Այս տարվա սեպտեմբերից մեկնարկած «Համակարգիչ բոլորի համար» պիլոտային ծրագրի կազմակերպիչները գոհ են ծրագրի իրականացման առաջին երեք ամիսների արդյունքներից:

Ծրագիրը, որի նպատակն է ընդլայնել համակարգիչների տարածումը Հայաստանում, իրականացվում է ՀՀ Էկոնոմիկայի նախարարության, «Ձեռնարկությունների ինկուբատոր» հիմնադրամի, «Հյուլեթ Պակարդ», «Յունիքոմփ» և Մայքրոսոֆթ» ընկերությունների և «ԱԿԲԱ-կրեդիտ ագրիկոլբանկի» կողմից: Վճարելով ամսական 10-20 հազար դրամ (25-51 դոլար)` կարելի է ձեռք բերել «Հյուլեթ Պակարդ»-ի համակարգիչների վեց մոդել: Համակարգիչները գնորդները ձեռք են բերում ապառիկ` 24 ամիս տևողությամբ` առանց կանխավճարի և առանց բանկային տոկոսների: Օրինակ` 252 հազար դրամ (654 դոլար) արժեցող HP Compaq 610 մոդելը կարելի է գնել` ամսական վճարելով 10 500 դրամ (27 դոլար):

Համակարգիչներ արտադրող «Հյուլեթ Պակարդ» ընկերության ներկայացուցչի տվյալներով` ընկերության համակարգիչների վաճառքի ծավալը մոտ երեք անգամ գերազանցել է իրենց սպասելիքները:

Այսօր Երևանում ամերիկյան «Հյուլեթ Պակարդ» ընկերության ԱՊՀ երկրներում վաճառքի գծով տնօրեն Վադիմ Տիխոնիչևը հայտարարեց, որ երկուսուկես ամսում ընկերությունը նախատեսված 500 համակարգչի փոխարեն վաճառել է 1300-ը:

Նա նաև նշեց, որ ծրագիրը, որն իրականացվել է Երևանում, Գյումրում (Շիրակի մարզ), Վանաձորում (Լոռու մարզ), մեծ հետաքրքրություն է առաջացրել հատկապես մարզերի բնակիչների շրջանում: Այս նպատակով ընկերությունը մտադիր է առաջիկայում վաճառքի կետեր հիմնել նաև Կոտայքի, Արագածոտնի, Գեղարքունիքի և Արմավիրի մարզերում:

«Հյուլեթ Պակարդը» նախատեսում է մինչև պիլոտային ծրագրի ավարտը (2010-ի մայիսը) վաճառել ևս 5000 համակարգիչ: 2010-ի հունվարից կսկսվի նաև «Համակարգիչ ուսուցչի համար» ծրագիրը, որի շրջանակներում դպրոցների ուսուցիչները և բուհերի դասախոսները կկարողանան առավել մատչելի վարկային պայմաններով գնել դասավանդման համար նախատեսված բազմազան ծրագրերով համալրված համակարգիչներ:

«Ձեռնարկությունների ինկուբատոր» հիմնադրամի տնօրեն Բագրատ Ենգիբարյանն էլ իր հերթին նշեց, որ ծրագիրը կշարունակվի առաջիկա 4-5 տարիների ընթացքում:

«Ծրագրի նպատակն է այդ ընթացքում տնային համակարգիչներով ապահովել Հայաստանի բնակչության 30 տոկոսին»,- ասաց Ենգիբարյանը` ավելացնելով, որ այժմ բնակչության ընդամենը 5-6 տոկոսն ունի տնային համակարգիչ, ինչը շատ ցածր ցուցանիշ է զարգացող երկրի համար: