Երևանցիներն այս տարի զարմանքով են նկատում, որ նախընտրական շրջանում Երևանը օր օրի ավելի մաքուր ու «կանաչ» է դառնում: Շատերի գնահատմամբ` մայիսի 31-ին նախատեսված քաղաքի ավագանու ընտրություններից առաջ Հայաստանի հանրապետական կուսակցությունը (ՀՀԿ) այդպես փորձում է բարձրացնել իր և կուսակցության համամասնական ցուցակում առաջին տեղը զբաղեցնող ներկայիս քաղաքապետի վարկանիշը: Որոշ ընդդիմադիր լրատվամիջոցների գնահատմամբ` կանաչապատման և բարեկարգման աշխատանքները կատարվում են բյուջետային ռեսուրսների հաշվին, սակայն` նախընտրական նպատակներով:

Ապրիլի 1-ից Երևանի քաղաքապետարանը սկսել է քաղաքի կանաչապատման, թաղային համայնքների բակային տարածքների մաքրման և բարեկարգման, ասֆալտապատման, էլեկտրասյուների տեղադրման, հների վերականգնման, նոր լապտերների տեղադրման և բակային տարածքներում ոռոգման համակարգերի վերականգնման և կառուցման աշխատանքներ:

Համաձայն Երևանի քաղաքապետարանի տրամադրած տվյալների` Երևանի բոլոր համայնքներում ձևավորվել և երիտասարդացվել է 4100 ծառ: Ինչպես տեղեկացրեց քաղաքապետարանի բնապահպանության վարչության պետի տեղակալ Սուրեն Մաքսապետյանը` գարնանային ծառատունկի ընթացքում մայրաքաղաքի կանաչ տարածքները համալրվել են 15.000 ծառով, իսկ 9 կամուրջների վրա կախիչներով տեղադրվել են ծաղկասածիլներով ծաղկամաններ: Մայիսի 20-ին ավարտվել է կենտրոնական փողոցների ծառերի կրապատումը:

Քաղաքապետարանի շինարարության և բարեկարգման վարչության պետ Ֆրունզ Բասենցյանը տեղեկացրեց, որ ապրիլի 1-ից թաղային բոլոր համայնքներում ասֆալտապատվել են բակերն ու բակեր տանող երկրորդական փողոցները: Արդեն ասֆալտապատվել է մոտ 500.000 քմ տարածք:

«Քաղաքապետ Գագիկ Բեգլարյանի հանձնարարությամբ ասֆալտապատումը կատարվում է ըստ անհրաժեշտության, այսինքն` այն հատվածներում, որտեղ դրա անհրաժեշտությունը կա»,- ասում է Բասենցյանը:

Երևան քաղաքի փողոցներում և բակային տարածքներում կատարվում են նաև լայնածավալ աղբահանության և սանիտարական մաքրման աշխատանքներ: Բացի այդ, մայրաքաղաքի բակային տարածքներում և բակեր տանող երկրորդական փողոցներում 4354 նոր էլեկտրասյուն է տեղադրվել, վերականգնվել է 416 հին սյուն, տեղադրվել է 3839 նոր լապտեր։

Բասենցյանի տեղեկացմամբ` դեռևս հնարավոր չէ տրամադրել տվյալներ այն մասին, թե որքան գումար է ծախսվել քաղաքի բարեկարգման վրա, քանի որ «աշխատանքները դեռ ընթացքի մեջ են, և վերջնական թվերը հայտնի կլինեն միայն 20 օրից»:

Վերջերս փիար մասնագետ Կարեն Քոչարյանը հայտարարեց, որ Երևանի ավագանու ընտրությունների քարոզարշավի ընթացքում բարձրացել է ՀՀԿ-ի վարկանիշը: Փիար մասնագետը դա կապում էր «ոչ ստանդարտ կամպանիա» տանելու հետ, այսինքն` ՀՀԿ-ն կարողացել է գրագետ կազմակերպել իր անելիքները` միավորելով վարչական, մարդկային և ֆինանսական ռեսուրսները:

Քաղաքագետ Ռուբեն Մեհրաբյանը կարծում է, որ, ըստ մտահղացման` քաղաքի բարեկարգումը պետք է որ ազդեր ընտրողների կարծիքի վրա, սակայն չի ազդել, քանի որ անցել են այդ ժամանակները:

«Բարեկարգման աշխատանքները քաղաքապետարանի պարտականություններն են, կատարվում են քաղաքապետարանի բյուջեի հաշվին, և պետք չէ դա որպես երևանցիների համար արվող լավություն հրամցնել»,- ասում է Մեհրաբյանը:

Իր քաղաքական վերլուծություններով հայտնի հրապարակախոս Հրանտ Տեր-Աբրահամյանը ևս կարծում է, որ ժողովրդի կարծիքի վրա դա քիչ ազդեցություն կունենա:

«Մայրիկիս բակում էլ են լույսեր տեղադրել, իսկ լույս այդ բակում վերջին անգամ երևի Բրեժնևի ժամանակներում է եղել: Սակայն ես կարծում եմ, որ դա շատ քիչ ազդեցություն կթողնի ժողովրդի կարծիքի վրա»,- ասում է նա:

Տեր-Աբրահամյանը կարծում է, որ ՀՀԿ-ի ընտրազանգվածը կուսակցությանն իր քվեն կտա ոչ թե քաղաքի աղբահանության կամ բարեկարգման համար, այլ ավելի շատ ընտրակաշառքի դիմաց:

Իսկ Հայ ազգային կոնգրեսի մամուլի խոսնակ Արման Մուսինյանի կարծիքով` քաղաքապետարանի աշխատանքները կարող են ազդել մարդկանց քաղաքական կողմնորոշման վրա, բայց նրանց թիվը շատ քիչ կլինի:

«Երևանցիների մեծ մասն այնքան գիտակից է, որ հասկանում է, որ քաղաքի մեծածավալ բարեկարգումն ընդամենը խայծ է, ընտրողները շատ լավ ծանոթ են այդ իշխանությունների բնույթին»,- կարծում է Մուսինյանը:

ՀՀԿ մամլո քարտուղար Էդուարդ Շարմազանովն էլ իր հերթին մայրաքաղաքի բարեկարգումները ՀՀԿ-ի նախընտրական քարոզարշավի հետ կապելն ամբողջովին անհիմն համարեց:

«Ասֆալտապատման, կանաչապատման աշխատանքներն ամեն տարի կատարվում են տարվա այս ժամանակահատվածում: Քաղաքապետարանը, բնականաբար, չէր կարող դրանք հետաձգել, ասենք` մինչև հունիսի 1-ը: Քաղաքը կաթվածահար կլիներ, քաղաքացիները կդժգոհեին: Պարզապես այս պարագայում ընդդիմությունը, զգալով ավագանու ընտրություններում իր հաղթելու շանսերի բացակայությունը, ավելի ջղային է դարձել: Մենք սովոր ենք դրան, բոլոր երկրներում էլ ընդդիմությունը քննադատում է իշխանությունը»,- «ԱրմենիաՆաուին» փոխանցեց Շարմազանովը: