Հայտնի վերլուծաբան և «ԱրմենիաՆաուի» թղթակից Արիս Ղազինյանի վերջին աշխատությունը Ադրբեջանի պատմությունը նոր դիտանկյունից է ներկայացնում, որը, ըստ հեղինակի` անհրաժեշտ է Հայաստան-Ադրբեջան ներկայիս հարաբերությունները ճիշտ ընկալելու համար:

Արիս Ղազինյանի «Полигон «Азербайджан» («Հրաձգարան «Ադրբեջան») գրքի շնորհանդեսը տեղի ունեցավ ուրբաթ` փետրվարի 10-ին, «Մարիոթ-Արմենիա» հյուրանոցում: (Полигон-ը փոխաբերական իմաստով նշանակում է փորձադաշտ, հեղինակը փորձել է ներկայացնել Ադրբեջանը որպես պանթուրքիզմի գաղափարախոսության «փորձադաշտ»:)

42-ամյա Ղազինյանն ասում է, որի իր 615 էջանոց գիրքը ադրբեջանական պետականության և ազգի ստեղծման և պատմական զարգացման որոշ առանձնահատկությունների մասին է, առանց որոնց, ըստ հեղինակի, հնարավոր չէ վերլուծել հայ-ադրբեջանական հարաբերությունների ողջ սպեկտրը:

«Վերջին տարիներին հայ-ադրբեջանական հարաբերությունների թեմայով բազմաթիվ ուսումնասիրություններ են կատարվել, որոնցում հարաբերությունները դիտարկվում են առանձին վերցված ղարաբաղյան խնդրի պրիզմայով: Նման աշխատությունների հիմնական թերությունն այն է, որ հնարավոր չէ միայն ղարաբաղյան հակամարտության հարթության վրա բացատրել երկկողմ հակասությունների ողջ սպեկտրը»,- ասում է Ղազինյանը:

«Ղարաբաղի հարցը հայ-ադրբեջանական հակամարտության պատճառը չէ, այլ հետևանքը»:

Անհնարին է, օրինակ, միայն Լեռնային Ղարաբաղի խնդրից ելնելով հասկանալ պատմաբաններին հասցեագրված Հեյդար Ալիևի (Ադրբեջանի նախկին նախագահ և ներկայիս նախագահի հայրը) կոչի բնույթն ու ուղղվածությունը: «Պետք է ստեղծել նման գործեր, որպեսզի նրանք միշտ ապացուցեն, որ Հայաստանի հողերը պատկանում են Ադրբեջանին: Մենք պետք է դա անենք»:

Գիրքը լույս է տեսել ՀՀ նախագահին առընթեր տեղեկատվության և հասարակական կապերի կենտրոնի աջակցությամբ: