Հայաստանը հերթական անգամ կորցրեց իր հնարարավորությունը` հնարավորություն տալով հյուրերին երկու անգամ հաշվի մեջ առաջ անցնել ու Երևանից տանել բաղձալի երեք միավորը: Բարեբախտաբար թե դժբախտաբար, այս վերջին պարտությունը Հայաստանին հնարավորություն է տալիս մեղմելու թուրքական կողմի ագրեսիվ տրամադրվածությունը, երբ Հայաստանի ազգային հավաքականը հաջորդ ամիս, անցնելով Արաքս գետը, կմասնակցի երկու ժողովուրդների միջև հաշտեցման գործընթացին աջակցող մարզական իրադարձությանը:

Շաբաթ երեկոյան «Վազգեն Սարգսյան» հանրապետական մարզադաշտում ՖԻՖԱ-ի աշխարհի գավաթի 2010 ընտրական փուլի հանդիպման 2:0 հաղթանակը Բոսնիա-Հերցեգովինայի համար մեծ քայլ էր, որպեսզի թիմը կարողանա հաջողությամբ շարունակել պայքարը և ամրապնդվել երկրորդ տեղում: Այսպիսով բալկանյան թիմը հույս ունի, որ, «փլեյ օֆ»-ում հաղթանակ տանելու դեպքում առաջին անգամ կմասնակցի Աշխարհի գավաթի եզրափակչի որակավորման փուլին: Հաղթարշավը շարունակող բալկանյան թիմը, հաջողության դեպքում, հնարավորություն չի տա իրենց ուժեղ մրցակցին` Թուրքիային, մասնակցել գալիք տարվա ամռանը Հարավային Աֆրիկայում կայանալիք Աշխարհի գավաթի որակավորման փուլին:

Բոսնիա-Հերցեգովինան, որը Եվրոպական գոտու 5-րդ խմբի մրցաշարում դեռ երեք խաղ պետք է անցկացնի, շարունակում է չորս միավորով առաջ մնալ Թուրքիայի հավաքականից, որը 2002 թ. Աշխարհի գավաթի բրոնզե մեդալակիրն է և Եվրո-2008-ի կիսաեզրափակչի մասնակիցներից: Չորեքշաբթի Զենիցայում կայանալիք նրանց մրցապայքարը կարող է որոշել, թե ով կլինի երկրորդ տեղում` այս խմբի ամենահավանական հաղթող` Եվրոպայի չեմպիոն Իսպանիայից հետո, և կշարունակի պայքարը «փլեյ օֆ» փուլում:

Հետաքրքրական է, որ եթե Բոսնիա-Հերցեգովինան սեպտեմբերի 9-ին հաղթանակ տանի, անհասանելի կդառնա Թուրքիայի համար, որին կմնա ևս երկու խաղ, այդ թվում` Հայաստանի հետ: Այսպիսով, հոկտեմբերի կեսին Բուրսայում կայանալիք «աշխարհաքաղաքականորեն զգայուն» հանդիպման` մարզական առումով լարվածությունը կթուլանա: (Թեև Թուրքիան հայտնի է որպես ագրեսիվ մրցակից, հատկապես սեփական հարկի տակ` անկախ խաղի կարգավիճակից:)

Հայաստանը որակավորման փուլում հաղթելու բոլոր հնարավորություններն արդեն կորցրել է` կրելով մի քանի ծանր պարտություն մրցապայքարի սկզբում, այդ թվում` Թուրքիայից` 0:2 հաշվով: Այդ խաղը, որը անցկացվեց 2008 թ. սեպտեմբերի 6-ին Երևանում, այդուհանդերձ, սկիզբ դրեց երկու երկրների միջև «ֆուտբոլային դիվանագիտությանը», որի արդյունքում կողմերը համաձայնեցին սկսել «ներքին քաղաքական քննարկումներ»` դիվանագիտական հարաբերություններ հաստատելու և երկկողմ հարաբերությունները զարգացնելու մասին երկու արձանագրությունների առնչությամբ: Ենթադրվում է, որ Անկարայի և Երևանի միջև փաստաթուղթը կստորագրվի, երբ Հայաստանի նախագահ Սերժ Սարգսյանը հոկտեմբերի 14-ին այցելի Թուրքիա` ներկա գտնվելու ֆուտբոլային հանդիպմանը:

Հայաստանի ազգային հավաքականը ներկայումս յոթ խաղից մեկ միավոր է վաստակել: Որակավորման փուլի ազգային վեց հավաքականների (այդ թվում` Բելգիայի և Էստոնիայի) շարքում Հայաստանը վերջին տեղում է: Խիստ անհավանական է, որ մյուս խաղերում Հայաստանի ազգային հավաքականին կհաջողվի հասնել առայժմ 5-րդ տեղում ընթացող Էստոնիայի հավաքականին:

Մի խումբ հայ մարզասերներ, որոնք ներկա էին շաբաթ Երևանում կայացած խաղին, այնքան հիասթափված էին արդյունքից, որ պահել էին «Հերիք է մեզ խայտառակեք» գրությամբ ցուցապաստառ: Նրանք նաև բարձրաձայն պահանջում էին ֆուտբոլի ֆեդերացիայի նախագահի հրաժարականը:

Խաղից հետո մամուլի ասուլիսի ժամանակ Հայաստանի հավաքականի գլխավոր մարզիչ Վարդան Մինասյանն անդրադարձավ մարզասերների հիասթափությանը:

«Եթե իմ հրաժարականը ինչ-որ բան կփոխի, պատրաստ եմ հեռանալ»,- ասաց Մինասյանը` ըստ Sportinfo.am մարզական կայքի:

Նախքան Թուրքիա մեկնելն ու հարաբերությունների կարգավորմանն աջակցող խաղին մասնակցելը` Հայաստանի հավաքականը սեփական հարկի տակ ևս երկու հանդիպում կանցկացնի` սեպտեմբերի 9-ին Բելգիայի, իսկ հոկտեմբերի 10-ին` Իսպանիայի հավաքականների հետ: