Երևանի ավագանու ընտրությունների արդյունքներով հետնապահների շարքում հայտնված կուսակցությունների առաջնորդները կիրակի տեղի ունեցած մայրաքաղաքային ընտրություններին միայն բացասական գնահատականներ են տալիս:

Կենտրոնական ընտրական հանձնաժողովի հրապարակած ընտրությունների նախնական արդյունքներով` չորս կուսակցություն` «Օրինաց երկիր» (ՕԵԿ), Հայ հեղափոխական դաշնակցություն (ՀՅԴ), Հայաստանի աշխատավորական սոցիալիստական (ՀԱՍԿ) և Ժողովրդականը (ԺԿ), չեն հաղթահարել 7 տոկոսանոց պարտադիր շեմը:

Իշխող Հանրապետական կուսակցությունը ձայների մեծամասնությամբ առաջին տեղում է: Երկրորդ և երրորդ տեղերում (մեծ տարբերությամբ), համապատասխանաբար` նրա կրտսեր կոալիցիոն գործընկեր «Բարգավաճ Հայաստանը» և ընդդիմադիր Հայ ազգային կոնգրեսն (ՀԱԿ) են:

Քվեարկությանը մասնակցած 412264 ընտրողներից ՕԵԿ-ին ընտրել է 20959 մարդ, ՀՅԴ-ին` 18648, ԺԿ-ին` 8569 և ՀԱՍԿ-ին` 1951 մարդ:

ԺԿ առաջնորդ Տիգրան Կարապետյանն անցկացված ընտրություններն առուծախի ու տոնավաճառի հետ համեմատեց, որտեղ բոլոր ձայները գնված էին:

«Դժգոհ եմ ընտրություններից: Համարում եմ, որ համատարած փող է բաժանվել: Համեմատում եմ ընտրություններն առուծախի հետ: Այն ամենը, ինչ երեկ եղել է, ոտքից գլուխ տոնավաճառ է, որտեղ ձայներ էին գնում կոալիցիոն կուսակցությունները»,- «ԱրմենիաՆաուին» ասել է Կարապետյանը:

Ամենաքիչ թվով ձայն ստացած ՀԱՍԿ-ի առաջնորդ Մովսես Շահվերդյանը ընտրությունները բնութագրում է որպես անազնիվ, անարդար ու անորակ, իր խոսքով` այնպիսին, «ինչպիսին դրանք իրականում եղել են»:

«Այն տեղամասում, որտեղ ես եմ ընտրել` 145-րդ դպրոցում, մեր վստահված անձը մինչև օրվա երկրորդ կեսը 20 ձայն էր հաշվարկել, այնինչ օրվա վերջի հաշվարկով մեզ ընդամենը 10 ձայն էին տվել»,- ասաց Շահվերդյանը:

«Խնդիրը սակայն դա չէ, այլ երևույթը: Մենք ոչ թե վատ ենք զգում, որ չենք անցել, մյուսներն են անցել, այլ որ ընտրությունները նման ձևով են անցկացվել, նման ընտրություն չի կարելի անցկացնել, քանի որ կարող է մեր պետականության վերջին հասցնել»,- հավելում է նա:

Չորրորդ հետնապահ «Օրինաց Երկիր» կուսակցությունը դեռ հաղորդագրություն չի տարածել:

Ստացած ձայների թվով հինգերորդ տեղում գտնվող, 10 տարի իշխանության մաս կազմող ու ընտրություններից երկու ամիս առաջ` ապրիլին, իշխող կոալիցիայից դուրս եկած ՀՅԴ-ն իրենց տեղեկատվության պատասխանատուի փոխանցմամբ` «նիստերի մեջ է» ու դեռ որևէ հայտարարություն չի պատրաստել:

Ընդդիմադիր 18 կուսակցությունից բաղկացած Հայ ազգային կոնգրես (ՀԱԿ) դաշինքը, որը 69871 ձայնով հաղթահարել էր 9 տոկոսի պարտադիր շեմը, նույնպես «խայտառակ» խախտումներով, ահաբեկության ու բռնության մթնոլորտում անցած է բնութագրում երեկվա ընտրությունները:

«Իշխանությունը հերթական անգամ ցույց տվեց իր կրիմինալ դեմքը երեկ գիշեր: Քրեական աշխարհը՝ Սամվել Ալեքսանյանի գլխավորությամբ, Մալաթիայում նույնիսկ ծեծել ու առևանգել է լրագրողների, վստահված անձանց, դիտորդների»,- երեկ գիշեր` ընտրություններից հետո հրավիրված մամուլի ասուլիսում հայտարարել էր համակարգող Լևոն Զուրաբյանը:

Նախնական տվյալներով` առաջատարը Հանրապետական կուսակցությունն է 190171 (47,3 տոկոս), երկրորդ տեղում` «Բարգավաճ Հայաստան» կուսակցությունը (91141 ձայնով, 22,7 տոկոս):