Ապրիլին բնական գազը կթանկանա 37,5 տոկոսով, ուրբաթ` փետրվարի 26-ին, Հանրային ծառայությունները կարգավորող հանձնաժողովը (ՀԾԿՀ) հաստատեց Հայաստանում գազի մենաշնորհ ունեցող կազմակերպության ներկայացրած նոր սակագները։

Սպառողների համար սահմանված բնական գազի նոր սակագինը ընդամենը մի փոքր ցածր է գազ մատակարարող հայ-ռուսական կազմակերպության` «Հայռուսգազարդի» ներկայացրած գնից:

Ինչպես հաստատվեց ՀԾԿՀ-ի կողմից, ապրիլի 1-ից «Հայռուսգազարդը» իր մոտ կես միլիոն սպառողներին 1000 խմ գազն արդեն կվաճառի 132 000 դրամով (347 դոլար)` նախկին 96 000 դրամի (252 դոլար) փոխարեն: Խոշոր գազօգտագործողների, ձեռնարկությունների համար գազը կբարձրանա 13%-ով:

Սակագների փոփոխության վերաբերյալ հայտը «Հայռուսգազարդը» ներկայացրել էր հունվարի 22-ին (1 խմ դիմաց 136 դրամ), որով առաջարկվում էր գազի սակագինը բարձրացնել 41 տոկոսով, սակայն ՀԾԿՀ-ը իջեցրել է գինը 132 դրամի:

Ինչպես պարզաբանում է ՀԾԿ հանձնաժողովը, բնական գազի սակագների բարձրացումը պայմանավորված է մի շարք գործոններով` «Հայաստան ներկրվող բնական գազի գնի շուրջ 17% աճով, ՀՀ դրամի նկատմամբ ԱՄՆ դոլարի փոխարժեքի կտրուկ բարձրացմամբ, բնական գազի սպառման ծավալների շուրջ 20% նվազմամբ, «Հայռուսգազարդ» ընկերության կողմից իրականացված ներդրումների փոխհատուցման անհրաժեշտությամբ»:

Ըստ տնտեսական կանխատեսումների` առաջիկայում միջինը 15 տոկոսով կբարձրանան էլեկտրաէներգիայի, ջրամատակարարման, լայն սպառման ապրանքների գները:

Գազի գնի բարձրացման դեմ, ի թիվս այլ քաղաքական գործիչների, հայտարարությամբ հանդես է եկել նաև Մարդու իրավունքների պաշտպան Արմեն Հարությունյանը` համարելով, որ գների բարձրացումը սրելու է սոցիալական լարվածությունը: