Հայաստանում առաջատար միջազգային բանկերից մեկը, որպես բնապահպանական ծրագրի մաս, Երևանի բնակելի թաղամասերից մեկում մեծ ծառատունկ է կազմակերպել` նպատակ ունենալով խրախուսել իր հաճախորդներին օգտվելու բանկի էլեկտրոնային ծառայություններից:

Շարունակելով դեռևս 1996 թ. սկզբնավորված ծառատունկի ավանդույթը` «ԷյչԷսԲիՍի բանկ Հայաստանի» աշխատակիցները և նրանց ընտանիքի անդամները «Հայաստան. ծառատունկ» ծրագրի մասնագետների և թաղամասի բնակիչների մասնակցությամբ 500 ծառ տնկեցին «Հույսի Ավան» թաղամասում:

«ԷյչԷսԲիՍի բանկ Հայաստան» ՓԲԸ-ը պարտավորվել է 1000 ծառ տնկել Երևանում` նպատակ ունենալով խրախուսել իր հաճախորդներին թղթային քաղվածքներից անցնել էլեկտրոնային քաղվածքների և իրենց գործարքները կատարելու համար օգտվել ինտերնետային բանկային ծառայություններից, որը կնպաստի էկոլոգիապես մաքուր շրջակա միջավայրի ստեղծմանը:

Ծառատունկը բանկի մեկնարկած «Կանաչ բանկ» ծրագրի միայն մեկ մասն է: Բանկի 2009 թ. բոլոր նախաձեռնությունները` մարտին հեռախոսային և հուլիսին ինտերնետային բանկային ծառայությունների ներդրումը, ինչպես նաև թղթայինից էլեկտրոնային քաղվածքների անցումը, ուղղված են բանկային գործառնություններում թղթի օգտագործման նվազեցմանը և շրջակա միջավայրի պահպանմանը:

«Այսօրվա ծառատունկի միջոցով մենք փորձում ենք հաճախորդներին և հանրությանը խրախուսել օգտվել շրջակա միջավայրին չվնասող` «կանաչ բանկային ծառայություններից», գրանցվելով բանկի հեռախոսային կամ ինտերնետային բանկային ծառայություններում, անցնելով էլեկտրոնային քաղվածքների: Պետք է նշել նաև, որ բանկի ամբողջ աշխատակազմն արդեն իսկ օգտվում է միայն «կանաչ բանկային ծառայություններից»` օրինակ ծառայելով հասարակությանը»,- ասել է «ԷյչԷսԲիՍի բանկ Հայաստանի» գլխավոր գործադիր տնօրեն Թիմ Սլեյթերը:

Ծառատունկի տեղի ընտրությունը նույնպես պատահական չէ: «Հույսի Ավան» բնակելի թաղամասում ապրում են 76 հայ կարիքավոր ընտանիքներ, հիմնականում փախստականներ, որոնք ունեն նվազագույնը երեք երեխա: Տնկելով դեկորատիվ ծառեր և նվիրելով մրգատու ծառեր` բանկը նպաստում է կարիքավոր ընտանիքների կյանքի բարելավմանը: