Հայաստանի ազգային գրադարանից և Երևանի պետական համալսարանի գրադարանից անցած երկու տարում մի քանի միլիոն դրամ արժողությամբ գրքեր են գողացել` հաղորդում է Հատուկ քննչական ծառայությունը:

Ծառայությունը քրեական գործ է հարուցել 2011 թ. դեկտեմբերի 26-ին, երբ ազգային գրադարանի գրապահոցից գողություն կատարելու հերթական փորձը կանխվել է:

Հատկանշական է, որ ազգային գրադարանից պարբերաբար գողություն է կատարվել, և հափշտակվել են 150 տարբեր գրքեր գրադարանի շենքի պահպանությունն իրականացնող ոստիկանների անմիջական մասնակցությամբ:

Հայաստանի ազգային գրադարանի տնօրեն Տիգրան Զարգարյանը դեռևս 2011-ի հոկտեմբերին էր դիմել ոստիկանություն` հայտնելով, որ գրադարանից գրքեր են անհետանում:

«Գողացված գրքերի մեջ կան 1907 թ., 1910 թ. հրատարակված ռուսերեն գրքեր, որոնք հնարավոր է այստեղ մեծ արժեք չունենան, բայց, օրինակ` Ռուսաստանում մեծ արժեք կարող է ունենան»:

«Երևույթն է շատ զայրացնող, այն, որ ոստիկաններ էլ կան գործում, ովքեր կոչված են պահպանելու մեր արժեքները, այն, որ մեր արժեքները նման ստոր մարդկանց պատճառով դուրս են տարվում Հայաստանից»,- ասում է Զարգարյանը:

Ըստ նախաքննության տեղեկությունների` ոստիկանների հետ համագործակցել է Վրաստանի քաղաքացի Վաժա Ազարիաշվիլին, ով գրքերն արտահանել ու վաճառել է Ռուսաստանում: Վերջինս գողության է դրդել նաև Երևանի պետական համալսարանի գրադարանի հնատիպ, հազվագյուտ և արվեստի գրականության բաժնի վարիչ Հասմիկ Դուրգարյանին, որը 19 տարբեր գրքեր է վաճառել վրացուն, իսկ ստացված գումարը տնօրինել անձնական նպատակներով: