Հակակոռուպցիոն միջազգային կազմակերպության` վերջերս հրապարակած զեկույցի համաձայն` Հայաստանում ամենից շատ կոռումպացված է դատական համակարգը: Երկրորդ տեղում են պաշտոնյաներն ու քաղծառայողները, երրորդ տեղում` խորհրդարանը:

Բեռլինում գտնվող «Թրանսփարենսի նթերնեշնլի» չորեքշաբթի հրապարակած «Կոռուպցիայի համաշխարհային բարոմետր-2009 թ.» զեկույցի համաձայն` Հայաստանում հարցվածները որպես կոռումպացված համակարգեր նշել են նաև քաղաքական կուսակցությունները, բիզնես/մասնավոր հատվածը, ինչպես նաև ԶԼՄ-ները:

Հարցումն անցկացվել է աշխարհի 69 երկրների ավելի քան 73000 մարդկանց շրջանում:

Աշխարհի այն երկրների շարքում, որտեղ կաշառակերությունն առավել մեծ տարածում ունի, Հայաստանն ընդգրկված է երկրորդ խմբի մեջ: Հայաստանում հարցվածների 43 տոկոսը «այո» է պատասխանել այն հարցին, թե արդյոք ինքը կամ իր ընտանիքի անդամներից որևէ մեկն վերջին երկու ամսվա ընթացքում կաշառք տվե՞լ է:

Հայաստանի աշխարհագրական հարևան Ադրբեջանը այս խմբում նույնպես հարևան է, քանի որ այստեղ դրական է պատասխանել հարցվածների 49 տոկոսը: Ռուսաստանում, որը նույնպես հայտնվել է այս խմբում, «այո» է պատասխանել հարցվածների 31 տոկոսը:

Մինչդեռ Թուրքիայում և Վրաստանում հարցվածների միայն 2 տոկոսն է ասել, որ ինքը կամ իր ընտանիքի անդամները անցյալ տարի կաշառք են տվել: Երկուսն էլ, Արևմտյան և Կենտրոնական Եվրոպայի մի քանի ժողովրդավարական պետությունների հետ հայտնվել են այն երկրների շարքում, որտեղ «ամենաքիչն է տարածված կաշառակերությունը»:

Ուսումնասիրության համաձայն` «կոռուպցիայի դեմ պայքարի ուղղությամբ Հայաստանի կառավարության գործողությունների արդյունավետությունն աճել է»:

Այն երկրների շարքում, որտեղ անցյալ տարվա ընթացքում այս առումով նույնպես աճ է գրանցվել, հայտնվել են նաև Կամբոջան, Կոլումբիան, Դանիան, Ֆինլանդիան, Վրաստանը, Հնդկաստանը, Ինդոնեզիան, Լյուքսեմբուրգը, Նիդեռլանդները և Նորվեգիան:

Միևնույն ժամանակ, զեկույցի համաձայն, այս առումով անկում է գրանցվել Բոսնիա և Հերցեգովինայում, Հունաստանում, Մալազիայում, Պանամայում, Ֆիլիպիններում, Սենեգալում, Իսպանիայում, Թաիլանդում, Թուրքիայում և Վենեսուելայում:

«Թրանսփարենսի ինթերնեշնլը» միջազգային հասարակական կազմակերպություն է, որը պայքարում է կոռուպցիայի դեմ և բարձրացնում դրա վնասակար հետևանքների իրազեկության մակարդակը: Նրա միջազգային քարտուղարությունը գտնվում է Գերմանիայում` Բեռլինում: Կազմակերպությունն ունի նաև 90 մասնաճյուղ աշխարհի տարբեր երկրներում: Այն աշխատում է նաև կառավարությունում, բիզնեսի ոլորտում և հասարակական կազմակերպություններում իր գործընկերների հետ` զարգացնելու և կիրառելու հակակոռուպցիոն պայքարի արդյունավետ միջոցներ:


Զեկույցն ամբողջությամբ կարդացե՛ք www.transparency.org