Հինգշաբթի Հայաստանի իրավապահ մարմինները հաղորդել են, որ առգրավվել է աննախադեպ քանակի հերոին տեսակի թմրամիջոց, որը, ըստ նրանց, Հայաստան է տեղափոխվել ապօրինի ճանապարհով Թուրքիայից իրանցի թմրավաճառի կողմից:

ՀՀ ոստիկանության և գլխավոր դատախազության հաղորդմամբ` երկուշաբթի Ա կարգի թմրամիջոց է հայտնաբերվել ազգությամբ հայ ՌԴ քաղաքացու ավտոմեքենայում` իրանցի Մուստաֆա Ադվայի մոտ:

Ոստիկանության հաղորդմամբ` քննությամբ չպարզված անձը հերոինի խմբաքանակը հայ-թուրքական սահմանը բաժանող փշալարի մյուս կողմից նետել է, որը րոպեներ անց վերցրել է Ավդայը: Նույն աղբյուրի համաձայն` Ավդայը և ՌԴ քաղաքացի Հովհաննես Դավթյանը ռուս սահմանապահների հսկողության տակ գտնվող չնշված հատվածում ձերբակալվել են:

Երկուշաբթի առավոտյան նույն տարածքում ձերբակալվել է Իրանի մեկ այլ քաղաքացի` Հուսեյն Տազեհ Կանդը: Ոստիկանության և դատախազության հաղորդմամբ`իրավապահ մարմինները մոտ 5 կգ ափիոն տեսակի թմրամիջոց են հայտնաբերել նրա մեքենայում: Ոստիկանության հաղորդագրության համաձայն` թմրամիջոցը թուրքական կողմից նույն եղանակով` փշալարերի վրայով, նետվել է Տազեհին:

Դատախազությունը հաղորդում է, որ հայտնաբերված հերոին և ափիոն տեսակի թմրամիջոցների արժեքը «սև» շուկայում կազմում է շուրջ 2 միլիոն դոլար։ Նույն աղբյուրում նշված է. «Հետաքննությունը շարունակվում է, և լրացուցիչ կհաղորդենք արդյունքների մասին»:

Ըստ հաղորդագրության` ոստիկանության և գլխավոր դատախազության թմրանյութերի դեմ պայքարի բաժնի համատեղ հետաքննության արդյունքում ընդհանուր առմամբ «մոտ մեկ տասնյակ մարդ» է ձերբակալվել, այդ թվում` թմրավաճառներ և թմրամոլներ: Սակայն ոստիկանությունը տեղեկացնում է ընդամենը չորս ձերբակալվածների մասին, որոնցից երեքը, ըստ նրանց, իրանցիներ են:

Թմրամիջոցներին առնչվող մեղադրանքներով Հայաստանի քրեակատարողական հիմնարկներում մի շարք իրանցիներ արդեն կրում են իրենց պատիժը: Իրանը համարվում է Հայաստան ապօրինի թմրամիջոցների ներմուծման հիմնական աղբյուր:

Անխախությունից հետո թմրամիջոցների ապօրինի ներմուծումը և դրանց օգտագործումը Հայաստանում աճել են, թեև միջազգային չափանիշներով դեռևս ցածր է: Հայաստանի ոստիկանության հաղորդմամբ` թմրամիջոցներին առնչվող պաշտոնապես արձանագրված հանցագործությունները անցյալ տարի գրեթե կրկնապատկվել են` հասնելով 539-ի: Ոստիկանությունը նաև արձանագրել է թմրամիջոցներն անօրինական պահելու 690 դեպք` 2008 թվականի 372-ի համեմատ: