Ղարաբաղում հուլիսն սկսվել է «Ղարաբաղ-տելեկոմի»` Ղարաբաղում բջջային և ինտերնետ կապի միակ օպերատորի գնային քաղաքականության և կապի որակի դեմ դժգոհությամբ:
Լիբանանյան կապիտալով ընկերությունը, որի գործադիր տնօրենը Ռալֆ Յիրիկյանն է («ՎիվաՍել-ՄՏՍ»-ի գործադիր տնօրեն), Ղարաբաղի կապի շուկա է մուտք գործել 2002 թ. :
Ընկերությանը բաժին էին հասել մի քանի տասնյակ հազար ֆիքսված համարներ, հին ավտոմատ հեռախոսակայան, խորհրդային հեռախոսավարուհիներ, ինչպես նաև կապի շուկայում մենաշնորհ: Այդ ժամանակից ընկերությունն ավելի քան 38 մլն դոլար է ներդրել` Ղարաբաղում հայտնվել է բջջային կապ, և այսօր 140 հազար բնակչության 60 հազարն օգտվում են բջջային հեռախոսից:
Սակայն «Ղ-տելեկոմի» աշխատանքային պայմանագիրը կնքվել է անհասկանալի և շուկայականից հեռու պայմաններում: Ընկերության սեփականատեր լիբանանցի Պիեր Ֆատուշը գործի մեջ բավական մեծ միջոցներ է դրել, սակայն այն տարիների Ղարաբաղի իշխանությունների հետ նրա պայմանագրի պայմանների մասին ոչինչ հայտնի չէ: Որքա՞ն է կառավարության մասնաբաժինը կամ առանձին անդամների շահաբաժինը` հայտնի չէ: Միայն լուրեր կան, որ պայմանագիրը ստորագրել են այն ժամանակվա նախագահ Արկադի Ղուկասյանը և վարչապետ Անուշավան Դանիելյանը: Նաև հայտնի է, որ կառավարությունն արդեն 8 տարի է, չնայած մենաշնորհին, ինչ փորձում է չմիջամտել «Ղ-տելեկոմի» գործերին և նրա գնային քաղաքականությանը:
Հուլիսի 11-ին ԼՂՀ վարչապետ Արա Հարությունյանի և «Ղ-տելեկոմի» գործադիր տնօրեն Ռալֆ Յիրիկյանի համատեղ մամուլի ասուլիսի ժամանակ հաստատվել է նման պայմանագրի առկայության փաստը: Ղարաբաղի վարչապետը հաստատել է, որ պայմանագիրը գոյություն ունի, սակայն «մենք չենք հրապարակի այն` ելնելով քաղաքական նկատառումներից»:
Մամուլի ասուլիսն անցկացվել է այն բանից հետո, երբ Ղարաբաղի երիտասարդները բողոքի ակցիա են անցկացրել սոցիալական ցանցերում: Ֆեյսբուքում բացվել է «Ո´չ թալանին» էջ, որին միացել են կապի որակից դժգոհող համացանցից օգտվողները: Ղարաբաղում կապն իսկապես վատ է, և Յիրիկյանը կապում է դա նրա հետ, որ «Ղ-տելեկոմը» ստիպված է ինտերնետ գնել արբանյակից, ինչը բավական թանկ է, քանի որ Ղարաբաղը դեռ չճանաչված պետություն է: Ղարաբաղում նաև անլար ինտերնետ չկա: Իսկ բջջային կապի գները միջինը երկու անգամ բարձր են, քան Հայաստանում:
Յիրիկյանը խոստանում է, որ շուտով Ղարաբաղում կիջեցվեն գները, կբարձրացվի կապի որակը, և կհայտնվի անլար ինտերնետ:
Կարծես թե ամեն ինչ հիանալի է, սակայն մի հարց մնում է չպարզված. ո՞վ և ի՞նչ իրավունքով է աստղաբաշխական եկամուտներ ստանում «Ղ-տելեկոմից»: Ռալֆ Յիրիկյանը պնդում է, որ «Ղ-տելեկոմի» բաժնետեր չէ, պայմանագիր չի ստորագրել և աշխատում է հասարակական հիմունքներով` աշխատավարձ չստանալով: Բացի այդ, Յիրիկյանը եկամտի մի մասը տրամադրում է բարեգործական նպատակներին:
Ղարաբաղում համարում են, որ թեպետ բողոքի ակցիան հիմնավորված է, սակայն դրա հիմնական թիրախը Յիրիկյանն է: Ասում են, թե նա նույնիսկ մտադիր էր հրաժարական տալ: Ընկերության աշխատակիցներն ամսվա սկզբին բողոքի ակցիա են անցկացրել` պահանջելով թույլ չտալ Յիրիկյանի հրաժարականը, որը մեծ հարգանք և սեր է վայելում: Հենց նա է Ղարաբաղում բիզնեսի մշակույթ մտցրել, նա է սահմանել ընկերության սոցիալական պատասխանատվության համակարգը:
Վարչապետ Արա Հարությունյանը մամուլի ասուլիսի ժամանակ հայտարարել է, որ իրենք Յիրիկյանի դեմ ոչինչ չունեն, պարզապես «Ղ-տելեկոմը» պետք է վերանայի գնային քաղաքականությունը և բարձրացնի կապի որակը: Սակայն, նա չի հերքել այն լուրերը, որ ֆրանսիական «Օրանժը» կարող է հայտնվել Ղարաբաղի շուկայում: Վարչապետն ուղղակի ասել է, որ չճանաչված ԼՂՀ-ի համար դա քաղաքականապես շատ դժվար կլինի:
English
ՎԵՐԵՎ 
Readers' comments
Post a comment
Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.