Դրամական բոնուսները, որոնք պետությունը տրամադրում է հուլիսի սկզբից, խիստ արդիական թեմա է դարձել Հայաստանում` չզիջելով նույնիսկ հայ-թուրքական արձանագրություններին: Ինչպես հայտնի է, այդկերպ կառավարությունը նպատակ է հետապնդում խթանելու քաղաքացիների շահագրգռվածությունը` խանութից գնումներ կատարելիս կտրոն պահանջելու համար:

Եվ, ինչպես պարզվել է, այս ոլորտում ևս, ինչպես նաև բազմաթիվ այլ ոլորտներում, հայտնվել են «ճարպիկներ», ովքեր այն իրենց համար շահավետ գործարքի են վերածել:

Բոնուսների վճարումը կատարվում է` կախված կտրոնի վրա նշված գումարի չափից: Մասնավորապես, բոնուսը նախատեսում է 1000 (3.3 դոլար) դրամը գերազանցող յուրաքանչյուր գնման համար հավելյալ միջոցների տրամադրում շահած գումարի 1 տոկոսի չափով: Հիշեցնենք նաև, որ կտրոններով լոտոյի մրցանակային ֆոնդը, որը բնակչությանն է հատկացվում ՀԴՄ-ների միջոցով, կազմում է 115 մլն դրամ (300.261 դոլար):

Ինչպես մամուլի ասուլիսի ժամանակ հաղորդեց կառավարությանն առընթեր Պետական եկամուտների կոմիտեի նախագահի տեղակալ Արմեն Ալավերդյանը, այսօրվա տվյալներով 75.000 քաղաքացիներ իրենց ներկայացրած դրամարկղային կտրոններով սպասում են բոնուսների: Սակայն նրանց մեջ հայտնվել են նաև այնպիսիք, որոնք բոնուս ստանալու չափազանց ֆանտաստիկ հայտ են ներկայացրել:

Այս հայտերի համաձայն` մի քանի օր շարունակ այդ քաղաքացիները յուրաքանչյուր 5 րոպեն մեկ անգամ տասնյակ մեքենաներ են բենզինով լիցքավորել և գնել մի քանի հազար շիշ ոգելից խմիչքներ: Այն հարցին, թե ինչպես կարող էր նման բան պատահել, հետևել է անփոփոխ պատասխանը. «Հարսանիք էր, և ես վճարել եմ և բենզինի, և ալկոհոլի համար»,- հայտարարեց Ալավերդյանը:

Նրա խոսքով` վերն ասվածը վկայում է այն մասին, որ այս ոլորտում հայտնվել են «ճարպիկներ», ովքեր ոչ միայն նման հայտեր են ներկայացնում, այլև բոնուս ստանալու հերթերում գնում են ու վաճառում տեղեր: «Կառավարությունը մտադիր է առաջիկայում շտապ միջոցներ ձեռնարկել նման «հնարամիտների» գործունեությունը կասեցնելու համար»,- հայտարարեց Ալավերդյանը: