Հայաստանը երկար ճանապարհ է անցել ինտերնետ կապի արագության և հաճախորդների թվի ներկայիս մակարդակին հասնելու համար: Ինտերնետ կապի ծառայություններից օգտվողներն այժմ ձգտում են ավելի արդիական տեխնոլոգիաների, որոնք նախորդ մի քանի տարիների ընթացքում էապես աճել են:

Թեև Հայաստանում ինտերնետ կապի սակագները մեծ մասամբ կախված են շուկայի վիճակից և կարգավորված չեն, մասնագետներն ակնկալում են, որ, հաճախորդների պահանջարկով և մրցակցությամբ պայմանավորված` սակագների նվազումը կշարունակվի:

Ըստ Հանրային ծառայությունները կարգավորող հանձնաժողովի (ՀԾԿՀ)` 2008 թ. համեմատ այսօր Հայաստանում մանրածախ շուկայում ինտերնետի գները շուրջ երկու անգամ նվազել են: Սակայն ցածր արագությամբ ինտերնետ շուկայում սակագներն ավելի բարձր են, քան բարձր արագությամբ ինտերնետ շուկայում:

«Ի տարբերություն մեր հարևանների՝ Հայաստանում ինտերնետ կապի բարձր սակագինը պայմանավորված է նրանով, որ մենք ունենք ընդամենը երկու գիծ՝ մեկը Իրանից, մյուսը` Վրաստանից եկող և նաև տարանցման համար բավական գումար ենք վճարում վրացական և թուրքական օպերատորներին»,- ասում է ՀԾԿՀ անդամ Սամվել Արաբաջյանը:

Ըստ նրա`մոտ մեկ տարում 6-7 անգամ ավելացել է լայնաշերտ գծային ինտերնետ կապի բաժանորդների թիվը: 2008 թ. չորրորդ եռամսյակի դրությամբ` 10 հազար բաժանորդ օգտվել է լայնաշերտ գծային ինտերնետից, սակայն այսօր արդեն լայնաշերտ կապից օգտվողների թիվը հասնում է 70-75 հազարի, որը ներառում է 3G, Wi Max, Wi Fi, DSL և այլ տեխնոլոգիաներ: Dial up-ից օգտվողների թիվը նվազել է` 65-66 հազարից հասնելով 40-45 հազարի:

«Եթե 2-3 տարի առաջ ինտերնետ բաժանորդների հիմնական մասն օգտվում էր Dial up-ից, որը դանդաղ էր ու բազմաթիվ խնդիրներ էր առաջացնում, այսօր բաժանորդները փորձում են մտնել ինտերնետ կապի ավելի զարգացած, առաջադեմ [տեխնոլոգիաների] շուկա և օգտվել ավելի արագ ու որակյալ կապից: Դրանք ավելի հուսալի են նաև տեղեկատվական անվտանգության տեսանկյունից»,- ասում է Արաբաջյանը:

ՀԾԿՀ-ն ամփոփել է հանրապետությունում մի քանի տարիների ինտերնետի թողունակության հզորությունը: 2005-ին Հայաստանում սպառվել է 15 մեգաբիթ թողունակության ինտերնետ, որը եղել է 17 հազար դոլարին համարժեք դրամի սահմաններում: 2006-ին թողունակությունը հասել է 56 մեգաբիթի: 2007-ի սկզբին եղել է 115 մեգաբիթ ընդհանուր թողունակություն, իսկ 2008 թ. վերջի տվյալներով` թողունակությունը կազմել է 1083 մեգաբիթ` հատելով 1 գիգաբիթի սահմանը:

«2010 թ. հունվարի 1-ի դրությամբ ինտերնետի թողունակությունը հասել է ավելի քան 3,6 գիգաբիթի, որն այսօր 90 տոկոսով ծանրաբեռնված է: Կարծում եմ, որ այս դինամիկան մինչև տարեվերջ կշարունակվի և կհասնի մինչև 6-7 գիգաբիթի»,- ասում է Արաբաջյանը:

Արաբաջյանը նաև հայտարարեց, որ Հայաստանի մարզերը և գյուղական համայնքները (որոնք նպատակահարմար չեն հեռահաղորդակցության բիզնեսի զարգացման տեսակետից) էլեկտրոնային ծառայություններով ապահովելու համար շուտով կստեղծվի Հանրային ունիվերսալ ծառայությունների հիմնադրամ, որը նախատեսում է հեռահաղորդակցությունների, ինտերնետ կապի հասանելիության ապահովում և այլ հնարավորություններ:

Նա ասում է, որ հիմնադրամի ֆինանսավորումը կիրականացվի խոշոր օպերատորների հաշվին, իսկ միջոցառումների իրագործման ուղղվածությունը կորոշի Հոգաբարձուների խորհուրդը: