ՄԱԿ-ի Արդարադատության միջազգային դատարանի կողմից Կոսովոյի մասին որոշումն ընդունելուց հետո հաջորդ օրը` հուլիսի 23-ին, Ղարաբաղում համազգային հանրահավաք պետք է անցկացվեր: Մարդիկ արդեն պատրաստվում էին դուրս գալու փողոցներ, Երևանից Ստեփանակերտ էր ժամանել լրագրողների մեծ խումբ, սակայն հանրահավաքը, առանց բացատրության, չեղյալ էր հայտարարվել:

Հանրահավաքի փոխարեն Ստեփանակերտում տեղի են ունեցել ԼՂՀ նախագահի և խորհրդարանական երեք կուսակցությունների խմբակցությունների ղեկավարների մամուլի ասուլիսները: Երկրի ղեկավարությունն ընդունել է, որ Կոսովոյի առանձնացման օրինականության մասին ՄԱԿ-ի միջազգային դատարանի որոշումը ղարաբաղյան պայքարում անկախություն ճանաչման ուղենիշը կդառնա: Ընդ որում, քաղաքական ուժերն ընդգծել են, որ Ղարաբաղը չի պատրաստվում դատարան դիմել ինքնորոշման իր իրավունքը ճանաչելու համար. Ղարաբաղում կարծում են, որ արդեն իրացրել են այդ իրավունքը, տառապել են, նվաճել այն, և մնում է միայն ճանաչել երկրի անկախությունը:

ԱՄՆ-ը և Եվրամիությունն պաշտպանել են ՄԱԿ-ի դատարանի որոշումը, դեմ է հանդես եկել Ռուսաստանը: Ընդ որում, ոչ ոք չի վիճարկում որոշման ճիշտ լինելը, պարզապես բոլորն ասում են, որ այն դեռևս չճանաչված երկրների համար կարող է բացել «Պանդորայի տուփը»: Հուլիսի 22-ին ԱՄՆ պետդեպարտամենտի ներկայացուցիչ Ֆիլիպ Քրոուլին, պատասխանելով այն հարցին, թե արդյոք Հաագայի որոշումը կարո՞ղ է տարածվել մյուս համանման դեպքերի վրա և ազգայնական շարժումներ առաջացնել Եվրոպայի մնացյալ մասում, ասել է. «Ո´չ, կարճ կպատասխանեմ` ո´չ»:

«Կարելի է նշել ՌԴ արտգործնախարարության արտահայտած արդարացի փաստարկները, որ ՄԱԿ-ի միջազգային դատարանը չի քննարկել Կոսովոյի միակողմանի հռչակած անկախության իրավազորության հարցը, չի անդրադարձել նման ինքնահռչակման հնարավոր հետևանքներին, և միջազգային դատարանն այդպես էլ չհայտարարեց` Կոսովոն պետությո՞ւն է, թե՞ ոչ»,- ասել է Ադրբեջանի արտգործնախարարության մամուլի ծառայության ղեկավար Էլհան Պոլուխովը:

Այդուհանդերձ, մամուլի ասուլիսի ժամանակ ԼՂՀ նախագահ Բակո Սահակյանը հայտարարել է, որ անկախ Կոսովոյի ճանաչումից, Ղարաբաղը կշարունակի իր անկախության միջազգային ճանաչման ջանքերը:

Նախագահ Սահակյանը հավաստիացրել է, որ Ղարաբաղի դիրքորոշումն այս տարիների ընթացքում չի փոխվել` Արցախի անկախությունը և անվտանգությունը սակարկության առարկա չեն կարող լինել: «Մենք ԼՂՀ վերջնական կարգավիճակը չենք դիտում նախկին ԼՂԻՄ տարածքների շրջանակներում»,- ասել է նա:

Նախագահը նաև հայտարարել է, որ ՀՀ-ի կողմից Ղարաբաղի ճանաչումը չպետք է ինքնանպատակ լինի: «Հայրենիք» խմբակցության ղեկավար Արթուր Թովմասյանի կարծիքով` Հայաստանի խորհրդարանը կարող է հիմք ընդունել միջազգային դատարանի որոշումը և սկսել ԼՂՀ ճանաչման գործընթացը:

Ղարաբաղում համոզված են, որ անհրաժեշտ է փոխել Ադրբեջանի հետ միջազգային միջնորդությամբ ընթացող բանակցությունների ձևաչափը, և Ղարաբաղը պետք է միանա դրանց` որպես լիիրավ կողմ: Ղարաբաղի խորհրդարանական «Ժողովրդավարություն» խմբակցության անդամ Վահրամ Աթանեսյանն ասում է, որ այս պահից սկսած Ղարաբաղը կարող է ավելի մեծ հիմնավորմամբ պնդել բանակցություններին իր մասնակցությունը:

Դաշնակցություն խմբակցության ղեկավար Արմեն Սարգսյանը հայտարարել է. «Ղարաբաղը պետք է լինի բանակցող կողմ, իսկ Հայաստանը պետք է մասնակցի բանակցություններին հստակ որոշված իրավաբանական շրջանակներում` որպես Ղարաբաղի անկախության և անվտանգության երաշխավոր»:

ԼՂՀ արտաքին քաղաքականության և անվտանգության հանրային խորհրդի նախագահ Մասիս Մայիլյանն ընդգծել է, որ Հայաստանը լավ հիմքեր ունի բանակցություններ սկսելու Պրիշտինայի հետ` Կոսովոյի անկախությունը Երևանի կողմից ճանաչելու և Պրիշտինայի կողմից ԼՂՀ անկախությունը ճանաչելու կապակցությամբ: «Անցած երկու տարում Կոսովոյի ճանաչման հարցում Հայաստանի ցուցաբերած զսպվածությունը շոշափելի արդյունք չի տվել, այն դեպքում, երբ Սերբիան հաջողությամբ զարգացրել է իր հարաբերություններն այն երկրների հետ, որոնք առաջինն են ճանաչել Կոսովոյի անկախությունը (Թուրքիա, ԱՄՆ, Եվրամիության երկրներ)»,- ասել է Մայիլյանը:

ԼՂՀ արտգործնախարարությունն էլ իր հերթին հանդես է եկել հայտարարությամբ, որում նշված է, որ «Արցախի ժողովրդի` իր սեփական պետությունն ունենալու և կառուցելու, ինչպես նաև սեփական ճակատագիրը տնօրինելու իրավունքը, անկասկած, կճանաչվի միջազգային հանրության կողմից, քանի որ այն լիովին իրականացվել է միջազգային իրավունքի հիմնարար սկզբունքներին համապատասխան և հանդիսանում է արդար ու տառապյալ նվաճում»: