Այսօր երեկոյան ժամը 19:00-ին Լևոն Տեր-Պետրոսյանի գլխավորությամբ և ընդդիմադիր «Ժառանգություն» կուսակցության հիմնադիր Րաֆֆի Հովհաննիսյանի երկօրյա հացադուլով ոգևորված տասնյակ հազարավոր ընդդիմության աջակիցներին հաջողվել է առանց միջադեպերի մտնել Ազատության հրապարակ, որը պաշարել էին սաղավարտներով և մահակներով կանգնած ոստիկանները, և որտեղ շուրջ մեկ տարի նրանց մուտքն արգելված էր իշխանությունների կողմից:

Երևանի կենտրոնում լուրն արագ տարածվեց, և հարակից փողոցներից բազմաթիվ մարդիկ շտապեցին հրապարակ:

Ըստ Հայ ազգային կոնգրեսի, որի նախագահը Լևոն Տեր-Պետրոսյանն է, հանրահավաքի մասնակիցների թիվը հասնում էր 100.000-ի, որոնք մինչ այդ Մատենադարանին հարող տարածքում էին հավաքվել: Իրականում այդ թիվն ավելի շուտ դրա կեսն էր կամ դրանից էլ քիչ, սակայն այդքանն էլ բավական էր, որ լեփ-լեցուն դառնար տարածքը, որտեղ նրանք ցույց էին անում 2008 թ. մարտի 1-ի դեպքերից հետո առաջին անգամ, երբ ոստիկանությունը քանդեց ընդդիմադիրների ճամբարն ու մեկօրյա բախումների հետևանքով զոհվեց 10 մարդ: (Ավելի ուշ մամուլի հաղորդագրության մեջ Հայաստանի ոստիկանությունը նշել էր, որ հանրահավաքի մասնակիցների թիվը հասնում էր 9000-ի:)

Երևանի ոստիկանապետ Ներսես Նազարյանը, անդրադառնալով ցուցարարներին հրապարակ մտնել թույլ տալու որոշմանը, «ԱրմենիաՆաուին» ասել էր, որ «ընդդիմության հետ բանակցել ենք, և այս անգամ մարդիկ, կարծես, ավելի գիտակից են և կարողանում են իրենց նորմալ դրսևորել»:

Հանրահավաքը սկսվել է ժամը 17:00-ին, այնուհետև մեկ ժամ անց ՀԱԿ-ի համակարգող Լևոն Զուրաբյանը կոչ է արել հավաքվածներին իջնել Մաշտոցի պողոտայով ներքև և «վերանվաճել հրապարակը»:

Ճանապարհին մի քանի անգամ դադար տալով` Տեր-Պետրոսյանը և ընդդիմության մյուս ղեկավարները նախքան Թումանյան փողոցով իջնելը և Հյուսիսային պողոտայի կողմից հրապարակ մտնելը կարծես ծանրութեթև էին անում իրենց քայլերը:

Տեր-Պետրոսյանի նախագահության տարիներին առաջին ՀՀ արտգործնախարար Հովհաննիսյանը հացադուլի մասին իր հայտարարությունից հետո երկու օր ու գիշեր է անցկացրել հրապարակի մի նստարանի վրա: Այս քայլով նա իր բողոքի ձայնն է բարձրացնում, իր խոսքով` ոչ լեգիտիմ իշխանության և, մասնավորապես, կոալիցիոն հուշագրի դեմ, որով երեք կուսակցությունները համաձայնել են համագործակցել` ընդլայնելով իրենց արդեն իսկ մեծ գերակշռությունը Ազգային ժողովում և Սերժ Սարգսյանի կառավարությունում: Հովհաննիսյանը բողոքում էր նաև ընդդիմության մուտքը Ազատության հրապարակ արգելելու դեմ:

Հայտնվելով հրապարակում` ընդդիմադիրներից ոմանք հավաքվել են այն նստարանի մոտ, որտեղ Հովհաննիսյանն էր: Իր շուրջը հավաքվածներին նա ասել է, որ իրադարձությունների նման շրջադարձը կարելի է «հաղթանակ» համարել, սակայն հավելել է, որ կշարունակի անժամկետ հացադուլը:

Ընդդիմության այսօրվա խորհրդանշական հաղթանակը համընկել է ԵԽԽՎ համազեկուցողների այցի հետ մայրաքաղաք: Այս զուգադիպությունը կարող է կապ ունենալ իշխանությունների ընդունած որոշման հետ, որի արդյունքում ոստիկանությունը մի կողմ է քաշվել` թույլ տալով ընդդիմադիրների մուտքը Ազատության հրապարակ:

Ազատության հրապարակում արդեն շուրջ մեկ ժամ շարունակվող հանրահավաքը սյուրռեալիստական պատկեր էր հիշեցնում. հիմնականում սևազգեստ ցուցարարների հոծ բազմությունում երևում էին գունագեղ և այս իրավիճակին անհարիր թվացող մանկական փչովի ատրակցիոններ, որոնք այստեղ են 2010 թ. մայիսից, երբ հրապարակը վերանորոգվել և վերաբացվել է ու հանրային ելույթների համար համապատասխան հարմարանքներ տեղադրվել:

Դիմելով հավաքվածներին` Զուրաբյանը նաև խոսել է «թավշյա» կամ անարյուն հեղափոխության մասին:
Հավաքվածներից մեկը «հի-մա, հի-մա» վանկարկեց` կոչ անելով անհապաղ քայլերի դիմել, սակայն Զուրաբյանը զսպվածության և խաղաղություն պահպանելու կոչ արեց:

ՀՀՇ վարչության նախագահ Արամ Մանուկյանը հորդորել է մարդկանց «հավատալ» Տեր-Պետրոսյանին և ասել է, որ սա առաջին հաղթանակն է, որը, սակայն, միայն սկիզբն է. «Վստահե´ք մեզ, մենք ամեն ինչ հաշվարկել ենք»,- ասել է Մանուկյանը:

Հավաքվածները ոգևորված էին նաև այն լուրից, որ 2008 թ. մարտիմեկյան դեպքերի առնչությամբ ձերբակալված երկու «քաղբանտարկյալներ» այսօր ազատ են արձակվել, որոնցից մեկը խոսել է ժողովրդի հետ:

Ընդդիմության վերջին` մարտի 1-ի հանրահավաքում Լևոն Տեր-Պետրոսյանի ներկայացրած 15 պահանջներից մեկը 3 տարի առաջ ձերբակալված և մինչ օրս անազատության մեջ գտնվող անձանց ազատ արձակումն էր: Այն ժամանակ նա հայտարարել էր, որ այսօրվա հանրահավաքում անդրադարձ է լինելու այն հարցերին, թե ինչպես են իշխանություններն արձագանքել իրենց պահանջներին, որոնք նախագահ Սարգսյանի իշխող Հանրապետական կուսակցությունն անընդունելի «վերջնագիր» է անվանել:

21:00-ի սահմաններում հավաքվածներին իր խոսքն ուղղեց Տեր-Պետրոսյանը` ասելով, որ վերջին երեք տարիների ընթացքում Երևանի քաղաքապետարանն ավելի քան 100 անգամ (երեք տարբեր քաղաքապետների պաշտոնավարման ժամանակ) մերժել է հրապարակում հանրահավաք անցկացնելու մասին ՀԱԿ-ի դիմումները: Առաջին նախագահը հավելել է, որ մերժումներով խախտվել է հասարակության և իր առաջնորդների միջև երկխոսության անհրաժեշտությունը:

Նա ասել է, որ հրապարակում ընդդիմության հաջորդ հանրահավաքի թույլտվություն ստանալու մասին ևս մի դիմում կուղարկվի քաղաքապետարան: «Դե, թող հիմա այս քաղաքապետը փորձի մերժել 100.000-ին»,- ասել է նա:

Շուրջ 20 րոպե տևած իր խոսքը եզրափակելով` Տեր-Պետրոսյանը կրկնել է բանտարկյալներին ազատ արձակելու մասին իր պահանջը և կոչ արել իշխանություններին բացահայտել 2008 թ. մարտիմեկյան սպանությունները:

Դիմելով իր շուրջը հավաքված լրագրողներին` Հովհաննիսյանը ասել է. «Այս մուտքը (հրապարակ) խորհրդանշում է մեր ազգի ապագան, որն ազատությունն է: Հաղթանակը լինում է ոչ թե առաջին նախագահի, ոչ թե իմ, այլ ժողովրդի կամքի շնորհիվ»: