ԱՊՀ երկրների երիտասարդական միության վարչության խորհուրդը որոշում է ընդունել փետրվարի 2-ին Հայաստանում «Պուտին» ակումբ բացել: Ակումբի ստեղծման նպատակը վարչապետ, Ռուսաստանի նախագահի թեկնածու Վլադիմիր Պուտինի` ռուս-հայկական հարաբերությունների, ընդհանուր պատմության և հաղթանակների, ԵվրԱզԷս ընկերակցության ստեղծման մասին գաղափարների տարածումն է: «Պուտին» ակումբը կգործի Հայաստանում ռուսական գրքի տներում:

Լուրը վրդովմունք է առաջացրել սոցիալական ցանցերում: Ինտերնետի հայ օգտատերերը վրդովված են նրանից, որ ռուսական գրքի տներում, որոնք բացվում էին, կարծես թե, ռուսական մշակույթի տարածման նպատակով, բացվում են բացահայտ քաղաքական ակումբներ: «Ռուսական գրքի տների գաղափարը միանգամայն ընդունելի է, ինչպես, ասենք, Բրիտանական խորհրդի կամ ֆրանկոֆոնիայի ակումբների աշխատանքը: Սակայն ինչո՞ւ փչացնել նման գաղափարը, որն ակնհայտորեն անընդունելի է ընդհանուր ակումբի համար»,- հարցնում է «Ֆեյսբուքի» օգտատերերից մեկը:

Զայրացրել է նաև այն, որ «Պուտին» ակումբները ԱՊՀ երկրների երիտասարդական միության վարչության խորհրդի նախագահ Անդրանիկ Նիկողոսյանի խոսքով` իբրև թե բացվում են «հայ երիտասարդության նախաձեռնությամբ»: «Հայ երիտասարդությունից ստացված առաջարկից ելնելով` պարզ է դառնում, որ նա մեծ համակրանք է տածում Վլադիմիր Պուտինի նկատմամբ, նախևառաջ այն պատճառով, որ նա կարողացել է առանձնացնել ամենակարևոր առաջնահերթությունները և ճիշտ շեշտադրումներ կատարել երկու երկրների հետ հարաբերություններում»,- ասել է Անդրանիկ Նիկողոսյանը:

«Ֆեյսբուքի» բազմաթիվ օգտատերեր մտադիր են գրանցվել «Պուտին» ակումբում` այն ներսից բոյկոտելու համար: Նրանք ասում են, որ Ռուսաստանում քաղաքական պայքարը հայ երիտասարդության գործը չէ, և նա լավ կանի կողմնորոշվի Հայաստանում թեկնածուների հարցով, որտեղ նույնպես շուտով ընտրություններ կանցկացվեն: Բացի այդ, Պուտինը Ռուսաստանում բավականին ոչ միանշանակ է ընդունվում, և այնտեղ սկսված բողոքի շարժումն արդեն բացահայտ հակապուտինյան է կոչվում:

Գործակալություններից մեկի հարցին, թե ինչո՞ւ է բացվում հենց ՌԴ վարչապետ Վլադիմիր Պուտինի անունով ակումբ, այլ ոչ թե, ասենք` ՌԴ նախագահ Դմիտրի Մեդվեդևի պատվին, Նիկողոսյանը հայտարարել է. «Որովհետև հայ երիտասարդությունը նախընտրում է Պուտինին: Որոշումն ընդունվել է հայ երիտասարդության ներկայացուցիչների առաջարկով»:

Սոցիալական ցանցերում հայ երիտասարդությունը վրդովված է նրանից, որ նրա անունից նման որոշումներ են ընդունվում: «Ֆեյսբուքի» օգտատերերն առաջարկում են հրապարակել նրանց անունները, որոնք խնդրել են «Պուտին» ակումբներ ստեղծելու մասին:

Ակումբների բացման մասին տարածված հաղորդագրությունում ասվում է, որ հայ երիտասարդությանը, իբրև թե, ոգեշնչել է ԽՍՀՄ-ի նման Եվրասիական միություն ստեղծելու Պուտինի գաղափարը: Սակայն Հայաստանը դեռ պաշտոնապես չի արտահայտել իր վերաբերմունքն այդ գաղափարի վերաբերյալ, ավելին` ոչ մի ազդեցիկ կուսակցություն չի աջակցել դրան:

ՀՀ արտգործնախարար Էդվարդ Նալբանդյանը օրերս տեղի ունեցած մամուլի ասուլիսի ժամանակ հայտարարել է, որ Հայաստանը դեռ չի կողմնորոշվել Եվրասիական միության նկատմամբ վերաբերմունքի հարցում, որովհետև միությունը դեռ ձևավորված չէ: Նման միության նկատմամբ դրական վերաբերունք արտահայտել են միայն երկու հայ քաղաքական գործիչներ` Արամ Կարապետյանը («Նոր ժամանակներ») և Արտաշես Գեղամյանը: Մյուս ուժերը` իշխող և ընդդիմադիր, այդպես էլ չեն ողջունել Եվրասիական միություն ստեղծելու մասին Պուտինի առաջարկությունը:

Ակնկալվում է, որ ռուսական գրքի տներում միջոցառումներ կանցկացվեն, որոնց արդյունքներով բանաձևեր կընդունվեն Պուտինի և նրա Եվրասիական միության օգտին: Սակայն ամենաուշագրավն այն է, որ բանաձևերը կընդունվեն հայ երիտասարդության անունից:

Առաջին «Պուտին» ակումբները կբացվեն Երևանի և Արտաշատի, ինչպես նաև Գյումրու և Վանաձորի ռուսական գրքի տներում: Նիկողոսյանի խոսքով` «Պուտին» ակումբներ կբացվեն ԱՊՀ ողջ տարածքով, իսկ Հայաստանից հետո հաջորդը կլինեն Ղազախստանն ու Ղրղըզստանը:

Պուտինամետ երիտասարդական խմբեր Ռուսաստանում եղել են 2000 թ.-ից նրա իշխանության գլուխ կանգնելուց հետո: Քննադատները ծաղրում են դրանք` որպես Պուտինի անձի պաշտամունքի ապացույց, սակայն նրա մամուլի խոսնակը և ինքը` Պուտինն ասել են, որ նման պաշտամունքի վերահայտնվելու վտանգ Ռուսաստանում չկա: