ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի կողմից հինգշաբթի Հայոց ցեղասպանության 252 բանաձևի անակնկալ ընդունումից անմիջապես հետո ԱՄՆ պետքարտուղար Հիլարի Քլինթոնն ասել է, որ բանաձևին չպետք է ընթացք տալ:

Լատինական Ամերիկայում կատարած շրջագայության ժամանակ Քլինթոնը Կոստա Ռիկայից հայտարարել է, որ Օբամայի վարչակազմն արդեն հստակեցրել է իր մտադրությունները:

«Մենք վստահ չենք, որ ողջ Կոնգրեսը կքվեարկի կամ պետք է քվեարկի այդ բանաձևի օգտին, և մենք հասկացրել ենք դա բոլոր ներգրավված կողմերին»,- ասել է Քլինթոնը:

Հանձնաժողով նիստում քվեարկության նախօրեին Քլինթոնը հորդորել էր հանձնաժողովի նախագահ Հովարդ Բերմանին` 27-ամյա փորձառու կոնգրեսականին Կալիֆորնիայից, քվեարկության չդնել բանաձևը, ինչպես նախատեսվել էր անցյալ ամիս: Բերմանը (252 բանաձևի համահեղինակ) մերժել է պետքարտուղարի հորդորը և գլխավորել ընդամենը մեկ ձայնի առավելությամբ (23:22) հաստատված քվեարկությունը:

Բանաձևը կոչ է անում ԱՄՆ կառավարությանն ընդունել, որ 1915-1923 թթ. Օսմանյան Թուրքիայի կողմից իրականացված շուրջ 1,5 մլն հայերի կոտորածը հավասարազոր է «ցեղասպանության»: Բանաձևի հաստատման գործընթացում հաջորդ քայլը Ներկայացուցիչների պալատի խոսնակ Նենսի Փելոսիի`435 կոնգրեսականներին քվեարկելու կոչը կլինի:

Ներկայացուցիչների պալատի 252 բանաձևին հավանություն է տվել Կոնգրեսի շուրջ 140 անդամ:

Փելոսին ընդհանուր առմամբ բարյացակամ է տրամադրված եղել Ցեղասպանության վերաբերյալ Հայաստանի տեսակետի նկատմամբ: Սակայն Քլինթոնի գործոնը կար` որպես սենատոր, որն իր գործընկեր և ներկայիս նախագահ Բարաք Օբամայի հետ աջակցում էր ցեղասպանության ճանաչումը: Քվեարկությունից առաջ Օբաման հեռախոսազրույց է ունեցել Թուրքիայի նախագահ Աբդուլլահ Գյուլի հետ, որի ընթացքում, ըստ որոշ տեղեկությունների, ԱՄՆ նախագահը հավաստիացրել է Գյուլին, որ ինքը չի աջակցում բանաձևի ընդունմանը:

Արդյոք բանաձևը քվեարկության կդրվի՞ Ներկայացուցիչների պալատում` մարտահրավեր նետելով Փելոսիի հավատարմությանը ԱՄՆ վարչակազմին: 2000 թ. ի վեր երեք անգամ էլ, երբ իշխանության գլուխ էին կանգնած թե´ դեմոկրատները, թե´ հանրապետականները, նման բանաձևերը երբեք քվեարկության չեն դրվել պալատում:

Այդուհանդերձ, հանձնաժողովի կողմից բանաձևի այս խորհրդանշական հաստատումն արժանացել է Թուրքիայի քննադատությանը, որը հինգշաբթի անցկացված քվեարկությունից րոպեներ անց (Երևանի ժամանակով գիշերը ժամը 1-ին) հետ է կանչել ԱՄՆ-ում իր դեսպանին:

Դեսպան Նամիկ Թանի հետ կանչելուն հետևեց Գյուլի կշտամբանքը, ըստ որի` իր երկրին մեղադրում են «մի հանցանքի մեջ, որն այն չի գործել»:

Սակայն Երևանում ՀՀ արտգործնախարար Էդվարդ Նալբանդյանը քվեարկությունն անվանել է «համամարդկային արժեքներին ամերիկյան ժողովրդի նվիրվածության ևս մեկ վկայություն և կարևոր քայլ մարդկության դեմ ոճիրների կանխարգելման ճանապարհին»: