Ամերիկահայ փաստաբանները հինգշաբթի` հուլիսի 29-ին, հայց են ներկայացրել Դաշնային դատարան ընդդեմ Թուրքիայի կառավարության, ինչպես նաև երկու բանկի` պահանջելով փոխհատուցում այն հայերի ժառանգների համար, որոնց ունեցվածքը խլել են Օսմանյան Թուրքիայից տեղահանման ժամանակ:

Փաստաբանները փորձում են կոլեկտիվ հայցի կարգավիճակ տալ դատական գործին: Փաստաբան Բրայան Կաբատեկն ասել է, թե հնարավոր է գործընթացը տևի երեք տարի:

«Մենք ամեն ինչ անելու ենք հաջողության հասնելու համար»,- հավելել է նա:

Հայցվոր կողմը ներկայացնում են Կարբիս Դավույանը Լոս Անջելեսից և Հրայր Թուրաբյանը Քուինզից (Նյու Յորք): Նրանք իրենց հայցում պնդում են, որ խախտվել են մարդու իրավունքները, ինչպես նաև միջազգային իրավունքները:

Հայցվոր կողմը պահանջում է փոխհատուցել անշարժ գույքի, հողերի, բանկային հաշիվների, արժեքավոր մշակութային ու եկեղեցական գործերի համար, որոնց մի մասն այժմ գտնվում են Թուրքիայի հանրապետության թանգարաններում:

Փաստաբան Մարկ Գիրագոսն ասել է, թե սա իր բնույթով առաջին հայցն է, որը պատասխանատվության է կանչում Թուրքիայի կառավարությանը:

«Գործում ներգրավված բոլոր փաստաբաններն ունեցել են բարեկամներ ու հարազատներ, ովքեր կամ դարձել են Հայոց ցեղասպանության զոհ կամ տեղահանվել են իրենց բնակավայրերից, ինչը գործին որոշ սրություն է տալիս»,- հավելել է փաստաբանը:

Ամբողջական հոդվածն անգլերենով կարդացե´ք այստեղ`