Readers' comments

Would you like to post a comment ? Be the first to share your thoughts.

Post a comment

Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.

Ավանդական վրացական չախոբիլին, որի հիմնական բաղադրամասերը հավի միսն ու սոխն են, հայկական խոհանոցում ամենահաճախ պատրաստվող կերակրատեսակներից է:


«Այս կերակուրի ամբողջ գաղտնիքը սոխի մեջ է»,- ասում է Նվարդը:

Նվարդը կտրատած հավի կտորները լվանալուց հետո` լցնում է կաթսայի մեջ, վրան այնքան ջուր լցնում, որ հավն ամբողջովին ծածկվի ջրով և դնում գազօջախին եփելու:

Մինչ հավը կիսաեփ կլինի, նա մաքրում է 1 կգ սոխը, լվանում և սկսում մանր կիսալուսնաձև կտրատել:

«Պետք է ոչ շատ բարակ կտրատել, ոչ էլ շատ հաստ, որպեսզի եփելուց հետո սոխը հատիկ-հատիկ մնա: Չախոբիլին սոխ շատ է սիրում»,- ասում է նա:

Նա սոխը բաժանում է երկու հավասար մասերի, այնուհետև սկսում կտրատրել: Մի քանի րոպեից կաթսան ամբողջովին լցվում է սպիտակ կտրատած սոխով:

Նա սոխով լի կաթսայի մեջ ավելացնում է 200 գ կարագ և դնում գազօջախին եփելու:

Մինչ սոխը եփում է, Նվարդը մանր կտրատում է մեկ փոքր կծու տաքդեղ և մեկ լոլիկ: Ավելացնում է այդ ամենը գազօջախին դրված սոխին և փայտե շերեփով խառնում:

Հավը եփում է գրեթե 20 րոպեում:

«Չթողեք, որ հավը լրիվ եփի, քանի որ դեռ սոխի հետ էլ պետք է եփի»,- բացատրում է Նվարդը:

Նվարդը սոխառածին ավելացնում է նաև մի քանի հատիկ սև կլոր պղպեղ, մեկ ճաշի գդալ կարմիր պղպեղ, մեկ ճաշի գդալ տոմատի մածուկ և դարձյալ խառնում: Տասը րոպե սոխառածը եփելուց հետո Նվարդն այդ զանգվածի վրա դասավորում է կտրատած հավի կտորները, ավելացնում երկու շերեփ հավի արգանակ ու կաթսայի բերանը փակում:

«Չախոբիլին պետք է գոլորշիով եփի, շատ քիչ ջրով»,- ասում է Նվարդը:

Ու մինչ չախոբիլին շարունակում է եփել, Նվարդն անցնում է վերջին գործողությանը` կտրատում է կանաչին:

«Անհրաժեշտ է ունենալ թարմ մաղադանոս, համեմ, սամիթ: Իսկ ռեհանն ու ծիթրոնը լավ է չոր վիճակում օգտագործել: Այս չորացրած կանաչիները մի այլ տեսակի բուրմունք ունեն ու արտասովոր համ են տալիս կերակուրին»,- նշում է նա:

Մինչև կանաչին չախոբիլիին ավելացնելը Նվարդը կես ճաշի գդալից ավելի աղ է լցնում, հետո` կանաչիները, այնուհետև կափարիչով ամուր ծածկում և գազօջախն անջատում:

Չախոբիլիի բուրմունքը տարածվել է խոհանոցում: Նվարդը լցնում է ափսեները և ասում. «Անուշ արեք»:

Չախոբիլի պատրաստելու համար անհրաժեշտ են
1 ամբողջական հավ
1 կգ սոխ
1 հատ կծու տաքդեղ
1 հատ լոլիկ
Մի քանի հատիկ կլոր սև պղպեղ
Մեկական ճաշի գդալ տոմատի մածուկ և կարմիր պղպեղ
Թարմ կանաչիներ`մաղադանոս, համեմ, սամիթ
Չորացրած ռեհան և ծիթրոն
Աղը` ըստ ճաշակի

Պատրաստման եղանակը

Մեկ ամբողջական հավը կտրատել, լվանալ, վրան ջուր լցնել և դնել գազօջախին եփելու մոտավորապես 15 րոպե: Մինչև հավը կիսաեփ կլինի, կտրատել 1 կգ սոխը, լցնել կաթսայի մեջ, ավելացնել 200 գ կարագ և դնել գազօջախին: Մեկ հատ կծու տաքդեղը և մեկ հատ լոլիկը կտրատել ու ավելացնել սոխին, խառնել գդալով: Սոխառածին ավելացնել նաև մի քանի հատիկ սև կլոր պղպեղ, մեկ ճաշի գդալ կարմիր պղպեղ և տոմատի մածուկ: Մի քանի րոպե եփելուց հետո կտրատած հավի կտորները դասավորել սոխառածի վրա, ավելացնել երկու շերեփ հավի արգանակ և շարունակել եփել մեղմ կրակի վրա: Քիչ անց ավելացնել կտրատած մաղադանոսը, համեմը և սամիթը, ինչպես նաև չորացրած ռեհան ու ծիթրոն: Աղը` ըստ ճաշակի: