ԼՂՀ հերթական խորհրդարանական ընտրությունները ընդդիմության բացարձակ բացակայությամբ կտարբերվեն նախորդ չորս ընտրություններից, որոնք նախկինում անցկացվել են հայկական պետությունում`1991 թ. Բաքվից անկախանալուց և իր առաջին օրենսդիր մարմինը ստեղծելուց հետո: Մայիսի 23-ին Ղարաբաղում կանցկացվեն հերթական խորհրդարանական ընտրություններ:

Շատերը Ղարաբաղում արդարացնում են ընդդիմության բացակայությունը ռազմական դրությամբ, որում հանրապետությունը շարունակում է ապրել մոտ 16 տարի այն բանից հետո, երբ զինադադար կնքեց Ադրբեջանի հետ: Ղարաբաղը նաև ազգային համերաշխության կարիք ունի, մինչդեռ ընդդիմության գործառույթը, շատերի կարծիքով, միայն հասարակության պառակտումն է և արտաքի ուժերի շահերին ծառայելը:

Արցախի իշխող` Ժողովրդավարական կուսակցության նախագահ, Ղարաբաղի խորհրդարանի խոսնակ Աշոտ Ղուլյանը կոչ է անում ղարաբաղցի հայերին արհեստականորեն չբաժանել ժողովրդին «յուրայինների և օտարների»:

«2007 թ. նախագահի ընտրությունները ցույց տվեցին, որ մեր ժողովուրդը ավելի շատ համերաշխության կարիք ունի» ,- ասել է խոսնակը: Ըստ նրա տեղակալ, «Ազատ հայրենիք» կուսակցության ներկայացուցիչ Ռուդիկ Հյուսնունցի` Արցախյան շարժումը ընդդիմություն չունի, իսկ քանի դեռ շարժման խնդիրները հրատապ են Ղարաբաղում, ընդդիմությունն այստեղ անելիք չունի:

ՀՅԴ Արցախի կենտրոնական կոմիտեի ներկայացուցիչ Դավիթ Իշխանյանը հայտարարում է, որ երբ երկրի առաջ գոյատևելու և սոցիալական պետություն կառուցելու խնդիր կա դրված, ընդդիմություն հասկացությունն իր դասական իմաստով կորցնում է իմաստը: Դաշնակցությունը միակ կուսակցությունն է Ղարաբաղում, որն իրեն «կառուցողական ընդդիմություն» է հռչակել:

Ղարաբաղի խորհրդարանում 33 պատգամավոր կա, ընդ որում, 22-ն ընտրվել են համամասնական ցուցակով, 11-ը` միամանդատ ընտրատեղամասից: Այժմ խորհրդարանում ներկայացված է չորս կուսակցություն` Արցախի ժողովրդավարական կուսակցությունը (ԱԺԿ), «Ազատ հայրենիքը», ՀՅԴ-ն (1 պատգամավոր) և «Շարժում 88»-ը (1 պատգամավոր): Սկզբում ԱԺԿ-ն 15 մանդատ ուներ, «Ազատ հայրենիքը»` 12, սակայն մեկ տարի առաջ ԱԺԿ խմբակցությունից նոր խումբ առանձնացավ` «Արցախատունը»:

Ներկայիս խորհրդարանում ընդդիմությունը միայն Գեղամ Բաղդասարյանն է, որն ընտրվել է «ՀՅԴ-Շարժում 88» դաշինքից, սակայն հետո դարձել է անկախ պատգամավոր:

Ինչպիսի՞ն կլինի ուժերի դասավորությունը նոր խորհրդարանում: Այս հարցի պատասխանը Ղարաբաղում շատերին է հետաքրքրում:

ԼՂՀ արտաքին քաղաքականության և անվտանգության հանրային խորհրդի նախագահ Մասիս Մայիլյանը, որը 2007 թ. նախագահի ընտրություններում ներկայիս նախագահ Բակո Սահակյանի գլխավոր մրցակիցն էր, հայտարարել է, թե չի պատրաստվում մասնակցելու ընտրություններին:

«Գործադիր իշխանությունը ուժեղ լծակներ ունի խորհրդարանի ձևավորման գործընթացում: Այդ պատճառով, նույնիսկ խորհրդարանում մեծամասնություն կազմելով, մեզ հազիվ թե հաջողվի իրականացնել մեր բարեփոխումների ծրագիրը: Առավելևս դժվար է բարեփոխումներ անցկացնել այն դեպքում, երբ խորհրդարանում փոքրամասնություն ես, դե իսկ ես էլ երբեք ընդդիմադիր չեմ եղել, ավելի շուտ բարեփոխումների ակտիվ կողմնակից եմ եղել»,- նշել է Մայիլյանը:

«Նոր խորհրդարանում, ինչպես և ներկայիս խորհրդարանում, չի արտացոլվի ԼՀՂ ողջ քաղաքական սպեկտրի դիրքորոշումը: Փոխարենը` չմասնակցելով` մենք թույլ չենք տա բարդութավորված պաշտոնյաներին և տարատեսակ «գործիչներին» զբաղվելու ընտրական օրենսգրքի զանգվածային խախտումներով հօգուտ իշխանամետ թեկնածուների և կուսակցությունների»,- նշել է նա:

Վերջերս խորհրդարանը փոփոխություններ ու լրացումներ է կատարել ընտրական օրենսգրքում, որի համաձայն`կուսակցությունների համար անցողիկ շեմը նվազել է 10 տոկոսից մինչև 6 տոկոս, իսկ քաղաքական դաշինքների համար` 15-ից 8 տոկոս: Սա դեպի խորհրդարան ճանապարհ կբացի որոշ փոքր կուսակցությունների, ինչպիսին, ասենք` կոմունիստական, կամ Մուրադ Պետրոսյանի «Բարոյական վերածնունդի» կամ էլ Կարեն Օհանջանյանի «Սոցիալական անկախության» պես գաճաճ կուսակցությունների համար: Արդեն հայտնվել է նոր Քրիստոնեա-դեմոկրատական կուսակցություն, որը ևս ձգտում է խորհրդարան մտնել: Կոմունիստական կուսակցության առաջին քարտուղար Հրանտ Մելքումյանը հայտարարել է, որ խորհրդարանում պակասում են ձախ ուժերը:

Սակայն, ամեն դեպքում, խաղադրույքը կդրվի միամանդատ ընտրատեղամասերի վրա: Նույն այդ ընտրական օրենսգրքի փոփոխությունների համաձայն` փոխվել է համամասնական և մեծամասնական տեղերի դասավորությունը` 22:11-ը դարձել է 17:16: Հավանաբար, նախընտրական պայքարն ընթանալու է զուտ անձնական հարթության վրա`նախագահը կփորձի խորհրդարան անցկացնել իրեն հավատարիմ մարդկանց: Սակայն ժողովրդի շրջանում արդեն խոսում են, որ ներկայիս ընտրություններն Արցախի պատմության մեջ կարող են ամենագորշը և կանխատեսելին լինել: