Readers' comments

Would you like to post a comment ? Be the first to share your thoughts.

Post a comment

Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.

Մեծացնել նկարը

Ինչպես հաղորդում է ադրբեջանական «Զերկալո» պարբերականը` 2006 թ. ստեղծված «Իրավան» լրատվավերլուծական կենտրոնի ղեկավար Սաբիր Էրիվանլիի հավաստմամբ` կայքը նախատեսված է տարածաշրջանի հիմնահարցերով զբաղվող մասնագետների լայն շրջանակների համար:

Էրիվանլին նշում է, որ ստեղծման գաղափարը պայմանավորված էր նրանով, որ մինչև այժմ համացանցից օգտվող հայալեզու ընթերցողները տարածաշրջանում առկա խնդիրներին ծանոթանում էին միայն Հայաստանի տեսանկյունից:

«Այսուհետ նրանց հնարավորություն է ընձեռվում ծանոթանալու նաև հակառակ կողմի տեսակետին»,- ասել է Էրիվանլին «Զերկալո» պարբերականին:

Ըստ նրա` կայքում կտեղադրվեն Հարավային Կովկասի պատմության, ներքին, արտաքին և ռազմական քաղաքականությունների, տնտեսության և ազգամիջյան հակամարտությունների վերաբերյալ վերլուծական հետազոտություններ:

Կայքի «Մեր մասին» բաժնում նշված է, որ կենտրոնի մասնագետների ու փորձագետների պատրաստած նյութերը հիմնվում են անհերքելի փաստերի և դիտարկումների վրա, որոնք համակողմանի տեղեկություններ են տալիս Հարավային Կովկասի երկրների և նրանց ժողովուրդների մասին: (Սակայն կայքում չկան ոչ տեղեկություններ աշխատակիցների մասին, ոչ էլ հեռախոսահամարներ կամ հասցեներ հետադարձ կապի համար:)

Կայքն ընթերցելիս միանշանակ տպավորություն է ստեղծվում, որ այն միայն քարոզչական նպատակներ է հետապնդում: Կայքի «Առասպելներ», «Անջատողականություն», «Ահաբեկչություն» և «Ֆոտոփաստեր» բաժինները պարունակում են հակահայկական քարոզչություն և չակերտների մեջ առնում «Հայոց ցեղասպանություն» արտահայտությունը:

Տեղեկատվական բնագավառում փորձագետ Կարեն Վրթանեսյանի կարծիքով` «Իրավանն» այն քարոզչական կայքերից է, որոնք ստեղծվում են նախապատերազմական իրավիճակում` հակառակորդի վրա բարոյական ազդեցություն գործելու նպատակով:

«Այսպիսի կայքերն անհրաժեշտ են տեղեկատվական ենթակառուցվածք պատրաստելու համար, որոնք այս պահին, գուցե, այդքան էլ լուրջ ուշադրության չեն արժանանա, սակայն պատերազմական իրավիճակում ապատեղեկատվություն տարածելու ամենահարմար միջոցն են դառնում»,- ասում է Վրթանեսյանը:

Ըստ փորձագետի` Ադրբեջանում բացի հակահայկական ներքին քարոզչական մեխանիզմից, վերջին մի քանի ամիսներին շատ են զարգացել նաև արտաքին քարոզչական մեխանիզմները, որոնց օրինակներից է այս կայքը:

«Ադրբեջանական կայքերից ցանկացած տեղեկատվություն վերցնելիս պարտադիր պետք է նշել աղբյուրը»,- հայկական լրատվամիջոցներին խորհուրդ է տալիս Վրթանեսյանը` բացատրելով, որ ապատեղեկատվության դեպքում հայկական լրատվամիջոցները կարող են այդպես խուսափել ծուղակի մեջ ընկնելուց:

«Իրավան» կայքում տեղադրված են նաև «Ադրբեջանի ձայն» ռադիոյի հայկական ծառայության ձայնագրությունները: Կայքի նյութերը ներկայացվում են նաև ռուսերեն: