Հայաստան այլ երկրներից, մասնավորապես` Վրաստանից սեփական օգտագործման համար ավտոմեքենաներ ներմուծող անհատ մարդիկ դժգոհում են կառավարության հավանությանն արժանացած այն օրենսդրական նախաձեռնությունից, ըստ որի` նախատեսվում է ֆիզիկական անձանց արգելել գրանցել ավտոմեքենան որպես ժամանակավոր ներմուծում:

Այս նախաձեռնությամբ ՀՀ կառավարության վերջին նիստի ընթացքում հանդես է եկել ՀՀ պետեկամուտների կոմիտեի նախագահի տեղակալ Արմեն Ալավերդյանը, որը նշել է, թե 2009 թ. 7 ամիսների ընթացքում ժամանակավոր ներմուծման ռեժիմով 32 հազար ավտոմեքենա է գրանցվել, իսկ այս տարի` 44 հազար, քանի որ դրանց տերերը մաքսազերծման համար անհրաժեշտ զգալի վճարումներից խուսափելու պատճառով գերադասում են մեքենաները գրանցել որպես «ժամանակավոր ներմուծված»։

Ըստ ՀՀ գործող օրենքի` ավտոմեքենա ներմուծող քաղաքացին 10 օր է ունենում ավտոմեքենան մաքսազերծելու ու գրանցելու համար, որը կազմում է մեքենայի շուկայական արժեքի շուրջ 32 տոկոսը։ Իսկ եթե մեքենան գրանցվում է որպես «ժամանակավոր», ապա հարկ չի գանձվում, և քաղաքացուն թույլատրվում է առանց մաքսազերծման մեքենան 30 օր պահել Հայաստանում: Ոմանք, օգտագործելով օրենքի այս բացը, կարողանում են անորոշ ժամկետով մեքենան պահել Հայաստանում առանց մաքսազերծման: Եվ քանի որ Վրաստանի սահմանը մոտ է, քաղաքացին, մեքենան հարևան երկիր տանել-բերելով, թարմացնում է իր փոխադրամիջոցի «ժամանակավոր» կարգավիճակը:

33-ամյա Ռուբեն Աբրահամյանը մեկն է այն մարդկանցից, որն ավտոմեքենան ներմուծել է Վրաստանից դեռ 2007 թ. և օգտվել այս տարբերակից` ծանր հարկից խուսափելու համար: Նա երեք տարի առաջ մեքենան ձեռք է բերել Վրաստանից 3000 դոլարով, սակայն ասում է, որ այն Հայաստանում գնահատում են մոտ 4500 դոլար, այսինքն` Աբրահամյանը ստիպված կլինի մեքենայի համար, որպես հարկ, վճարել գրեթե այն գումարի կեսը, որքանով գնել է իր փոխադրամիջոցը:

«Եթե այս օրենքը գործեց, այն առաջին հերթին վնասելու է միջին խավին, բայց իրականում այնպես պետք է անել, որ գները մեր խավի համար իջեցվեն, և օրենքը գործի միայն 80.000-150.000 դոլար արժողությամբ ավտոմեքենաները ներմուծելու դեպքում, որոնք պետք է օրինական դաշտ մտցնեն»,- «ԱրմենիաՆաուին» ասում է Աբրահամյանը:

Օրինագիծն արժանացել է ՀՀ կառավարության հավանությանը և քննարկման կդրվի Ազգային ժողովում: