Readers' comments

Would you like to post a comment ? Be the first to share your thoughts.

Post a comment

Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.

Մեծացնել նկարը

Ամառային ծրագրի մասնակից տասնմեկ երիտասարդ ամերիկահայեր Ամերիկայի հայկական համագումարի հայաստանյան գրասենյակի տնօրեն Արփի Վարդանյանի հետ

Դիանան մեկն էր այն տասնմեկ երիտասարդ ամերիկահայերից, որոնք այս ամառ այցելել էին Հայաստան ԱՀՀ-ի «Ամառային պրակտիկա» ծրագրով, որը, կազմակերպիչների հավաստմամբ, կոչված է ծանոթացնելու ուսանողներին իրենց նախնիների հայրենիքին և զարգացնել հաջորդ սերնդի առաջնորդ դառնալու համար անհրաժեշտ հմտություններ: (Այս տարվա խմբում ընդգրկված Սառա Լոուրենսի քոլեջի գրականության բաժնի ուսանողուհի Դիանա Քաչոյան-Շանզն իր պրակտիկան անցկացրել է «ԱրմենիաՆաու» շաբաթաթերթում. Դիանայի էսսեն ամբողջությամբ կարդալու համար սեղմեք այստեղ:)

«Ամառային պրակտիկա Հայաստանում» ծրագիրը հիմնվել է 1999 թվականին, որպեսզի հնարավորություն ընձեռի ամերիկահայերին այցելելու իրենց նախնիների հայրենիքն ու միաժամանակ որպես կամավոր օգնելու տեղացիներին: Մասնակիցները պրակտիկա են անցել նախարարություններում, լրատվամիջոցներում, բժշկական կենտրոններում ու հասարակական կազմակերպություններում:

ԱՀՀ-ի հավաստմամբ` հունիսի կեսից մինչև օգոստոսի կեսը տևող ծրագիրը երիտասարդներին իրենց հասակակիցների հետ ինչպես մասնագիտական, այնպես էլ սոցիալական շփման բացառիկ հնարավորություն է ընձեռում:

«Այս տարվա իմ այցը Հայաստան ուրիշ էր: Անցյալ տարվա կարճ` երեքշաբաթյա այցի իդեալիստական տեսլականս փոխարինվեց լավատեսության ավելի իրատեսական զգացումով,- գրում է Քրիստիան Կարպիս Օհանյանը, որը 2006-ին աշխատել է «Հաբիտատ. Հայաստան» ծրագրում: - Հայաստան վերադառնալիս գիտեի, որ այս ամառն ուրիշ է լինելու: Ի տարբերություն նախորդ տարվա, այս անգամ պրակտիկաս պիտի անցներ մի ՀԿ-ում, որը զբաղվում է Հայաստանի եվրոպական ինտեգրման հարցով: Պրակտիկայիս շնորհիվ ձեռք բերեցի ավելի խորը, թեև ոչ սպառիչ գիտելիքներ հայաստանյան կյանքի որոշ կողմերի մասին»: (Քրիստիանի էսսեն ամբողջությամբ կարդալու համար սեղմեք այստեղ:)

Սակայն ծրագիրն ավելի շատ հուզական շփման մասին է` աշխարհով մեկ սփռված ժողովրդի տարբեր հատվածների միջև, որոնք հաճախ նույնիսկ նույն լեզվով չեն խոսում…

«Ձևացնում եմ, թե քնում եմ: Գլուխս հանգչում է հսկայական բարձի վրա: Կոպերս փակվել են` օգնելով ուղեղիս ընկղմվելու քնի ռեժիմ: Սակայն կոկորդս անդադար դուրս է ժայթքում հազի հանպատրաստի մի սիմֆոնիա, որ լսվում է ամբողջ Երևանով մեկ: Բայց մի՞թե ինձնից բացի որևէ մեկը լսում է այն: Իսկ եթե լսում են, արդյոք նրանց պե՞տքն է, որ ես` ինչ-որ նյույորքցի տղա, մրսել եմ: Լքվածության ու օտարության զգացումը սկսում է պատել ինձ: Հարյուրավոր մղոններով հեռու եմ իմ ընտանիքից, իմ ամերիկյան դեղերից ու ամերիկյան բժիշկներից,- գրում է ծրագրի մեկ այլ մասնակից` Հայկ Խրլոպյանը: - Իմ մենակությունը վերջանում է, երբ սենյակս է մտնում հյուրընկալող մայրիկս` հարազատ մորս նման անհանգստացած: Հարցնում է` հիվանդացե՞լ ես: Պատասխանում եմ հայերենի ու անգլերենի տարօրինակ համադրությամբ, որ նա, հույս ունեմ, կկարողանա հասկանալ. «Այո, հիվանդ, հազի դեղ ունենա՞լ»: Հյուրընկալող մայրիկս ու ես հաղորդակցվելու շատ հետաքրքիր ձև ենք գտել, քանի որ ես առանձնապես հայերեն չեմ խոսում, իսկ նա առանձնապես անգլերեն չի խոսում»: (Հայկի էսսեն ամբողջությամբ կարդալու համար սեղմեք այստեղ:)

Ծրագիրը նաև հնարավորություն է տալիս ծանոթանալու նախնիների հինավուրց երկրի այսօրվա կյանքին…

«Արթնացա ժամը 7:15-ի մոտ: Ջուրը տվել էին մի 15 րոպե առաջ (մենք ջուր ենք ունենում միայն առավոտյան 7-10-ը և երեկոյան 6-9-ը): Լվացքս` մի քանի ներքնազգեստ ու շապիկ, խցկեցի լվացքի մեքենա: Քայլ 1-ին. Վերցրի լվացքի փոշին, մի քիչ լցրի լվացքի մեքենայի քիչ թե շատ նորմալ տեսք ունեցող տուփիկը: Քայլ 2-րդ. Լվացքիս գործը սահուն առաջ էր գնում, բայց երբ նայեցի կոճակներին` պատրաստ բացելու հայերենի բառարանս ու խիզախորեն թարգմանելու հայերենից, պարզվեց, որ տառերը ռուսերեն են: Ես այստեղ ռուսերեն սովորելու համար չեմ եկել: Բարեբախտաբար, սենյակիս հարևանը խոսում է ռուսերեն, սակայն, դժբախտաբար, նա քնած է: Ստիպված պետք է գլուխ հանեմ իմ լեզվական գիտելիքներով, նահանջի տեղ չկա: Իմ համեստ խոհանոցում` մրգի զամբյուղի ու շարժական գազօջախի կողքին, ես ստիպված էի առաջամարտիկի նման նոր ուղիներ հարթել: Փորձեցի մի քանի կոճակ ու կգործի գցեցի մեքենան»,- գրում է Սամանթա Կիրկոստասը: (Սամանթայի էսսեն ամբողջությամբ կարդալու համար սեղմեք այստեղ:)

Ներկայումս ԱՀՀ-ն մասնակիցներ է հավաքում հաջորդ ամառվա ծրագրի համար: Կարող են դիմել բարձր կուրսերի հայկական ծագում ունեցող ուսանողները:

Լրացուցիչ տեղեկությունների կամ դիմելու համար այցելեք Ամերիկայի հայկական համագումարի կայքը` www.aaainc.org:

ԱՀՀ-ի մեկ այլ ծրագիր` Թերջենյան-Թոմաս ծրագիրը, հնարավորություն է տալիս հայկական ծագումով ուսանողներին ամռանը ութ շաբաթ ապրել ու աշխատել Վաշինգտոնում: Ծրագիրը ներառում է պրակտիկա, դասախոսություններ ու սոցիալական գործունեություն: Նոյեմբերին իր 30-ամյակը տոնող ծրագրին մասնակցել է, ընդհանուր առմամբ, հայկական ծագում ունեցող մոտ 800 ուսանող ԱՄՆ-ից և այլ երկրներից: Լրացուցիչ տեղեկություններ կարելի է ստանալ վերոհիշյալ հասցեով: