Հայերեն որոնողական նոր համակարգի հեղինակները համոզված են` իրենց երախայրիքը աշխարհասփյուռ հայերին միավորող գործիք է դառնալու` միայն իրենց կայքին բնորոշ առանձնահատկությունների շնորհիվ: Սակայն թերահավատներն ասում են, որ նախագիծը քիչ օգուտ կտա, քանի որ արդեն հնարավոր է հայերենով տեղեկատվություն որոնել:

Երեքշաբթի «Հանգույց» ստեղծագործական խումբը հայերին ներկայացրեց իրենց ավելի քան 3 տարվա արդյունքը` «Հանգույց որոնում» ինտերնետային որոնողական համակարգը (http://www.hsearch.am):

Կայքի շնորհանդեսը նշանավորվեց ՀՀ սփյուռքի նախարարության հետ համատեղ ծրագրեր իրականացնելու մասին հուշագրի ստորագրությամբ:

Քննարկում-շնորհանդեսին ներկա սփյուռքի նախարար Հրանուշ Հակոբյանը ողջունեց նախաձեռնությունը:

«Սա այն ոլորտն է, որտեղ մենք որքան էլ փորձենք աշխատանք կազմակերպել, էլի շատ բան կունենանք անելու,- ասաց նա: - Ամենակարևորը` որ մենք կարողանանք համախմբել մեր աշխարհասփյուռ հայությանը: Առաջին անգամ նման հայերեն ծրագիր ենք փորձում իրականացնել: Հայերենը համակարգչային ցանցի կարևոր բաղադրիչը պիտի լինի»:

«Հանգույցի» ղեկավար Մհեր Աբրահամյանը համոզված է, որ իրենց կհաջողվի լուծել սփյուռքի նախարարի առաջադրած խնդիրը` առավելապես հայալեզու ինտերնետի օգնությամբ:

«Մենք դարեր շարունակ ունեցել ենք գոյատևելու և մեր ինքնությունը պահպանելու խնդիր: Ներկա փուլում տեղեկատվական տեխնոլոգիաների զարգացմանը զուգահեռ զարգանում է ինտերնետը, ու մենք դժվարանում ենք դիմակայել ինտերնետային համաձուլմանը: Հիմա հայերի մեծ մասը գրում է լատինատառ հայերեն»,- ասաց Աբրահամյանը:

«Սփյուռքի նախարարության հետ մեր համագործակցության ծրագիրը մի քանի փուլի ենք բաժանել, որով փորձելու ենք լուծել մի քանի խնդիր, բոլորը` հայապահպանության նպատակով»,- հավելեց նա:

«Հանգույց» ստեղծագործական խումբը իրենց հաջողության գրավականն է համարում համակարգի հայկական առանձնահատկությունները, որոնք, ըստ նրանց, բացակայում են անգամ աշխարհում շատ հայտնի որոնողական համակարգերում, ինչպիսիք են Google-ը, Yandex-ը, Yahoo-ն ու այլն:

Համակարգի գլխավոր ծրագրավորող Արտյոմ Չախոյանը նշում է դրանցից մի քանիսը. «Մենք ունենք հայերենով ինֆորմացիայի ավելի ճշգրիտ ու մասնագիտացված մատուցում, այսօրվա դրությամբ` ավելի քան 5000 հայկական կայքերի սպառիչ բազա, հայերեն տառատեսակների ու կոդավորումների ընդհանրացում, ինչը հնարավորություն է տալիս որոնում իրականացնելու հայերեն ցանկացած տառատեսակով»:

«Այս ամենը հնարավորություն կտա հայատառ որոնումների թիվն ավելացնել, ինչի շնոհիվ կնվազի ներկայումս ավելի քան 60 տոկոս կազմող լատինատառ հայերենով իրականացվող որոնումները»,- հավելեց Չախոյանը:

Այդուհանդերձ, ոլորտի ոչ բոլոր մասնակիցներն են «Հանգույցի» հեղինակների նման լավատես կայքի հաջողության հարցում:

Շնորհանդեսին ներկա ծրագրավորող Ռաֆայել Հարությունյանը թերահավատ է կայքի` մեծ թվով օգտագործողներ ունենալու առումով:

«Իհարկե, հեղինակները բավական մեծ աշխատանք են կատարել, բայց նրանք շնորհանդեսին պատրաստ չէին, քանի որ աշխատանքը բավական թերի էր արված, ու, իմ կարծիքով, մարդիկ հիմա պարզապես չեն օգտվի դրանից»,- նշեց ծրագրավորողը, որը նաև ներկա էր երեքշաբթի կայացած քննարկմանը:

Հարությունյանի խոսքով` հիմա կան շատ ավելի լավ որոնողական ծրագրեր, օրինակ` Google-ը կամ Yandex-ը, որոնք բավական հաջողված հայերեն էջերով որոնումների հնարավորություն են տալիս:

«Իսկ այն եզակի էջերը, որոնք հանդիպում են կոդավորված տառատեսակներով, իսկ հեղինակները այս խնդրի լուծումը իրենց կայքի առանձնահատկությունն են համարում, բավական հազվադեպ են հանդիպում ու, իմ կարծիքով, այսօրվա դրությամբ Google-ն ու մյուս որոնողական համակարգերը լիովին բավարարում են պահանջները, որոնք ներկայացնում են հայ օգտագործողները»,- ասաց նա: