Ըստ ՌԴ արտաքին գերատեսչության ղեկավարի` Հայաստանի և Ադրբեջանի միջև հարաբերությունները հարթելուն ուղղված ներկայիս բանակցություններում առաջընթաց է արձանագրվում:

«Մենք փորձում ենք օգնել հայերին և ադրբեջանցիներին ընդհանուր ըմբռնման հասնելու հարցում»,- ասել է ՌԴ արտգործնախարար Սերգեյ Լավրովը շաբաթ օրը տեղի ունեցած Մյունխենի Անվտանգության համաժողովի ժամանակ:

«Սա, անշուշտ, շատ դժվար հարց է, բայց տեղաշարժ կա… Փոխըմբռնումն ավելանում է, և այն հարցերի թիվը, որոնք պետք է լուծեն բարձրաստիճան պաշտոնյաները, կրճատվում է, և մենք փորձում ենք օգնել»,- հավելել է Լավրովը` ըստ ԶԼՄ-ների հաղորդագրության (Monsters and Critics.com):

Դեռ անցյալ ամիս ՌԴ նախագահ Դմիտրի Մեդվեդևը հյուրընկալել էր Հայաստանի և Ադրբեջանի նախագահներին` բանակցելու Լեռնային Ղարաբաղի հարցի շուրջ, որից հետո բանակցող կողմերը «ընդհանուր ըմբռնման են հասել» ղարաբաղյան հակամարտության կարգավորման գլխավոր փաստաթղթի պրեամբուլայի (նախաբանի) վերաբերյալ, որը հայտնի է որպես Մադրիդյան սկզբունքներ, և միջազգային միջնորդները` Ռուսաստանը, ԱՄՆ-ը և Ֆրանսիան, հուսով են, որ այդ պրեամբուլան ձգձգված ղարաբաղյան հակամարտության հարցում խաղաղ շրջանակային համաձայնագիր կդառնա:

Այդուհանդերձ, Սոչիի բանակցություններից առաջ և հետո Բաքվի պաշտոնյաներն հոխորտում են, որ եթե Երևանը չհամաձայնի Լեռնային Ղարաբաղի հարցում կարևոր զիջումների գնալ, ապա հակամարտությունը լուծելու նպատակով Ադրբեջանը կարող է զենքի դիմել: Միևնույն ժամանակ Հայաստանի իշխանությունները անտեսում են հարևանի ռազմատենչ հռետորաբանությունը` նշելով, որ հայկական բանակը կարող է դիմակայել յուրաքանչյուր ռազմական ագրեսիայի, և որ Բաքվի ցանկացած գործողություն աղետալի հետևանքներ կունենա հենց նրա համար: Հայ պաշտոնյաները նաև հորդորում են Թուրքիային` չշաղկապել Հայաստանի հետ հարաբերությունների կարգավորումը Լեռնային Ղարաբաղի բանակցություններում առաջընթացի հետ:

Այս բանավոր «պատերազմների» և, հավանաբար, տարածաշրջանում տիրող ընդհանուր իրավիճակի խորը վերլուծության հիման վրա` ԱՄՆ ազգային հետախուզության տնօրեն Դենիս Ս. Բլերը փետրվարի 2-ին Սենատի հետախուզության հարցերի հանձնախմբում անցկացված բաց լսումների ժամանակ հայտարարեց, որ Կովկասում տիրող դրությունը Հայաստանի և Ադրբեջանի միջև Լեռնային Ղարաբաղի վիճելի հարցի շուրջ պատերազմական գործողությունների բռնկման հնարավոր ազդակ կարող է դառնալ:

Ավելի վաղ, ԱՄՆ հետազոտական կենտրոններից մեկը` «Ստրեթֆորը», հանդես եկավ նման զգուշացնող վերլուծությամբ, թե ղարաբաղյան հակամարտությունը կարող է «դուրս գալ վերահսկողությունից Հայաստանի և Ադրբեջանի նախագահների ռազմատենչ հայտարարությունների պատճառով»:

Միևնույն ժամանակ, շաբաթավերջին անցկացված Մյունխենի Անվտանգության համաժողովում Ադրբեջանի նախագահ Իլհամ Ալիևը փորձել է հիմնավորումներ գտնել, թե ինչու է իր կառավարությունը Լեռնային Ղարաբաղի հարցն արագ լուծելու նպատակով ճնշումներ գործադրում միջազգային հանրության վրա, ի թիվս որոնց` ԵԱՀԿ Մինսկի խմբի:

Էներգետիկ ոլորտին վերաբերող քննարկումների ժամանակ իր դիտարկումներում Ալիևն ասել է, որ Հայաստանի և Ադրբեջանի միջև շարունակվող հակամարտությունը Լեռնային Ղարաբաղի հարցի շուրջ տարածաշրջանային անվտանգությանն ու զարգացմանը ներկայացնող «գլխավոր սպառնալիքն է»:

Նավթային մագնատ երկրի նախագահը շարունակել է պնդել, որ վերջին 2 տասնամյակում հայկական զորքերի ներկայությունը Լեռնային Ղարաբաղում խաթարել է «տարածաշրջանային լիակատար համագործակցությունը» և կարող է «վնասել Բաքվի հետագա էներգետիկ նախագծերին»:

Մինչ այդ, դարձյալ Մյունխենում ՌԴ արտգործնախարար Լավրովը կրկնել է ողջ կովկասյան տարածաշրջանում լարվածությունը թուլացնելու Մոսկվայի պատրաստակամությունը:

«Բոլոր մարդիկ, որոնք դարեր շարունակ ապրել և ապրելու են այնտեղ, պետք է ապրեն խաղաղության մեջ`միմյանց հետ համագործակցելով և ազատ շփվելով»: