11 տարի շարունակ ՀՅԴ կուսակցությունը կազմակերպում է ջահերով երթ` հարգելով Ցեղասպանության զոհերի հիշատակը: Երթի վերջում, ավանդույթի համաձայն, այրում են Թուրքիայի դրոշը, որը կրկնվեց նաև այս տարի` ապրիլի 23-ին:
Որոշ հայեր միշտ էլ այս քայլը համարել են անտեղի քաղաքական ակցիա` արված մի օր, երբ պետք է ավելի շատ հարգանքի տուրք մատուցել զոհվածների հիշատակին, քան թշնամանք ցույց տալ:
Այս տարի, Թուրքիայի դրոշն այրելուց զատ, ակցիայի մասնակիցներն այրեցին նաև Թուրքիայի նախագահի և վարչապետի նկարները: Երթը կազմակերպել էին ՀՅԴ կուսակցության երիտասարդական և «Նիկոլ Աղբալյան» ուսանողական միությունները:
Քննադատելով դրոշի այրման ակցիան` Թուրքիայի վարչապետ Ռեջեփ Թայիփ Էրդողանն ասել է, թե «Այս ակցիան ոտնահարում է միջազգային օրենքը: Նրանք բարդացնում են հարաբերությունների կարգավորման գործընթացը»:
Կիրակի` ապրիլի 25-ին, թուրք ազգայնական «Մեծ միասնություն» կուսակցության անդամները, ի պատասխան հայ երիտասարդների ակցիայի, Ստամբուլի կենտրոնական Թաքսիմ հրապարակում այրել էին Հայաստանի դրոշը:
Ընդ որում` դրոշի այրման ակցիան տեղի էր ունեցել այն նույն հրապարակում, որտեղ նախօրեին մի քանի հարյուր թուրքեր հավաքվել էին հարգանքի տուրք մատուցելու 1915 թվականի զոհերի հիշատակին:
Աննախադեպ այս ցույցի նախաձեռնողները հայտնի թուրք մտավորականներ էին, որոնք հանդես էին եկել` «Սա մեր ցավն է, այս վիշտը բոլորինս է» հայտարարությամբ։
Ըստ թուրք վերլուծաբան իրավապաշտպան Սամի Ֆեյնաշի, որն ընդունում է Հայոց ցեղասպանության փաստը և դատապարտում իր կառավարությանն այն հերքելու համար, ասում է, որ «ամեն դեպքում դրոշի այրումը քաղաքակիրթ ձև չէ»:
«Ամեն անգամ, երբ տեսնում եմ ջահերով երթի նկարները, մարմնովս սարսուռ է անցնում, բայց զայրանում եմ, երբ այրում են դրոշը: Ես զայրացա նաև, երբ Ստամբուլում ազգայնականներն այրեցին Հայաստանի դրոշը. դրանով ոչ մեկին ոչինչ չես ապացուցի, անիմաստ ակցիա է»,- «ԱրմենիաՆաուին» ասում է Ֆեյնաշը:
«Ոչ քաղաքակիրթ» և «ապարդյուն» ակցիա է բնորոշում նաև հայ երիտասարդ ակտիվիստ, «Ժառանգություն» կուսակցության երիտասարդական թևի ղեկավար Դանիել Իոանիսյանը:
«Ես դա համարում եմ անպտուղ, ագրեսիվ ակցիա, որը որևէ կերպ չի բարձրացնում ազգի ոգին, բայց փոխարենը բարդացնում է հարաբերությունների կարգավորման հնարավորությունները, և տպավորություն ստեղծում, թե հայ երիտասարդները պատրաստ չեն նստելու քաղաքակիրթ բանակցությունների սեղանի շուրջը»,- «ԱրմենիաՆաուին» ասում է Իոանիսյանը:
Նման «ծայրահեղ» ակցիաներին դեմ է նաև քաղաքական վերլուծաբան Երվանդ Բոզոյանը, սակայն, չողջունելով հանդերձ, ասում է, որ հասկանում է երիտասարդների զայրույթը, որի պատճառը Թուրքիայի ժխտողական քաղաքականությունն է:
«Դրոշի այրելը բնորոշ է Միջին Արևելքի ծայրահեղականներին, և, իհարկե, ես դա չեմ ողջունում, դա որևէ դրական դիվիդենտ մեզ չի բերում, այլ ընդհակառակը միջազգային հանրության առաջ գցում է հայերի վարկը»,- ասում է Բոզոյանը:
ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանն «ԱրմենիաՆաուին» ասում է, որ դրոշների և նկարների այրումը երիտասարդական միությունների ինքնագործունեության արդյունքն է:
«Դրոշի այրելն աշխարհում ընդունված ակցիա է, առավել ևս` հաշվի առնելով Թուրքիայի ժխտողական քաղաքականությունը, երիտասարդներն այս կերպ իրենց բողոքն են արտահայտում»:
English
Հայերեն
ՎԵՐԵՎ 
Readers' comments
Read commented Article
Post a comment
Read all 21 comments
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.