Հայաստանի տարբեր շրջաններում գտնվող խմբագրատները տեղեկություններ են ստանում լարված ընտրական օրվա մասին…

• Սոցիալ-դեմոկրատ հնչակյան կուսակցության ատենապետ Լյուդմիլա Սարգսյանը հայտնել է «ԱրմենիաՆաուին», որ Աբովյան քաղաքում ընդդիմադիր թեկնածու Լևոն Տեր-Պետրոսյանի երկու վստահված անձանց մտցրել են մեքենա, տարել քաղաքից դուրս ու բաց թողել:

• Կապանում «ԱրմենիաՆաուի» թղթակիցը համազգեստով ոստիկաններ է տեսել թիվ 38/02 և 38/05 ընտրատեղամասերում, մինչդեռ ոստիկաններն իրավունք չունեն լինել ընտրատեղամասում` առանց հանձնաժողովի նախագահի հրավերի:

Երեկոյան հեռուստատեսությամբ հաղորդված մամուլի ասուլիսի ընթացքում Հայաստանի Հանրապետության ոստիկանության մամուլի խոսնակ Սայաթ Շիրինյանը հայտարարել է, որ իրենք քննել են իշխող Հայաստանի հանրապետական կուսակցությանը ներկայացված մեղադրանքները և քննություն սկսելու հիմքեր չեն գտել:

Իսկ Լևոն Տեր-Պետրոսյանի կողմնակիցների` ենթադրաբար հրահրած բռնությունների մեղադրանքներում հանցակազմ և նախաքննություն սկսելու հիմքեր գտել են:

Ճիշտ այդպես էլ Եվրոպայի անվտանգության և համագործակցության կազմակերպությունը (ԵԱՀԿ) հայտարարել է, թե ընտրությունները «հիմնականում համապատասխանել են երկրի ստանձնած միջազգային պարտավորություններին»:

Երկու խոշոր դիտորդական առաքելություններն այսօր հրապարակել են իրենց նախնական զեկույցները, որոնք բնավ համահունչ չեն այն տեղեկություններին, որոնք երեկ ստացվում էին ընտրատեղամասերից` ենթադրաբար վկայելով զանգվածային ընտրախախտումներ:

Շաբաթավերջին և ընդդիմության ներկայացուցիչ Լևոն Տեր-Պետրոսյանը, և իշխող կուսակցության առաջնորդ Սերժ Սարգսյանը մարդաշատ հանրահավաքներ անցկացրին Ազատության հրապարակում, որոնք ավարտվեցին քայլերթով դեպի Հանրապետության հրապարակ: Թեև երկու հանրահավաքների մասնակիցների թիվն էլ կազմակերպիչներն անիրատեսորեն բարձր էին ներկայացնում, ըստ «ԱրմենիաՆաուի» մոտավոր հաշվարկի` մասնակիցների թիվը երկուսում էլ մոտ 40.000 էր:

Ի պատասխան լրագրողների հարցին` թե ով է հաղթելու, վարչապետը կատակել է. «Այնպիսի տպավորություն է, թե հենց նոր եք ժամանել Հայաստան, որովհետև ես քանիցս ասել եմ, թե ով է հաղթելու»:

Իսկ մեղադրանքների վերջին փուլն այս տեսքն ունի…

• Ըստ Հայաստանի հելսինկյան կոմիտեի նախագահ Ավետիք Իշխանյանի` Գյումրու «ԳԱԼԱ» հեռուստատեսության օպերատորը նկարահանել է, թե ինչպես են կաշառում ընտրողներին, որից հետո փող բաժանող կինը հարձակվել է նրա վրա:

Ըստ վերլուծաբան Ռիչարդ Կիրակոսյանի` Հայաստանի նախագահի ընտրություններին ԱՄՆ պետքարտուղարության որոշ ներկայացուցիչների առաջին և ոչ պաշտոնական արձագանքը «զարմանքն ու վրդովմունքն» է:

Կիրակոսյանը, որի հոդվածները հաճախ են լույս տեսնում «ԱրմենիաՆաու» շաբաթաթերթում և «Ազատություն» ռադիոկայանի կայքում, և որը խորհրդատվություն է տրամադրում մի շարք միջազգային կազմակերպությունների, այդ թվում` ԵԱՀԿ-ին, ապրում է Երևանում, սակայն ներկայումս մեկնել է գործուղման Վաշինգտոն:

Սակայն քչերը կարող էին կանխատեսել, որ ընտրողների ակտիվությունը կգերազանցի բոլոր ակնկալիքները և գրեթե կհասնի (կամ նույնիսկ կգերազանցի)` 1991 թ. Հայաստանի նախագահի առաջին ընտրություններում գրանցված ցուցանիշին (խորհրդային իշխանությունների կողմից հիրավի ժողովրդավարական ընտրություններից զրկված լինելու տասնամյակներից հետո): (90-ականների սկզբին նախկին սոցիալիստական ճամբարի բոլոր երկրներում ընտրատեղամասերում հերթեր էին գոյանում:)

Այսօր ամպամած, սակայն ձմռան համար բավական մեղմ եղանակին, հայաստանցի ընտրողները գնում են ընտրատեղամասեր` հինգերորդ անգամ հանրապետության նախագահ ընտրելու:

Նախագահ Ռոբերտ Քոչարյանը, որն ավարտում է իր պաշտոնավարումը մայիսին, խոստացել է, որ ընտրությունների ընթացքում կապահովվեն հավասարապես արդար պայմաններ: Եթե նա կատարի իր այդ խոստումը, ապա դա կլինի առաջինը վերջին առնվազն չորս նախագահական ընտրություններում, երբ Հայաստանը կբավարարի «ազատ ու արդար» միջազգային չափանիշները: