Այս ամսվա սկզբին Վանաձորի դեղատներում վաճառքի է հանվել նոր կաթնաթթվային սննդամթերք, որը կոչված է նպաստելու մարսողությանն ու կանխելու աղիքային հիվանդությունները:

Բիֆիլակտ կոչվող կաթնաթթվային սննդամթերքը, որի ստեղծողը կաթնամթերքի արտադրության վանաձորցի մասնագետ Համլետ Հակոբյանն է, կենսաբանական հավելանյութերով` պրոբիոտիկ բակտերիաներով հարուստ սննդանյութ է: Այն ոչ միայն կարգավորում է մարսողությունը, այլև կանխում աղիքային խանգարումներն ու պաշտպանում որոշ վարակիչ հիվանդություններից:

Բիֆիլակտի հիմքում կովի կաթն է, որը յուղազերծվելուց հետո հարստացվում է բիֆիդում կոչվող բակտերիաներով: Արդյունքում ստացվում է որոշակի զանգված` մածնի թանձրության մթերք: Բիֆիլակտը նման է Հայաստանում խորհրդային տարիներից արտադրվող «Նարինե» կաթնաթթվային պատրաստուկին: Հակոբյանը բացատրում է, որ իր նոր արտադրանքի և մեծ տարածում գտած «Նարինեի» տարբերությունն այն է, որ «Նարինեն» պարունակում է միայն ացիդոֆիլային բակտերիաներ, իսկ բիֆիլակտը` նաև բիֆիդոբակտերիաներ: Երկու բակտերիաներն էլ մարդու օրգանիզմն ավելի լավ է յուրացնում, քան կովի կաթը, այդ պատճառով էլ ամբողջ աշխարհում դրանք լայն տարածում ունեն որպես կլինիկական սննդակարգին նպաստող միջոցներ:

Նախապատրաստական փուլում Հակոբյանն ուսումնասիրել է կենսաբանական հավելանյութերով սննդամթերքի արտադրության ճապոնական, կանադական և եվրոպական փորձն այս ոլորտում:

«Ժամանակն է, որ Հայաստանում ևս այն զարգանա»,- ասում է Հակոբյանը, ով արտադրություն կազմակերպելու համար վարկ է վերցրել: Նրա հավաստմամբ` բիֆիլակտը վաճառքի է հանվել համապատասխան լաբորատոր փորձարկումներից հետո: Ներկայումս բիֆիլակտի արտադրությունում Վանաձորում աշխատում է 6 մարդ: Արտադրողը հույս ունի, որ ծավալների մեծացմամբ նրանց թիվը կավելանա:

Առայժմ արտադրվում է օրական 20-100 բաժակ բիֆիլակտ` 200 գրամանոց պլաստիկե բաժակներով: Գինը 250 դրամ է (մոտ 70 սենթ)` «Նարինեի» նման: Վանաձորի երկու կենտրոնական դեղատներում վաճառքի հանված փորձնական խմբաքանակը (100-200 բաժակ) սպառվել է 2 օրում (պիտանիության ժամկետն ընդամենը 3 օր է):

«15 բաժակը երկու օրում վաճառեցինք»,- ասաց դեղատներից մեկի աշխատակիցը` հավելելով, որ զարմացել էին նոր ապրանքի այդչափ արագ սպառմամբ: Նա նշեց, որ բժիշկներն են իրենց հիվանդներին խորհուրդ տալիս նոր միջոցը:

Վանաձորցի մանկաբույժ Սվետլանա Մեսրոպյանը կարծում է, որ այդ տեսակի սնունդ անհրաժեշտ է ընդունել ամեն օր, բայց` ոչ մշտապես:

«Անհրաժեշտ է ընդունել 2-3 ամիս` բժշկի նշանակմամբ»,- ասում է մանկաբույժը` դրական գնահատելով բիֆիլակտի դերը աղիքային վարակիչ հիվանդությունների բուժման գործում: Բացի այդ, այն նպաստում է տարբեր տարիքի մարդկանց մարսողությանը: («Նարինեի» նման բիֆիլակտը կարելի է օգտագործել նաև առանց բժշկի դեղատոմսի:)

Բժիշկ Կարեն Ադամյանն էլ նկատում է, որ բիֆիդում պարունակող սննդանյութերը կանխում են ոչ միայն հիվանդությունները, այլև կարգավորում մարսողությունը, բարձրացնում օրգանիզմի դիմադրողականությունը:

«Տարիների ընթացքում օրգանիզմը շփվելով արտաքին միջավայրի հետ` տարբեր տեսակի վնասակար մանրէներ է կլանում, իսկ օրգանիզմում պակասում են բիֆիդում բակտերիաները, որոնք պաշտպանական դեր են կատարում»,- նշում է Հակոբյանը:

Օրգանիզմում բիֆիդում բակտերիաների պակասի պատճառով մարդը խոցելի է դառնում տարբեր հիվանդությունների նկատմամբ, ինչից զերծ մնալուն օգնում է կենսաբանական հավելանյութերով սննդամթերքը:

Բիֆիլակտի արտադրությամբ զբաղվում է վեց մարդ, որոնք մտադիր են ոչ միայն ընդլայնել արտադրությունն ու դրա աշխարհագրությունը, այլ արտադրել նաև հեղուկ զանգված` համեմված մրգային համերով: