Կենտրոնական ընտրական հանձնաժողովը (ԿԸՀ) հաղորդում է, որ Երևանի ավագանու ընտրություններին արդեն (14:00-ի դրությամբ) մասնակցել է ընտրողների 29,36 տոկոսը:

ԿԸՀ մամուլի խոսնակ Տաթև Օհանյանն «ԱրմենիաՆաուին» ասաց, որ ընտրական (պաշտոնական տվյալներով` Երևանում ընտրություններին մասնակցելու իրավունք ունեցող 771477 մարդ կա) ակտիվությունը գրեթե նույնքան է, որքան նախորդ` 2008 թ. նախագահական ընտրությունների ժամանակ:

(Ավանի թաղամասում, որտեղ Հանրապետական կուսակցության ցուցակի երկրորդ հորիզոնականը զբաղեցնող պատգամավոր Տարոն Մարգարյանը գործող թաղապետն է, գրանցվել է ընտրողների մասնակցության ամենաբարձր ցուցանիշը` 37,65 տոկոս:)

Մինչ այդ, «Թրանսփարենսի ինթերնեշնլ» (ԹԻ) հակակոռուպցիոն կենտրոնը նշում է, որ այսօր Գյումրուց միկրոավտոբուսներով մարդկանց բերում են մայրաքաղաք` ընտրություններին մասնակցելու:

Ինչպես հաղորդվում է caucasusreports բլոգում (http://caucasusreports.wordpress.com), «ԹԻ» դիտորդ Լևոն Բարսեղյանը քաղաքապետարանի առաջ մարդկանցով լի 20 միկրոավտոբուս է տեսել: Նա ասում է, որ Գյումրու փոխքաղաքապետը Գյումրում գտնվող «Ազատություն» ռադիոկայանի լրագրողին ասել է, թե խումբը խորոված ուտելու է գնում:

Բարսեղյանը հետևել է միկրոավտոբուսների շարասյանը, որը, ըստ նրա, ուղեկցում էին ոստիկանությունը և որը, հասնելով Երևան, բաժանվել և տարբեր ուղղություններով է շարժվել:

Բարսեղյանի խոսքով` չի կարող պնդել` արդյոք միկրոավտոբուսները շարժվե՞լ են ընտրատեղամասեր, թե՞ ոչ, բայց նա գրանցել է պետհամարանիշները և հայտնել դրանք «Մարդու իրավունքները Հայաստանում» թեժ գծին:

Մինչդեռ ընդդիմադիր Հայ ազգային կոնգրեսի (ՀԱԿ) գնահատմամբ` արձանագրված խախտումները նույնքան շատ են, որքան նախորդ ընտրություններում: ՀԱԿ-ը վաղ առավոտից մինչև կեսօր 32 ընտրախախտման դեպք է գրանցել:

«Գործադրվում են նույնպիսի բռնություններ, ահաբեկումներ վստահված անձանց նկատմամբ: Իշխանական կուսակցությունները գործի են դրել բոլոր ռեսուրսները կեղծիքներ իրականացնելու համար»,- «ԱրմենիաՆաուին» ասում է ՀԱԿ-ի մամլո խոսնակ Արման Մուսինյանը:

Ըստ ՀԱԿ-ի տվյալների` Գյումրուց, Մարալիկից (Շիրակի մարզ) և Վանաձորից (Լոռու մարզ) միկրոավտոբուսների շարասյունով «ընտրողների» են բերել Երևան: ընդդիմությունը տեղեկացնում է, որ մեքենաները կանգ են առել Ֆուտբոլի Ֆեդերացիայի շենքի մոտ, որտեղ նրանք իջել են, ստացել ընտրելու համար անհրաժեշտ հաշվառման թերթիկները և տարվել տարբեր ընտրատեղամասեր` ընտրելու:

«Սա նշանակում է, որ մարզերում գրանցված և այնտեղ ապրող մարդկանց միջոցով, կեղծիքներով որոշվելու է Երևանի ճակատագիրը»,- ասում է Մուսինյանը:

Մինչ այդ, Քաղաքացիական հասարակության ինստիտուտը ընտրախախտման 25 դեպք է գրանցել:

ՀՀԿ կուսակցության մամլո խոսնակ, պատգամավոր Էդուարդ Շարմազանովը պնդում է, որ ընդդիմությանը ահազանգը «զուտ մերկապարանոց հայտարարություն է»:

«Շատ հնարավոր է` Երևանում գրանցված մարդիկ կան, որ Գյումրում են եղել և վերադառնում են մայրաքաղաք ընտրելու: ՀՀԿ-ն ոչ ցանկություն, ոչ էլ հնարավորություն ունի կեղծիքներ անելու, սա պարզապես նույն` աղմուկ բարձրացնելու ձեռագիրն է»,- «ԱրմենիաՆաուին» ասում է Շարմազանովը:

ՀԱԿ-ի հաղորդմամբ` լարված իրավիճակ է Մալաթիա-Սեբաստիա համայնքում, որը, ըստ Մուսինյանի` գտնվում է պատգամավոր օլիգարխ Սամվել Ալեքսանյանի իշխանության ներքո, և որտեղ մեծ մասամբ բռնություն է կիրառվել վստահված անձանց նկատմամբ:

Մալաթիա-Սեբաստիա համայնքի 8/02 ընտրատեղամասի հանձնաժողովի նախագահ Վարդան Վարդանյանը սկզբից խոչընդոտել է և ապա ծեծի է ենթարկել ՀԱԿ-ի վստահված անձ Արման Աբրահամյանին: Մեկ այլ` 7/08 ընտրատեղամասում ծեծի են ենթարկվել հանձնաժողովում «Ժառանգություն» կուսակցության ներկայացուցիչը և ՀԱԿ-ի վստահված անձը ու տեղամասից դուրս հանվել:

Սակայն Արման Աբրահամյանը, խուսափելով որևէ մեկնաբանությունից, «ԱրմենիաՆաուին» ասաց, որ ամեն ինչ նորմալ է և որևէ բան տեղի չի ունեցել:

Սակայն այդ տեղամասում ներկա «Ընտրությունը քոնն է» ՀԿ դիտորդական առաքելության անդամը հավաստիացրեց, որ ծեծկռտուք տեղի է ունեցել. «Պարզապես Արման Աբրահամյանին, երևի, սպառնացել ու վախեցրել են: Մարդ է և վախենում է իր կյանքի համար»,- «ԱրմենիաՆաուին» ասաց դիտորդը, որը չցանկացավ իր անունը հայտնել:

Մինչ ընդդիմությունը պարբերաբար հայտարարություններ է անում տարբեր բնույթի ընտրախախտումների մասին, «Բարգավաճ Հայաստան» և «Օրինաց երկիր» կուսակցությունների շտաբերից ասում են, որ ամեն ինչ կարգին է, ոչ մի ընտրախախտում չեն արձանագրվել:

Ընթացիկ ընտրություններում «Բարգավաճ Հայաստանի» գլխավոր թեկնածու Հարություն Քուշկյանը լրատվամիջոցներին հայտնեց «մաքուր ընտրությունների» մասին իր լավատեսական կարծիքը, երբ քվեաթերթիկն էր գցում քվեատուփի մեջ:

Ինչպես հաղորդել են, Քուշկյանն ասել է. «Համոզված եմ` այս ընտրությունները մի քայլ առաջ են լինելու»:

Հայ հեղափոխական դաշնակցությունն էլ հաղորդել է, որ ընտրախախտման մի քանի փորձ է արվել, որոնք, ըստ նրա, կանխվել են կուսակցության ներկայացուցչի կողմից:

Մինչ այդ, գործող նախագահ Սերժ Սարգսյանը, ով առաջնորդում է իշխող Հանրապետական կուսակցությունը, և Հայաստանի առաջին նախագահ Լևոն Տեր-Պետրոսյանը, ով ընթացիկ ընտրություններում գլխավորում է ՀԱԿ-ի ցուցակը, ընտրել են Երևանի կենտրոնի նույն ընտրական տեղամասում` երկու ժամ տարբերությամբ:

Սարգսյանը հրաժարվեց լրատվամիջոցներին որևէ մեկնաբանություն տալուց` ասելով. «Այսօր լռության օր է», մինչդեռ Տեր-Պետրոսյանն ասաց. «Բոլոր հարցերի պատասխանը կլինի վաղը»: