Հայաստանից արտագնա աշխատանքի մեկնողների թիվն այս գարնանն անցյալ տարվա համեմատ նվազել է 56 տոկոսով:

Նման շրջադարձը Հայաստանի աշխատանքային արտագաղթի միտումներում ենթադրում է, որ արտասահմանում հնարավորությունների նվազման պատճառով այս տարի ավելի շատ մարդ աշխատանք կփնտրի Հայաստանում:

Հայաստանի միգրացիոն գործակալության ղեկավարն ասում է, որ վերջին տարիներին առաջին անգամ հանրապետությունից մեկնողների ու հանրապետություն ժամանողների դրական մնացորդ է գրանցվել մարտին, երբ արտագնա աշխատողները, որպես կանոն, վերադառնում են իրենց արտասահմանյան աշխատանքին` հայրենիքում կարճատև ձմեռային արձակուրդից հետո:

«Միգրացիան շատ զգայուն երևույթ է,- ասում է ՀՀ տարածքային կառավարման նախարարության միգրացիոն գործակալության պետ Գագիկ Եգանյանը: - Սոցիալական, տնտեսական և քաղաքական փոփոխվող գործընթացներն արտացոլվում են միգրացիոն երևույթների վրա: Բնականաբար, այնպիսի կատակլիզմը, ինչպիսին ներկայիս ճգնաժամն է, չէր կարող իր ազդեցությունը չունենալ»:

Եգանյանի խոսքով` ճգնաժամի հետևանքներն իրենց մաշկի վրա առաջինը զգացին վաղ գարնանն արտագնա աշխատանքի մեկնողները, որոնք տուն էին վերադառնում ուշ աշնանը:

Հայաստանից արտագնա աշխատանքի մեկնողների մոտ 95 տոկոսն աշխատանք է փնտրում Ռուսաստանում, որից 60-70 տոկոսը` շինարարության ոլորտում: Ռուսաստանը hամարվում է ճգնաժամից առավել տուժած երկրներից, որտեղ այն արտահայտվում է անկմամբ շինարարության և այլ ոլորտներում, որոնք համալրվում էին արտագնա աշխատողներով:

Հայաստանի միգրացիոն գործակալությունն իր գնահատականները տալիս է ըստ ուղևորահոսքերի մասին տեղեկությունների, որոնք ստացվում են սահմանակետերից:

Եգանյանի հավաստմամբ` որպես կանոն, բացասական սալդոյի ամենամեծ թիվը գրանցվում է փետրվար-ապրիլ ամիսներին:

Բացասական սալդոն` երբ մեկնողների թիվը գերազանցում է ժամանողների թվին, 2008-ին 2007-ի համեմատությամբ (փետրվար-մարտ ամիսներին), աճել էր 46 տոկոսով:

Այս տարի գրանցվել է հակառակ միտումը` 2008-ի փետրվար-ապրիլ ամիսների համեմատ արձանագրվել է 56 տոկոս աճ` ասում է Եգանյանը:

Այսպես` մարտին արձանագրվել է միգրացիայի դրական մնացորդ` 1200 մարդ թվաքանակով: Այս տարի գրեթե 70.000 մարդ արտագնա աշխատանքի չի մեկնել` համալրելով գործազուրկների բանակը:

«Աշխատանքային արտագաղթի» նվազման լուրջ հետևանքներից մեկն էլ արտասահմանից Հայաստան մտնող տրանսֆերտների ծավալի կրճատումն է:

(Պաշտոնական տվյալներով` 2009-ի հունվար-մայիս ամիսներին տրանսֆերտների ծավալը 2008-ի նույն ժամանակաշրջանի համեմատ նվազել է մոտ 40 տոկոսով:)

«Վերջին 5-6 տարիներին տրանսֆերտները տարեկան միջին հաշվով աճում էին 25 տոկոսով: Անցյալ տարվա չորրորդ եռամսյակում երրորդի համեմատ գրանցվեց 20 տոկոսից ավելի կրճատում: Մինչդեռ բոլորս էլ գիտենք, որ սովորաբար տարեվերջին ավելի շատ տրանսֆերտներ են գալիս Հայաստան,- ասում է Եգանյանը: - Արդեն չորրորդ եռամսյակում բանկային խողովակներով ֆիզիկական անձանց անունով փոխանցումները 530 մլն դոլարից նվազեցին 430-ի, այն դեպքում, երբ պետք է հասնեին, եթե նախորդ տարվա միտումը պահպանվեր, 700 մլն դոլարի»:

Երևույթը շարունակվում է նաև այս տարի: Հունվարին փոխանցումները կրճատվել են 25, ապրիլին` 39 տոկոսով: Տրանսֆերտների 80 տոկոսը ստացվում է Ռուսաստանից:

Ըստ միգրացիայի վարչության` այս տարի նվազել են նաև ուղևորահոսքերը, ի տարբերություն նախորդ տարիների, երբ գրանցվում էր կտրուկ աճ:

«Այս տարի հոսքերը կրճատվել են 1-2 տոկոսով (7600 մարդ): Գուցե թիվը մեծ չէ, բայց երևույթի առումով խոսում է այն մասին, որ ավելի քիչ թվով մարդիկ հնարավորություն ունեն ուղևորություններ անելու: Սա ևս ճգնաժամի հետևանք է»,-ասում է Եգանյանը: