Վերջին մի քանի օրերի ընթացքում ԱՄՆ տարբեր վերլուծաբաններ երկու անգամ հայտարարեցին Ղարաբաղյան պատերազմի վերսկսման հավանականության մասին, ինչը հայաստանցի վերլուծաբաններին տեղիք է տվել կասկածելու, թե դրանք նախազգուշացումներ են ու ճնշումներ` ղարաբաղյան հակամարտության բանակցություններում զիջումներ անելու համար:

Երեքշաբթի Միացյալ Նահանգների ազգային հետախուզության տնօրեն Դենիս Բլերը, հանդես գալով Սենատի հետախուզության հարցերի կոմիտեի լսումներում, հայտարարել է. «Թեև հայ-թուրքական հարաբերությունների կարգավորման գործընթացում անցյալ տարի առաջընթաց է գրանցվել, այն իր ազդեցությունն է թողել Հայաստան-Ադրբեջան զգայուն հարաբերությունների վրա և մեծացնում է ղարաբաղյան հակամարտության վերսկսման վտանգը»:

Իսկ մինչ այղ` նախորդ շաբաթվա վերջին, նման վերլուծություն էր արվել ԱՄՆ-ի «Ստրեթֆոր» հետազոտական կենտրոնի փորձագետների կողմից, որոնք գրել էին, թե «չի բացառվում, որ իրավիճակը Lեռնային Ղարաբաղում դուրս գա գերտերությունների վերահսկողությունից», և որ «այսօր արդեն Հայաստանում էլ չեն բացառում ռազմական գործողությունների վերսկսման հնարավորությունը»:

Հատկանշական է, որ վաղը (փետրվարի 5-ին) Հայաստան է ժամանելու ԱՄՆ-ի պետքարտուղարի տեղակալ Ջեյմս Սթայնբերգը, որի հետ հանդիպումներ կունենան ՀՀ նախագահ Սերժ Սարգսյանը և արտգործնախարար Էդվարդ Նալբանդյանը։

Գերտերության այս առանձնահատուկ ուշադրությունն ու վերջին վերլուծությունները Հայաստանում ընկալում են որպես նախազգուշացում:

Ինչպես «ԱրմենիաՆաուին» պարզաբանում է քաղաքական վերլուծաբան Ստեփան Գրիգորյանը, «սրանք հստակ ուղերձներ են բանակցային գործընթացում առաջընթացի մղելու համար»:

Իսկ քաղաքագետ Երվանդ Բոզոյանը, ամերիկացի փորձագետների վերլուծություններից էլ անկախ, կարծում է, որ այսօր իսկապես մեծացել է պատերազմի վերսկսման վտանգը:

«Իմ այս հիմնավորումը տնտեսական հիմքեր ունի. սովորաբար պատերազմները սկսվում են, երբ կողմերից մեկը (տնտեսապես) ավելի ուժեղանում է։ Տվյալ դեպքում մեր տնտեսական ահռելի անկման, արտաքին քաղաքականության մեջ անհաջողությունների պայմաններում Ադրբեջանի հավակնությունները մեծանում են, հետևաբար` մեծանում է նաև պատերազմի վտանգը»,- «ԱրմենիաՆաուին» ասում է Բոզոյանը: