Այսօր լրագրողները հավաքվել էին մեծ ակնկալիքով, որ կլսեն, թե ինչպես է Հայաստանի ֆուտբոլի ֆեդերացիայի նախագահ, օլիգարխ Ռուբեն Հայրապետյանը արձագանքելու Ազգային օլիմպիական կոմիտեի, «Բարգավաճ Հայաստան» կուսակցության նախագահ, ԱԺ պատգամավոր Գագիկ Ծառուկյանի` իր հասցեին հնչած արհամարհական ակնարկներին:

Մամուլի ասուլիսը հրավիրել էր ՀՖՖ-ն` խոստանալով, որ Հայրապետյանը կպատասխանի Ծառուկյանի վերջին հայտարարություններին: Ծառուկյանը ներկա չի եղել հոկտեմբերին անցկացված Թուրքիա-Հայաստան ֆուտբոլային հանդիպմանը, քանի որ, ինչպես հայտարարել է, գիտեր, որ Հայաստանի հավաքականը, «միևնույն է` պարտվելու էր»:

Անդրադառնալով Ծառուկյանի հայտարարությանը` Հայրապետյանն ասել էր. «Ես այդ արտահայտությունը բարոյական չեմ համարում»: Ծառուկյանի կուսակցությունն ի պատասխան ասել էր. «Մեր ժողովուրդը լավ է տեսնում, թե ով ինչպես է ղեկավարում իրեն վստահված ոլորտը և ինչ հաջողություններ ունի այնտեղ։ Իսկ փաստն այն է, որ տարիներ շարունակ հայ մարզասեր հասարակության համար մի այնպիսի զգայուն ոլորտ, ինչպիսին ֆուտբոլն է, մնում է անմխիթար վիճակում…»: (Ծառուկյանը, որը նախկինում եղել է բազկամարտի աշխարհի չեմպիոն, ըստ էության ղեկավարում է ծանրամարտի Հայաստանի հավաքականը, որն անցյալ շաբաթ աշխարհի առաջնության թիմային պայքարում երրորդ տեղը զբաղեցրեց` տալով նաև մեկ աշխարհի չեմպիոն: Իսկ Հայրապետյանի ղեկավարած ֆուտբոլի հավաքականն առանձնապես մեծ հաջողություններ չի ունեցել:)

Այսպիսով, ամեն ինչ պատրաստ էր, որ Հայրապետյանի հրավիրած մամուլի ասուլիսը սկսվեր:

Սակայն ՀՖՖ նախագահը չեկավ:

Ֆուտբոլի ֆեդերացիայի մամուլի քարտուղար Տիգրան Իսրայելյանն «ԱրմենիաՆաուին» ասաց, որ Հայրապետյանը չէր եկել մամուլի ասուլիսին, քանի որ այդ պահին հանդիպում էր ՈՒԵՖԱ-ի ներկայացուցիչների հետ, որոնք այցով գտնվում էին Հայաստանում:

Ֆոտոխցիկները լուսանկարեցին դատարկ աթոռը, իսկ լրագրողները կարծիքներ փոխանակեցին, թե որքանո՞վ էր խելամիտ մամուլի ասուլիս հրավիրել, երբ միևնույն ժամանակ նախատեսված էր ՈՒԵՖԱ-ի ներկայացուցիչների հետ հանդիպումը, քանի որ նման հանդիպումների առնչությամբ, որպես կանոն, նախապես պայմանավորվածություն է լինում:

Լրագրողները նաև կարծիք հայտնեցին, թե երբ գործ ունես բազկամարտի նախկին չեմպիոնի հետ, որը դարձել է քաղաքական ազդեցիկ գործիչ, հավանաբար լռությունը ամենալավ պատասխանն է: