Անցյալ շաբաթ Մոսկվայում անկացված «Եվրատեսիլ» երաժշտական մրցույթն ափսոսանքի և հուսախաբության ալիք բարձրացրեց Հայաստանում և շատ հարցերի ու նոր ենթադրությունների տեղիք տվեց եվրոպական ամենահայտնի երաժշտական մրցույթում հայ երգչուհիների փաստացի ձախողման առնչությամբ:

(Մինչ Արժույթի միջազգային հիմնադրամը մռայլ ապագա է կանխագուշակում հանրապետության համար, մինչ ավագանու ընտրությունները վերաձևում են մայրաքաղաքի քաղաքական դաշտը, մինչ ԱԺ նախագահն ասում է, որ շուտով համաներում կշնորհվի 2008 թ. մարտի 1-ի զանգվածային անկարգությունների առնչությամբ ձերբակալվածներին, բանավեճերի ամենաթեժ թեման Հայաստանում շարունակում է մնալ «Եվրատեսիլը»: «ԱրմենիաՆաուի»` «Եվրատեսիլի» մասին հոդվածն ավելի շատ մարդկանց է ոգեշնչել մեկնաբանություններ թողնել կայքէջում, քան անցյալ տարվա նախագահական ընտրությունները լուսաբանող հոդվածները:)

Մինչև հայտնի «Եվրատեսիլ» երաժշտական փառատոնը շատերը համոզված էին, որ Ինգա և Անուշ Արշակյան քույրերը կզբաղեցնեն բարձր տեղ: Անգամ հավանական էին համարում առաջին հորիզոնականը` հաշվի առնելով քույրերի ձայնային գերազանց տվյալները: Բայց եզրափակչի 25 մասնակիցների մեջ քույրերը 10-րդ հորիզոնականը զբաղեցրին:

Գրեթե բոլոր հայ հեռուստադիտողները համակարծիք են, որ քույրերի ցածր տեղ զբաղեցնելը պայմանավորված էր վատ ներկայացմամբ և բեմում մուգ երանգների գերակշռությամբ:
Այդուհանդերձ, քույրերի նկատմամբ համակրանքը չի թուլացել: Մոսկովյան «Ֆրեշ արտ» հայտնի ռուսական ընկերությանը մեղադրում են վատ բեմականացման համար, քանի որ այս կազմակերպությունն էր պատասխանատու հայ երգչուհիների բեմական շոուի, պարի, հագուստների, անբնական դիմահարդարման համար:

Սակայն Արշակյան քույրերի պրոդյուսեր «Շարմ» հոլդինգը չի մեղադրում ընկերությանը` ասելով, որ շոուի նման տպավորությունը միայն հեռուստաէկրանից էր:

«Առաջին օրն ամեն ինչ դահլիճից շատ ավելի ակնահաճո էր երևում, քան եթերում: Բայց հարցը լուծվեց, քանի որ արդեն երկրորդ համերգը շատ ավելի վառ գույներով ներկայացրինք, ավելի խոշոր պլաններով և գրիմը նույնպես ավելի մեղմացվեց»,- ասաց երգչուհիներին աջակցող խմբում ներգրավված Ռուդիկ Տեր-Գալստյանը:

Իսկ «Շարմ» ընկերության փիար մենեջեր Աննա Ավանեսյանը նշեց, որ քննադատները հիմնականում չեն հասկանում շոու բիզնեսից:

«Նշենք, որ պրոֆեսիոնալ ժյուրիի գնահատականներով` մեր երկիրը զբաղեցրել է 15-րդ տեղը, ու եթե ընդհանուր քվեարկության արդյունքը 10-րն է, դա արդեն ինչ-որ բան նշանակում է»:

Նրա տվյալներով` բազմաթիվ բողոքներ են ստացվում Հունաստանի հայկական համայնքից, որտեղ ասում են, որ շատ մարդիկ են քվեարկել, բայց Հունաստանը արդյունքում 0 միավոր է տվել Հայաստանին:
Էստրադային երգչուհի Սյուզին կարծում է, որ Արշակյաններն ամենապրոֆեսիոնալ երգիչներից են Հայաստանում և համեմատում «Եվրատեսիլի» նախորդ հայ մասնակիցներին:

«Եթե Անդրեն ավելի բեմական էր, Սիրուշոն` ավելի հիթային, իսկ Հայկոն` ավելի ռոմանտիկ, ապա Ինգան և Անուշն էլ ամենալավ ձայնային տվյալներ ունեցողներն էին, հատկապես եթե հաշվի առնենք, որ նրանք չունեին բեք վոկալ»,- ասում է Սյուզին:

Սյուզին համաձայն է, որ կարելի էր ամեն ինչ շատ ավելի բաց երանգների մեջ ներկայացնել, պարողների և երգչուհիների հագուստները տարբեր լինեին, բայց ամեն դեպքում դա չէր որոշիչը. «Փոխվել էր քվեարկության կարգը, դրա համար էլ ամեն ինչ այդպես եղավ»:

Հիշեցնենք, որ նախորդներից այս մրցույթը տարբերվում է նրանով, որ SMS-հաղորդագրությունների միջոցով քվեարկող հեռուստադիտողները գնահատականի միայն կեսն էին որոշում, գործում էր նաև պրոֆեսիոնալ ժյուրի, և հեռուստադիտողների ու ժյուրիի ձայները հաշվվում էին 50:50 սկզբունքով։

Կոմպոզիտոր Արամ Սաթյանը կարծում է` սխալ էր մեկ անգամ ևս ապացուցել, որ հայերն ավելի արևելյան ազգ են, քան հարևան երկրների ժողովուրդները:

«Այս միտումը շարունակվում է երկար տարիներ: Չորրորդ տարին է, ինչ մասնակցում ենք այս մրցույթին, և Արևելքն արդեն խեղդել է: Այստեղ մեղքի իր բաժինն ունի կոմպոզիտորների միությունը, որը ձեռքերը լվացել է և ոչ մի կապ չունի այն ամենի հետ, ինչ կատարվում է»,- այս շաբաթ մամուլի ասուլիսում ասաց Արամ Սաթյանը:

Կոմպոզիտորների միության նախագահ Ռոբերտ Ամիրխանյանը հրաժարվեց որևէ մեկնաբանություն տալուց: