, որ իր կարծիքով` ազատ տնտեսական գոտու այս նախագիծը մեծ ազդեցություն չի ունենա գյուղատնտեսության զարգացման վրա:

«Իհարկե, ծրագիրը ոլորտը մի քիչ կաշխուժացնի, բայց տնտեսական մեծ էֆեկտ չի ունենա»,- ասում է Ասատրյանը: