Հայաստանի և Թուրքիայի` շարունակվող «լեզվակռիվը» ավելի շատ խոսում է երկու երկրների միջև առկա անջրպետի, քան «կարգավորման» հույսի մասին: Այսօր ՀՀ արտգործնախարար Էդվարդ Նալբանդյանը կրկին հայտնեց իշխանության դիրքորոշումը, ըստ որի` ոչ թե Հայաստանը, այլ Թուրքիան է վտանգում արձանագրությունների վավերացման գործընթացը «նախապայմանների» միջոցով:

Նալբանդյանն ասաց, որ արդեն հեռախոսով խոսել է թուրք պաշտոնակցի հետ և իր վրդովմունքը հայտնել ՀՀ սահմանադրական դատարանի որոշման առնչությամբ Թուրքիայի ԱԳՆ հայտարարության կապակցությամբ: Թուրքական կողմը պնդում է, որ որոշման մեջ կան «անընդունելի նախապայմաններ»:

Ուրբաթ (հունվարի 22-ին) մամուլի ասուլիսի ընթացքում ՀՀ արտաքին գերատեսչության ղեկավարը նաև հիշեցրեց, որ Հայաստանի, Ռուսաստանի և Ադրբեջանի նախագահների հանդիպումը տեղի կունենա հունվարի 25-ին Ռուսաստանի Սոչի քաղաքում:

Նախարարը նշեց, որ 2009 թվականը ղարաբաղյան հակամարտության կարգավորմանն առնչվող բանակցային բուռն գործընթացների տարի է եղել: «Հուսով ենք, որ կկարողանանք պահել 2010 թ. բանակցային գործընթացում արձանագրված դրական միտումները»,- ասել է նա:

Լրագրողներից մեկի խնդրանքով մեկնաբանելով այս շաբաթվա սկզբին ՀՀ երկրորդ նախագահ Ռոբերտ Քոչարյանի այցը Իրան` Նալբանդյանն ասել է, որ Քոչարյանին հրավիրել էր Իրանի ղեկավարությունը, և այցը մասնավոր էր: «Թեհրանում Ռոբերտ Քոչարյանը որևէ բան չի ասել, որը կհակասեր պաշտոնական Երևանի դիրքորոշմանը»,- ասել է Նալբանդյանը:

Քոչարյանը Թեհրանում էր հունվարի 20-21-ը, որտեղ նա հանդիպումներ է ունեցել Իրանի նախագահ Մահմուդ Ահմադինեժադի և ԱԳ նախարար Մանուչեր Մոթաքիի հետ: Հանդիպումների ընթացքում կողմերը քննարկել են երկկողմ հարաբերություններին առնչվող հարցեր: Այցի ընթացքում Քոչարյանը հայտարարել է, որ Հայաստանը պատրաստ է ընդլայնելու համագործակցությունը Իրանի հետ: «Այս հայտարարությունը բացարձակապես չի հակասում Իրանի հետ հարաբերություններում Հայաստանի քաղաքականությանը»,- ընդգծել է նախարար Նալբանդյանը: