Ռուս-վրացական սահմանին գտնվող միակ ավտոմոբիլային անցակետը` «Վերին Լարսը», երեք տարի փակված մնալուց հետո վերաբացվեց: Անցակետը փակվել էր 2006 թ. ռուսական կողմի որոշմամբ` վերանորոգման աշխատանքների պատրվակով: Սեպտեմբերին Վրաստանն ԱՄՆ 2,5 մլն դոլար ֆինանսական աջակցությամբ ավարտեց «Կազբեգի» ժամանակակից սահմանային անցակետի շինարարությունը:

Ռուսաստանի և Վրաստանի քաղաքացիները սահմանը կարող են հատել վիզայով, որոնք կարող են ստանալ Մոսկվայում և Թբիլիսիում Շվեյցարիայի դեսպանատներից: ԱՊՀ երկրների, այդ թվում` Հայաստանի քաղաքացիների համար բավական է ունենալ արտասահմանյան անձնագիր: Տվյալ հանգամանքը շատերին հնարավորություն տվեց պնդելու, որ անցակետի բացումն ավելի ձեռնտու է Հայաստանին, քան Վրաստանին:

Անցակետի բացումը ողջունեցին թե´ Մոսկվայում, թե´ Թբիլիսիում և թե´ Արևմուտքում: Մարտի 3-ին Իսպանիայի արտաքին գործերի և համագործակցության նախարար, Եվրամիության գործող նախագահ Միգել Անխել Մորատինոսն այցելեց անցակետ և բացումը գնահատեց որպես «դրական երևույթ»: Ընդ որում, անպայման հիշատակվում է Հայաստանը, որը որպես միջնորդ քաղաքական շահաբաժիններ շահեց:

Վրաստանի և Ռուսաստանի միջև բանակցություններն անցան Շվեյցարիայի միջնորդությամբ: Սակայն, Վրաստանի արտգործնախարարի տեղակալ Նինո Կալանդաձեն մարտի 1-ին հայտարարեց, որ «Վերին Լարս» անցակետի բացումը, ընդ որում` սեղմ ժամկետներում, տեղի է ունեցել Հայաստանի իշխանությունների խնդրանքով:

Miacum.ru կայքը գրում է, որ անցակետի բացումը վկայում է Հայաստանի նախաձեռնողական արտաքին քաղաքականության մեկ այլ ձեռքբերման մասին ևս: Նույն աղբյուրի հաղորդմամբ` կարելի է արձանագրել, որ ռուս-վրացական համաձայնությունը կայացավ նաև անձամբ ՀՀ նախագահ Սերժ Սագսյանի ներդրման և ջանքերի շնորհիվ:

Անցակետի բացումից մեկ օր առաջ Սարգսյանը մասնավոր այցով գտնվում էր Վրաստանում:

«Իհարկե, Հայաստանն վարժել է առանց «Վերին Լարս» անցակետի յոլա գնալուն և հարմարվել դրան: Սակայն, աներկբայորեն, անցակետի բացումը կկրճատի բեռնափոխադրումների ծախսերը»,- ասում է քաղաքագետ Ալեքսանդր Իսկանդարյանը:

Հայաստանի Արդյունաբերողների և գործարարների և միության (ՀԱԳՄ) նախագահ Արսեն Ղազարյանը հատկապես կարևորեց տարանցման արագությունը, մասնավորապես, գյուղատնտեսական ապրանքների, այդ թվում` բանջարեղենի, ծիրանի, դեղձի և խաղողի համար, որոնց արտահանումն սկսվում է գարնան վերջին: «Այս բեռնատեսակները տեղափոխվում են սառնարանային ռեժիմ պահանջող մեքենաներով, և որքան արագ են տեղ հասնում, այնքան նրանց որակը լավ է պահպանվում»,- պարզաբանեց նա:

Ղազարյանը հայտարարեց, որ անցակետի բացումը բեռների փոխադրումը կէժանացնի 20-25 տոկոսով: «Եթե մինչև այժմ բեռնատար մեքենան կարող էր Ռուսաստան մեկ չվերթ կատարել, քանի որ ճանապարհի մի մասը բեռնափոխադրումն իրականացվում էր լաստանավով, ապա այժմ մեքենան Ռուսաստան կհասնի երկու շաբաթում [օգտագործելով ցամաքային սահմանը]»,- ասաց ՀԳԱՄ-ի նախագահը: