Մասնագետները ֆենոմենալ են համարում այն, որ մի կողմից Հայաստանում գնաճն ավելի բարձր է, քան, օրինակ` Եվրոպայում, մյուս կողմից` սպառողական ապրանքների գները չեն աճում այնքան, որքան աճում են նույն այդ ապրանքների գներն աշխարհում:

Անցյալ ամիս մոլեգնող նախաամանորյա մանրածախ առևտուրը 2010-ի հունվարին փոխարինվեց խաղաղությամբ: Նոր տարվա սեղանի առատության համախտանիշով տառապող հայերը հերթական անգամ մինչև վերջ ծախսեցին տնտեսած գումարները` անտեսելով նույնիսկ նախատոնական թանկացումները, որոնք սկսվել էին օրեր և նույնիսկ շաբաթներ առաջ:

Սա, թերևս, նպաստեց նրան, որ ողջ 2009-ին գնաճը Հայաստանում կազմեց 6,5 տոկոս, որից միայն 3,4 տոկոսը գրանցվեց դեկտեմբերին (պաշտոնական տվյալներով` 2009-ի հունվար-նոյեմբերին գնաճը 3,1 տոկոս էր):

Ընդ որում` միջազգային շուկայում կտրուկ գնաճ չի նկատվել, օրինակ` Եվրամիությունում մոտ 1,5 տոկոս գնաճ է գրանցվել: (Դեռ ավելին, համաշխարհային տնտեսական ճգնաժամի պայմաններում երկրները փորձում էին բացառել գնանկման ռիսկերը:)

Փաստորեն, անգամ Տնտեսական մրցակցության պաշտպանության պետական հանձնաժողովի` մինչև 2009-ի դեկտեմբերի 31-ը տեղի ունեցած (ՏՄՊՊՀ) նախաամանորյա ավելի խիստ մոնիթորինգը, որը նպատակ ուներ կանխելու սպասվող թանկացումները, արդյունք չտվեց (թեև հանձնաժողովում այդպես չեն մտածում):

ՏՄՊՊՀ մամուլի քարտուղար Արմինե Ուդումյանն «ԱրմենիաՆաուին» ասաց, որ դեռ մոնիթորինգի վերջնական արդյունքները պատրաստ չեն, սակայն, ըստ նախնական ամփոփման, հանձնաժողովը գների խիստ բարձրացում չի արձանագրել:

«Ինչ-որ էական գնային տարբերություններ նոր տարվա նախաշեմին չեն եղել, որ մրցակցության խախտման կասկած հարուցեին»,- ասաց Ուդումյանը:

Ու չնայած դեկտեմբերյան գնաճին` որոշ ապրանքատեսակների գները Հայաստանում չեն աճել այնքան, որքան աշխարհում:

2009-ին միջազգային շուկայում հիմնական սննդամթերքների (հացահատիկայիններ, կաթնամթերք, միս, շաքար և ձիթաբույսեր) գները կայուն աճ են գրանցել: Այս մասին դեռևս անցած տարեվերջին ահազանգում էին ՄԱԿ-ի Պարենի և գյուղատնտեսության կազմակերպության (FAO) փորձագետները:

2009-ի նոյեմբերին FAO-ի Food Price Index-ը (սննդամթերքի ցուցանիշը), բարձրանալով ևս 11 կետով, հասել է անցյալ տարվա համար առավելագույն մակարդակին՝ 168 կետ: Ընդ որում` անցյալ տարի միջազգային շուկայում ամենաշատը թանկացել են` շաքարը` 200 տոկոսով, կաթն ու կաթնամթերքները (կարագ, պանիր)` 70 տոկոսով, բրինձը` 20 տոկոսով:

Հայաստանում այս ապրանքատեսակների գներն ավելի քիչ են թանկացել:

Ազգային վիճակագրական ծառայության հրապարակած տվյալներով` շաքարավազը, որի գինն աշխարհում աճել է 200 տոկոսով, Հայաստանում 2009-ին թանկացել է 79 դրամով (մոտ 0,2 դոլար) կամ 31 տոկոսով: Բրինձն անցյալ տարվա ընթացքում թանկացել է 51 դրամով (մոտ 0,13 դոլար) կամ 8 տոկոսով, իսկ կարագը` 77 դրամով (մոտ 0,2 դոլար) կամ 2 տոկոսով:

(Չորեքշաբթի Երևանում` արտարժույթի փոխանակման կետերում, մեկ դոլարի փոխարժեքը կազմել է 375 դրամ:)