Գալիք շաբաթ Հայաստանի հեռահաղորդակցության ոլորտում իր գործունեությունը կսկսի բջջային երրորդ օպերատորը. «Ֆրանս Տելեկոմ» խմբի հիմնական ապրանքանիշ Orange-ին բավական խիստ մրցակցություն է սպասվում:

Հայաստանում արդեն գործող երկու բջջային օպերատորները գրավել են շուկայի մեծ մասը` «ՎիվաՍել-ՄՏՍ»-ը, վերջին տվյալներով, ավելի քան 2 մլն բաժանորդ ունի, իսկ «ԲիԼայն» ընկերությունը, 2009-ի հունիսի տվյալներով` ավելի քան 480 000 բջջային բաժանորդ:

«Մենք կունենանք երկու տեսակ բաժանորդներ` մեր բաժանորդ կդառնան թե բջջային կապից առաջին անգամ օգտվել ցանկացողները և թե նրանք, ովքեր արդեն այլ օպերատորների բաժանորդ են, բայց կցանկանան փորձել նաև մեր ծառայությունները: Մեր ուսումնասիրությունները ցույց են տվել, որ 15 տարեկանների մոտ 20 տոկոսը, օրինակ, դեռ չի օգտվում բջջային կապից»,- իրենց ապագա շուկան նկարագրեց Orange-ի գլխավոր տնօրեն Բրունո Դյութուան:

Իր պաշտոնական մուտքից մեկ շաբաթ առաջ Orange-ը համագործակցության երկրորդ հուշագիրը ստորագրեց բուհերից մեկի` Հայաստանի պետական ճարտարագիտական համալսարանի (ՀՊՃՀ) հետ: (Անցյալ շաբաթ նման հուշագիր էր ստորագրվել նաև Հայ-ռուսական (սլավոնական) համալսարանի հետ:)

«Ես ուրախ եմ հատկապես, որ այս հուշագիրը ստորագրվում է մեր շուկա մտնելուց մեկ շաբաթ առաջ: Թեև մեր ընկերությունը կոմերցիոն է, մեր գործունեության հիմքում ընկած են տեխնոլոգիաները: Ուստի մեզ ձեռնտու է ՀՊՃՀ-ի հետ համագործակցությունը»,- ասաց Դյութուան:

Համագործակցության հուշագրի համաձայն` Orange-ն ու ՀՊՃՀ-ն կիրականացնեն գիտահետազոտական ծրագրեր ու մասնագիտական դասընթացներ իրենց մասնագետների մասնակցությամբ: Բարձր առաջադիմություն ցուցաբերող ուսանողները կկարողանան պրակտիկա անցնել Orange-ում:

«Մարդիկ, որոնց հետ որպես ստաժոր մի քանի ամիս կշփվենք, ավելի տեսանելի կլինեն մեզ համար որպես մասնագետ, ու մենք նրանցից կկարողանանք աշխատողներ ընտրել: Սակայն սա չի նշանակում, որ այլ մասնագետների չենք ընդունելու աշխատանքի»,- «ԱրմենիաՆաուին» ասաց Դյութուան:

ՀՊՃՀ ուսումնական աշխատանքների գծով պրոռեկտոր Ռուբեն Աղգաշյանն «ԱրմենիաՆաուին» ասաց, որ ընկերության ու համալսարանի համագործակցությունը սկսվել էր դեռ 9 ամիս առաջ. «Ինժեներական համալսարան լինելով` մենք չենք համապատասխանի այսօրվա աշխատանքային շուկայի չափանիշներին, եթե չհամագործակցենք նման կազմակերպությունների հետ»,- ասաց նա: