Ժողովրդական կուսակցության նախագահ, սակավաթիվ, սակայն հավատարիմ հետևորդների առաջնորդ Տիգրան Կարապետյանը չորեքշաբթի Երևանում կայացած հանրահավաքի ժամանակ ՀՀ իշխանություններին մինչև փետրվարի 28-ը ժամանակ է տվել` իրենց պահանջները կատարելու համար, այլապես ինքն արտահերթ ընտրությունների պահանջով հանրահավաքներ կանցկացնի:

«Մենք սկսելու են պայքարել 2008 թ. նախագահական ընտրություններից հետո բանտերում հայտնված քաղբանտարկյալների իրավունքների համար, պահանջելու ենք բարձրացնել թոշակներն ու նվազագույն աշխատավարձը և այլն»,- հայտարարել է Կարապետյանը` դիմելով Մատենադարանի մոտ հավաքված իր աջակիցներին, Ժողովրդական կուսակցությանը հատուկ մտահոգություն բարձրաձայնելով և բորբոքելով կրքերը:

2010 թ. դեկտեմբերի 16-ին Հեռուստատեսության և ռադիոյի ազգային հանձնաժողովի (ՀՌԱՀ) հայտարարած մրցույթում «ԱԼՄ»-ն զրկվել է կապուղուց, ինչը ստիպել է հեռուստաընկերության սեփականատեր Կարապետյանին Երևանում և մարզերում հանրահավաքներ անցկացնել: Թեև Կարապետյանի քաղաքական ազդեցությունն այնքան էլ մեծ չէ, այդուհանդերձ նա վայելում է հազարավոր մարդկանց աջակցությունը, որոնք հետևում են փոփոխություններ անելու նրա կոչերին:

Չորեքշաբթի անցկացված հանրահավաքը իր չափերով գրեթե չէր զիջում ՀՀ առաջին նախագահ Լևոն Տեր-Պետրոսյանի գլխավորած ընդդիմադիր Հայ ազգային կոնգրեսի հանրահավաքներին: Մատենադարանից մինչև Մաշտոցի պողոտայի սկիզբ ընկած հատվածում հավաքվել էին 5000-7000 ցուցարարներ:

«Ես միշտ նայել եմ «ԱԼՄ»-ի գիտահանրամատչելի հաղորդումները, բացի այդ, իմ երկրի խնդիրներով եմ մտահոգվում և դեմ եմ ցանկացած խոսքի սահմանափակման»,- «ԱրմենիաՆաուին» ասում է 73-ամյա Սասուն Մխիթարյանը` հպարտությամբ ցույց տալով Ղարաբաղյան պատերազմի տարիներին որպես առաջին ֆիդայի հանդես գալու վկայականը: