Ամերիկայի հայկական առաջատար կազմակերպություններից մեկը խրախուսեց ԱՄՆ նորընտիր նախագահին` կատարել Հայոց ցեղասպանությունն ընդունելու իր խոստումը:

Ամերիկայի հայկական համագումարի Հայաստանի և ԼՂՀ գրասենյակների (www.aaainc.org) տնօրեն Արփի Վարդանյանը հինգշաբթի Երևանում տեղի ունեցած մամուլի ասուլիսի ժամանակ ասաց, որ կազմակերպությունը մեծ հույսեր է փայփայում, որ այս անգամ նախընտրական քարոզարշավի ընթացքում հնչեցրած Բարաք Օբամայի` ԱՄՆ-ում ազդեցիկ հայ համայնքին տված իր խոստումը իրականության կվերածի` ճանաչելով 1915-1923 թթ. Թուրքիայի իշխանությունների նախապատրաստած և իրականացրած հայերի զանգվածային սպանություններն ու տեղահանումը որպես ցեղասպանություն:

«Իհարկե, հնարավոր չէ բացառել, որ խոստումները կարող են իրականություն չդառնալ, բայց քանի որ Օբաման իր խոստումը հնչեցրել է մի քանի անգամ», դրանք վստահելի են թվում»,- ասաց Վարդանյանը:

Վարդանյանը նշեց, որ իրենց կազմակերպությունը, հայկական մյուս կազմակերպությունների հետ , պետք է շարունակի աշխատել նույն ակտիվությամբ, որպեսզի (թեկնածուի տված) խոստումներն իրականացվեն:

«Ամերիկահայերը շատ ակտիվ են եղել քարոզարշավի ժամանակ և աջակցել են Օբամային: Նրանք աշխատել են ընտրողների հետ երկրով մեկ, համոզել նրանց գնալ և մասնակցել ընտրությանը»,- լրագրողներին ասաց Վարդանյանը:

«Կարծում եմ` Նահանգներում, ինչպես և աշխարհում, մթնոլորտը փոխվել է: Ավելի մեծ ուշադրություն է դարձվում ոչ միայն Հայոց , այլև ընդհանրապես բոլոր ցեղասպանություններին»:

Թուրքիայի օրեցօր ուժգնացող` ցեղասպանության ժխտման արշավի առնչությամբ հարցին Վարդանյանը պատասխանեց. «Նրանք [ԱՄՆ իշխանությունները] մեկուսացած չեն աշխատում և գիտեն Թուրքիայի դիրքորոշումը: Հուսով եմ` նրանք իրենց խոսքի տերը կլինեն: Բացի այդ, թույլ տվեք ասել, որ իրականում Թուրքիան և Միացյալ Նահանգներն այնքան էլ լավ բարեկամներ չեն, և իրենց քաղաքականությունը կառուցում են` ելնելով միայն Թուրքիայի շահերից:

Վարդանյանը եզրափակելով ասաց, որ ճանաչումն անհրաժեշտ է հենց ամերիկացիներին , քանի որ դա, նախևառաջ, կնշանակի իրենց երկրի պատմության վերահաստատում:

«Հայաստանի պահոցները լի են փաստերով: ԱՄՆ-ն չի ժխտում փաստը: Նա չի ճանաչել դա, քանի որ քաղաքական առումով նպատակահարմար չի եղել: Ամերիկացիները կշահեն, երբ ԱՄՆ-ն վերջապես ընդունի և հաստատի իր պատմությունը»: