Ֆրանսիայում Թուրքիայի դեսպան Թաքսին Բուրջուօղլուն վերադարձել է Փարիզ այն բանից հետո, երբ խորհրդատվություններ է անցկացրել ֆրանսիացի օրենսդիրների ընդունած Հայոց ցեղասպանության ժխտումը քրեականացնող օրինագիծը անօրինական համարելու առնչությամբ, կիրակի ասել է մի պաշտոնյա:

«Դեսպանն ավարտել է խորհրդատվությունները, որի համար հետ էր կանչվել, և շաբաթ օրը վերադարձել է Ֆրանսիա»,- AFP-ին ասել է Թուրքիայի արտգործնախարարի խոսնակ Սելջուկ Ունալը:

Բուրջուօղլուն հետ էր կանչվել Անկարա այն բանից հետո, երբ Ֆրանսիայի խորհրդարանի ստորին պալատն ընդունել էր ցեղասպանությունների ժխտումը քրեականացնող օրինագիծը, և այժմ աշխատելու է, որ օրինագիծը չընդունվի Սենատի կողմից, ասել է Ունալը:

Օրինագիծն անցյալ շաբաթ ընդգրկվել է ձախերի մեծամասնություն կազմող Սենատի օրակարգում և ակնկալվում է, որ կարող է անցնել, քանի որ երկու կողմերն էլ աջակցում են դրան:

Ֆրանսիայի պահպանողական նախագահ Նիկոլա Սարկոզին հավանության է արժանացրել օրինագիծը, ինչի համար մեղադրվել է ապրիլին կայանալիք ընտրություններից առաջ շուրջ կես միլիոն ֆրանսահայերին սիրաշահելու մեջ:

Ֆրանսիացի օրենսդիրները դեկտեմբերի 22-ին ընդունեցին ցեղասպանությունների ժխտումը քրեականացնող օրինագիծը, որի համաձայն 1915 թ. Օսմանյան Թուրքիայի իրականացրած Հայոց ցեղասպանությունը ժխտող ցանկացած մարդ Ֆրանսիայում կկալանավորվի և կտուգանվի, ինչն էլ ստիպեց Թուրքիային սառեցնել քաղաքական և ռազմական համագործակցությունը Փարիզի հետ:

Առաջին աշխարհամարտի ժամանակ բազմաթիվ հայեր են զոհվել Օսմանյան Թուրքիայում: Հայաստանն ասում է, որ ցեղասպանության ժամանակ զոհվել է 1,5 մլն մարդ, ինչը Թուրքիան ժխտում է` փոխարենն ասելով, որ շուրջ կես միլիոն հայ է զոհվել ռուս զավթիչների հետ միասին մարտերի ընթացքում:

Թուրքիան սպառնացել է պատժամիջոցների նոր փուլով, եթե Սենատն ընդունի օրինագիծը: