ՀՀ գյուղատնտեսության նախարարը հավաստիացրեց, որ մեկ օր առաջ սկսված ձյան տեղումներն ու ջերմաստիճանի անկումը չեն ազդի Արարատյան դաշտավայրում բերքատվության վրա:

Այս տարի աննախադեպ տաք ձմեռ է Հայաստանում`հունվարի կեսից գրանցելով +10 աստիճան տաքություն, սակայն երկուշաբթի ջերմաստիճանն իջավ մինչև 0-ից -1 ցուրտ:

«Դեռ երկու օր առաջ վեգետացիոն ոլորտի մեր մասնագետներն այցելել էին Արարատյան դաշտավայրի ու Արմավիրի գյուղեր ու տեղերում խորհուրդներ տվել` հնարավոր ցրտահարությունից խուսափելու համար: Այսօր անհանգստանալու խնդիր չունենք»,- երեքշաբթի մամուլի ասուլիսի ժամանակ նշեց գյուղնախարար Գերասիմ Ալավերդյանը:

Հունվարի 25-ին «Հայաստանի ագրարագյուղացիական միություն» ՀԿ նախագահ Հրաչ Բերբերյանն «ԱրմենիաՆաուին» ասել էր, որ տաք ձմեռն Արարատյան դաշտավայրի առանց բացառության բոլոր պտղատու ծառերի (կեռասենու, դեղձենու, ծիրանենու և խնձորենու որոշ սորտերի) վաղաժամ վեգետացիայի և բողբոջելու պատճառ է դարձել:

«Իսկ եթե մոտ ժամանակներում ձյուն գա, այնուհետև եղանակը, ինչպես կանխատեսվում է, ավելի ցրտի` արձանագրելով -10-12 աստիճան ցուրտ, ապա բերքը կարող է լուրջ վնասներ կրել»,- նշել էր Բերբերյանը:

Թեև գյուղնախարարը համաձայն է, որ այս տարի ծառերի վեգետացիոն շրջանը մեկ ամիս շուտ է սկսվել, նա նշում է, որ ծառերը դեռ քնած են:

«Հիմա հունվարն է, ծառերը հիմնականում քնած վիճակում են, եթե նման եղանակը պահպանվի, անհանգստանալու կարիք չկա, բայց եթե եղանակը նորից տաքանա, այդ դեպքում ցրտահարության վտանգ կառաջանա»,- տեղեկացրեց Ալավերդյանը:

Արարատյան դաշտավայրի գյուղերից մեկի բնակիչ Աշոտ Խաչատրյանը «ԱրմենիաՆաուին» ասաց, որ «ծիրանենիների կեղևը, օրինակ` արդեն կարմրել էր, ու ծառերն սկսել էին աշխատել»:

Նախարարը նաև պատմեց 2010-ին գյուղատնտեսությունում գերակա հայտարարված ճյուղերում իրականացվելիք ծրագրերի մասին, որոնց համաձայն` այս տարի շաքարի ճակնդեղի արտադրության զարգացման շնորհիվ նախատեսվում է պետբյուջեն համալրել 16 մլրդ դրամով (մոտ 42 մլն դոլար), իսկ ոչխարաբուծության զարգացմամբ`ավելի քան 3 մլրդ դրամով (գրեթե 8 մլն դոլար):